الساعة تشير إلى منتصف الليل.. الهدوء يخيم على المكان مع ظلام شديد يخترقه ضوء مصباح شحن يكاد ان ينطفئ يرن هاتفي فجأة.. أحاول الوصول إليه قبل إنقطاع الإتصال فالشبكة رديئة جدا هذه الأيام في عدن وقد لا أستطيع معاودة الإتصال مجددا انظر إلى هاتفي للتأكد من هوية المتصل في هذا الوقت من الليل ولكن شئ غريب أراه أمامي.. فلا اسم ولا رقم يظهر للمتصل.. توجس قلبي من الإتصال فقررت عدم الإجابة عاود هاتفي الرنين مجددا وكانت الحالة مشابهه للاتصال السابق.. لا اسم او رقم يظهر للمتصل.. استجمعت قواي هذه المرة وقررت الإجابة انا: الوو.. مرحبا المتصل: الوو.. انا: اهلا.. من معي المتصل: مش مهم من أكون.. أنت من عدن؟! انا: كيف مش مهم من تكون.. لازم اعرف من انت وليش اتصلت المتصل: جاوبني اولا انت من عدن؟! انا: أيوة انا من عدن.. من معي؟! المتصل: معك شخص من عدن والآن بعيد عنها ويشتي يسألك عن أحوال المدينة وأهلها انا: يعني من المريخ تتكلم؟!! المتصل: من مكان زي كذا.. المهم ايش أحوال عدن وأهلها انا: الأحوال لا تسر عدو ولا صديق المتصل: كيف يعني؟! انا: يعني حياتنا عذاب في عذاب وواقعنا أليم المتصل: تكلم بتفصيل وبدون ألغاز انا: ايش الي تشتي تعرفه بالضبط المتصل: أخباركم كلها وحالكم من 2015 إلى الآن انا: قد قلت لك حياتنا عذاب في عذاب المتصل: فصلها لي حبة حبة انا: طيب عرفني على نفسك عشان اكلمك براحة مش تطلع في الأخير من أصحاب المداهمات الليلة.. مش ناقص مصائب زواجي بعد شهر وقليل مشتيش اختفي لي بسجن سري ولا مع جماعة "فحط بطقم" وادعس الي قدامك المتصل: ايش من مداهمات ليلية وسجون سرية.. انا اكلمك على عدن انا: وانا اكلمك على عدن كمان.. او مافيش معك واتس وفيسبوك تسمع أخبارنا المتصل: ياخي انا في مكان لا نت ولا كهرباء ولا يحزنون انا: شكلك من سجن سري تتكلم المتصل: لا لا .. اكلمك من مكان بعيد جدا وما يخطر على البال.. المهم لا تخاف وتكلم براحتك انا مقدر أنفع او أضر حد انا: والله يا طيب حالنا صعب ومعيشتنا ضنك وتعب المتصل: اولا أشرح لي ايش يحصل ومن يداهم في الليل ومن فين اجت السجون السرية انا: من 2015 وبعد التحرير من الحوثي مسكوا البلاد أصحابنا وقلنا الآن بيجي الخير وبترجع عدن زي "دبي" وأحسن ولكن حصل العكس المتصل: أيوة اكمل وبعدين.. انا: ولا قبلين.. عدن رجعت للأسوأ وكل طرف معه مليشيا في المدينة يسجن الي يشتي ويقتحم البيوت بأي وقت بدون حرمة لها ولا لأهلها المتصل: حتى ولو فيها عائلات؟!!! انا: يسحبوا عائلتك معك بدون سترة ولا حجاب ويجحببوهم قدام الناس وكأننا في فيلم مش بواقع المتصل: لا حول ولا قوة إلا بالله.. وفين الرجال ليش ما يتكلموا انا: الرجال في القبور شهداء ما باقي إلا أمثالي انا و محمد الحنشي حق بقبقة في الفيسبوك فقط المتصل: وفين الرئيس والتحالف والمقاومة ليش محد يوقف المليشيات هذه؟!! انا: الرئيس له قصة لنفسه.. عاده مستني حد يخارجه من شلة الانس الي بجنبه والتحالف يدور مصالحه الخاصة