مكانا رجعنا لمعراصة المشاهرة و الماي والبترول مرة ثاني.. ندخل في الشهر الثاني والثالث والمشاهرة حقت الشهر الأول عادها ما جت .. عادهم نعم يخضبوها ويحنوها .. نخرج من مشكلة المشاهرة .. ندخل في مشكلة الماي .. البيب اكتسر .. البيب ماسك هوا يبا ((تنخيس )) .. كلام كله مخيط بصميل .. عمارنا كلها ماشي سمعنا كلمة (( تنخيس)) إلا في هذا الوقت .. طيب خرجنا من مشكلة الماي .. دخلونا في ((مشكلة البترول)) .. تدور المحطات حقت البترول كلها ولاتلاقي حتى قطرة بترول .. تقل لهم وين البترول ..؟ يقلو لك هب تخبر المصافي .. ولما تقع أزمة بترول ويعتدم بتات .. ((صحاب المحطات)) – سامحهم الله- فيسع مايقلبوا المحطات حقتهم الى مواقع لتأجير المخادر .. وبعضهم محلات لبيع العصيد والحلبه والسحاوق والسلته والفحسه – لكم فاحس يفحسكم – وبعضهم مخبازة .. وبعضهم محلات للحلاقة السفري – دنيا وفيها عجايب .. ابتسم انته في اليمن- ولما يجي البترول يرجعوها كما كانت عليه .. وعاد باقي معانا ((خبارة المجاري)) .. وهذي المشكلة تبالها موضوع من نفسها .. وادموعي سيلي..! طيب ذلحين كيف الخبر.. ولا وين نحنا بنهب ..؟ المتقاعدين المدنيين خلوهم يدخلوا في الشهر الثاني .. وعطوهم المشاهرة حقت الشهر اللي هب.. والمتقاعدين العسكريين والأمنيين في خس حالة .. لهم شهور وشهور والمشاهرة حقتهم عند جدتي .. والعسكريين والأمنيين اللي عادهم في الخدمه .. لهم من سته ومن سبعه شهور بلا مشاهرات .. ساعة يقولوا .. ماشي سيوله .. قلنا تمام .. وساعة يقولوا .. البيس عادها ماشي جت من روسية .. بتجي قريب.. قلنا طيب قريب .. والماي البيب مكضوم يبا ((تنخيس )) .. قلنا تمام .. والبترول الباخره عادها ماشي جت .. طيب متى بتجي.. الله يشلكم انتوا والباخرة ..؟ قالوا .. قريب.. قلنا انا لله وانا الية راجعون .. إن شاء الله قريب. . طيب لما متى نحنا بنجلس على هذي العيشة النكد ..؟ خمسين سنه من يوم ما قعت الثورة وآخرته أصبحنا نجري قفا المشاهرة من بريد لبريد .. وبعد الماي والبوز .. وبعد البترول.. وبعد المجاري .. داري هواك داري .. طيب ماله وكيف يا حكومة شرعيه ..؟ الناس قدهم في تنك التنك .. ماشي عاد يقع ندهفهم في (جحر الحمار) .. ماله بس استحوا قليل.. عيب عليكم .. بيت الأقل اصرفوا المشاهرات في وقتها .. كل شهر بشهرة .. وحلوا (( مشكلة البترول)) من أساسها ماشي شغل جزاع .. مش تقولوا .. ((مأرب معاكم)) طيب وين البترول حقها..؟ والماي قدنا والفين على ((ماي البحر)) .. يا ناس لا وين نحنا رايحين .. لا وين نحنا بنهب ..؟ كم بنجلس على هذا الحال ..؟ نرقعها من جمب تختزق من الجمب الثاني .. تبان ((حليمة رجعت لعادتها القديمة )) على قولة المثل حقنا .. بس ياجماعة الخير تقولوا .. وين هذي ((حليمة)) بنلاقيها..؟ أأسالكم بالله جاوبوا على سؤالي .. وأنتي وينش يا ((حليمة))..؟!
