نحنا خلاص تعبنا .. هلكنا .. حرقنا.. متنا .. من مشكلة الكرهبه .. خلاص ديامنا قدها ناجحه .. وكلام (بن دغر) عن (الصيف الصاقع البارد) .. أمسك لك ريح..(الكرهبه ضرطت ..؟ لا فسيت) .. وبعدين ..؟ وبعدين.. (الضرط) في هذه البلاد يولد كرهبه.. وكرهبه بلا (ضرط) ماشي كرهبه.. ولا لها حتى طعم ..بالله عليكم يا (حكومة شرعية) ما تستحوا على نفوسكم قليل.. بعد (خمسين سنه) من عمر الثورة والاستقلال – ولا كان أبوها ثوره .. ولا كان أبوه استقلال – أصبحنا أخرتها بلا كرهبه .. قد كان حالنا أحسن في زمان بريطانية.. قلنا نبا ثورة .. ونبا استقلال .. وعادنا ختمنا بضفعه – على قولت المثل – ودخلنا في ( وحدة العصيد والسحاوق).. وأصبحنا في خص عيشه.. بالله عليكم شوه هذي من بلاد.. وشوه هذي من وحدة.. وشوه هذي من أم الصبيان وأم الجان ..؟ حالنا أصبح في (جحرالحمار).. الناس في البلاد الثانية يسيروا لا قدام .. ونحنا في هذي البلاد نسير لاقفا .. ولامع أمهاتنا شي.. حتى حق الصبوح .. والواحد منا لا مات يهبوا أهله يدوروا له حق الكفن وحق القبر .. و يخارجوا عليه الديون ..(الكرهبه .. ضرطت ؟ لا.. فسيت) أصبحت بيوتنا ملانه مواطير وسراجات ومراوح شاحن وفوانيس وشموع وألواح طاقة شمسية .. ومراوح عزف من حقون زمان جدتي .. وما خفي كان أعظم .. يلعن أبوها بلاد .. (الكرهبه ..ضرطت ؟ لا .. فسيت ) .. أصبحنا نرقد عراوى بلا ثياب كما ربي خلقنا .. ونسير ونضرط من شدة الحما.. أكلنا أصبح كله ماي ..( الكرهبه .. ضرطت ؟ لا .. فسيت) .. وعادكم تخبروا (بن دغر) رئيس الحكومه الشرعية .. صاحب نظرية (الصيف البارد الصاقع).. والله إن هذي مسخره وقلة حيا.. وضحك على المواطن . كل بلاد الدنيا الكرهبه فيها لاصيه من مية سنة ولا طفيت .. ألا عندنا الكرهبه طافيه في اليوم زايد على (ثمانية وأربعين ساعة)- أصل اليوم عندنا بيومين.. من شدة الحما - (الكرهبه.. ضرطت؟ لا .. فسيت) .. والله يا جماعة الخير وما عندي لكم يمين .. هبيت يوم العيد (الوهط) بلحج.. قلت با عاود أهلي وخلاني وحبايبي بالعيد.. لقيت وأنا سير في التريق بعض من صحابي من حقون زمان .. من حوالي خمسين سنة.. قالوا : ((يا عبدان دهيس .. كيف حالك ..؟ )) قلت لهم وحلقي ناشف من شدة الحما: أنا ماثي أبذان دهيس.. أنا أثمي أبدو ربوه- معناته عبد ربه- والله ياأخواني.. إني نسيت شوه أسمي.. ولساني أعتجم .. وقلت .. وهرجتي رجعت كما لثرم من شدة الحما .. قالوا : (( إلا أنته عبدان دهيس .. لأن عبد ربه صلع..)) قلت لهم : أيوه صح أبدو ربوه صلع.. بس أنا صلعتي قفا.. بسبب الحما والكرهبه.. والحما في الوهط يضرط الحمير .. والله العظيم أن أهل الوهط و حوطة لحج وقراها يعيشوا في أشد التعب بسبب الكرهبه.. وأنته وينك يامحافظ لحج.. يا (خبجي) .. خليك مع قضايا الناس وخلي الأمور الثانيه لأهلها .. (الكرهبه..ضرطت؟ لا .. فسيت) .. خلاص يا مواطن أكشح (البلاك) حق الكرهبه في (مؤخرتك) .. وبايمشي المكيف داخل بطنك ياسلام .. ويانعمة الله دومي.. كرهبه بلاش .. والله كل هذي السنين ماشي كنا داريين إن داخل ديامنا كرهبه من أيام (المخترع أديسون) .. خلاص محلولة .. كل واحد يلصي بيته من مؤخرته.. وخلوا كرهبة الحكومة لبن دغر وصحابه.. قولوا .. شلينا رجولنا من الوهط ظهر حمر .. وجري لا عدن.. ولما قدنا قريب من (دار الأمير سعد) إلا والنفخه حقت الحما جتنا تقول نار .. وصلت بيتي في (السنافر) لقيت الكرهبه طافيه ألا يا(أم الصبيان) شوه هذي العيشه.. (يا فارمن الموت يا ملاقي له) . لعنة الله عليها بلاد.. سوق المراوح العزف حامي.. والله يا(معاويه مجور) بدال ماتبيع خضره وصيد في الوهط .. أحسن لك تبيع مراوح عزف .. باتكسب ذهب .. ذلحين خلاص خلونا في الكلام الجد .. والكلام الجد هوه.. كان على (بن دغر) أن لايستعجل في الكلام عن (الصيف البارد ) ألا لما تدخل الطاقه بسلامة الله وحفظه الى الشبكة العامة.. ويشوف بعينه ويحس بديمه أن الكرهبه تحسنت بعدين يهرج على كيفه .. ذلحين سمعنا أن (قليل ميجا وقيلي جيجا ) دخلت الشبكه من يومين .. أن شاء الله يكون الخبر صدق .. بس تبوا الصدق عدن تحتاج (محطة استراتيجية ) للكرهبة .. ماشي تبا ترقيع .. طيب قلولنا .. من الاخير .. (الكرهبه ضرطت وإلا فسيت ..؟ ) ويا الله بالخير..!