العيد على الابواب ..على ما تقولوا.. قده يتخاوص وعيد الاضحى المبارك ، اعاده الله علينا وعليكم بالخير والعافية ،يباله كبش (مسبع مربع) بلا قرون، والبيس من وين يا ( بن لزرق) ..قيمة الكباش هذي السنة تنطح نطيح ، على سعر الدولار والريال السعودي ، ونحنا بالله عليكم يا جماعة الخير.. كيف نسوّي ، جالسين على المشاهرة عادها حانبة من رجولها في البنك المركزي بصنعاء ، وفي عدن قالوا .. ماشي سيولة .. ونحنا والله الى الان ماشي عرفنا شوه هذي السيولة ، يقولوا .. سيولة..قلنا سيولة .. وكم هيه عسى الله هذي المشاهرة .. (باولة وبيستين ) عادنا قلنا نبا (كبش) .. طيب وباقي حق ثياب العيد من وين نجيبها ..؟ وحق العطر والعود والبخور والفل والمشموم اللحجي .. من وين؟ وحق التمشية ومعاودة الاهل والحبايب والخلاّن من وين ..؟ بالله عليكم كلمّوا .. (فتحي بن لزرق) .. قلولوه .. كبش العيد يقول.. (أمباع) وخلوّه يكتب في الجريدة حقته مناشدة للرئيس ( عبدربه) .. ان الناس ضباحى ومدوخين ، بيت الاقل يوجه الحكومة الشرعية ، توزع عليهم من (نص كبش) ، وقليل ريالات سعودي ، وبا يدخل الجنة، تبوا مني امانة ديانة .. الواحد هوه وعياله يتخبوّا ايام العيد ، ويجلسوا داخل بيوتهم ولا يخرجوا من الباب حتى شبر ، ولا حد تخبر وسأل عليهم .. نقل لهم (ماتوا) وشبعوا موته ،سقطت فوقهم قذيفة من حقت الحرب ،أو صاعقة ماشي الاّ هذا هوه الحل ،خافوا الله ((قيمة الكبش)) وصلت الى (ستين) وبعضها الى (سبعين) الف ريال ، شوه هذا الخبر ، هذا الا قده جنان ، نعم نحنا معانا زواج ، او بانشتري ذهب بالتولة.. قده كبش يخلّي البيت عرفه (كر) .. قالوا اشتروه الدنيا عيد ، تبوا مني الصدق.. العيد هو عيد العافية ، وعادكم أسالوا .. (( فتحي بن لزرق)) ..والاية تقول: (لا يكلف الله نفساً الا وسعها لها ما كسبت وعليها ما اكتسبت) .. لكن يا ناس عيالي ما خلّوا لي حالي .. ينجروني نجير كل يوم من صبح الله .. يا اباه نبا كبش العيد، تجيبه لنا من حيث ما جبته ، طيب يا عيالي المشاهرة عادها ما شي جت ، عادها تسير في التريق على عجاز ، من وين تبوني جيب بيس ..؟ هب اسرق ، يا لوماه ، يا خزاتاه ويا عيباه ، اخر عمري ، شوه بيقولوا الناس (سارق) .. لا هذا عيب في حقي وفي دقني لبيض ، يقع عيد ولا عساه لا قع ، با نعيّد على (كراعين) .. والا على مرق (ماجي) .. وعلى عرف المرق فتوّا ، وقده عرفه وطعمه كما اللحم ، شوه قلتوا يا عيالي ..؟ قالوا.. لا نحنا نبا كبش ، ماشي، الا كبش ، نذبحه في بيتنا كما الناس ، قلت لهم طيب ... حليناها ، با هب (سيلة الغنم) .. وبا تمدد بين المواشي وبيقع (عرفي) كباش ،وخلاص عيدّنا ، ولما با يتخبّروكم الناس.. ابوكم اشترى لكم كبش..؟ قولوا .. يه ، اشترى لنا كبش ، وعادكم شمّوا عرف ثيابه ، تمام ..؟ قالوا تمام ، انا لله وانا اليه راجعون ، هذى البلاد خلتنا حتى نكذب على عيالنا ، جرتنّي عيني في النوم ، وانا هارج نفسي، ومن تحت الطراحة اقول.. (امباع) .. ورقدت ولا دريت ، وترأيت اني اقتلبت (كبش) .. اعوذ بالله من الشيطان الرجيم ، وما قمت من النوم ، الا والناس قدهم يكبّروا ويصلوا صلاة العيد ، واقتلبت يمين وشويل ، وعيالي كلهم رقود بجنبي .. ولا كبش ولا يحزنون ، طفر في طفر ، وشكع في شكع ، المهم عرّفي مواشي ، وعيدكم سعيد حبايبي .. كل سنة وانتوا بالف خير، وسلموا لي على الرئيس عبدربه ، وقلوله ..عيد مبارك .. كل عام وانته في الرياض..!