وقيادات المقاومة كل واحد يدور بعد تأمين مستقبل أولاده المتصل: اوجعت لي قلبي.. طيب محد يتكلم ويخرج للشوارع انا: اذا تكلمت بتحصل تهمة جاهزة انك من حزب الإصلاح وتدعم القاعدة وداعش وكمان عميل مزدوج للحوثيين وتشتغل مع الأمن القومي حق عفاش المتصل: خلاص ياخي.. كلمني عن الكهرباء أكيد صلحوها ومعد تطفي؟!! انا: الكهرباء احسن أيامها تلصي 4 ساعات وتطفي ساعتين هذا اذا ما خرجتش محطة الحسوة تتمشي.. مدري عن المنظومة بسبب فأر او غراب.. ولا خبارة خلص الوقود عاده جرعة لنفسه المتصل: اكمل عن باقي الأمور انا: ذي اليومين معنا الدولار والسعودي مرتفع وارتفعت معه الأسعار والشعب عايش بدون مرتبات يعني اقتربنا من الفقر والمجاعة وما باقي إلا قليل وأننا بداهوفه المتصل: ليش كمل وصل صرف الدولار والسعودي؟! انا: الدولار فوق 600 والسعودي فوق 160 ريال المتصل: ايش تقول.. على ايامي كان الدولار ب215 والسعودي 57 ريال انا: ياخي انت قديم.. ذا كان زمان أما الآن السعر فوق فوق المتصل: طيب كيف من الرواتب قلت ان الشعب بدون مرتبات.. كيف يعيشوا وليش محد يصرف لهم انا: الحكومة تتعذر بالموارد والتحالف يتفرج كأنه ميعرفناش المتصل: وكيف الناس تصلح؟! انا: بعضهم رسلوا عيالهم يقاتلوا مع التحالف في الساحل الغربي براتب الف سعودي والبعض يعاني كثير ووصلت ظروفه لمراحل صعبة وما نقدر نقول إلا حسبنا الله ونعم الوكيل في كل ظالم المتصل: حسبنا الله ونعم الوكيل.. طيب الدولة استعدتوها او حصلتم على ضمانات بتقرير مصير على الأقل بعد القضاء على الحوثة؟! انا: والله من ناحية استعادة الدولة قالوا لنا لازم نحرر الحديدة وشلوا أصحابنا هناك يقاتلوا وكل يوم ينزلوا منهم جنازات جاهزة للمقابر المتصل: يقاتلوا بدون ضمانات وعدن بهذا الوضع المأساوي.. فين عقول أصحابنا؟!! انا: قدنا اقول لك 1000 سعودي تنفع الناس بذي الظروف الصعبة المتصل: انا اتكلم عن القيادات انا: اهييه.. القيادات في فلكهم يسبحون.. الي مع التحالف رواتبهم آلاف السعودي وعيالهم في عاصمة دولة خليجية يعيشون.. أما الي مع الشرعية صرفتهم توصل شهريا وعيالهم من دولة إلى دولة يتمشون المتصل: والشعب يعيش في الضنك انا: الشعب له الله يا صاحبي.. عايشين عناد ولا خلاص قدنا نعيش نهاية الحياة المتصل: إن شاء الله بيجي الخير لا تيأس انا: من زمان ونحن نقول الخير واجي.. والدبة البترول كل يوم لها سعر المتصل: ليش كم سعرها اليوم انا: اليوم يبيعوها ب9500 في المحطات وكمان معدوم وتحصلها في السوق السوداء ب16 ألف المتصل: قدنا أيام الحرب نحصل الدبة البترول ب3700 واليوم طلعت ضعفين وعدن محررة انا: أيام الحرب كانت النفوس طيبة والرجال تحكمنا أما اليوم تغيرت النفوس والحكم بيد الأنذال المتصل: متأكد ان الي يحكموا جنوبيين مش من مكان ثاني انا: أيوة جنوبيين من أصحابنا وكلنا نعرفهم بس الفلوس تلعب بالرجال المتصل: حسافة على الرجال ما كان عشمنا بهم كذا.. خلاص شكلي طولت عليك انا: جزعت الوقت لي قد الكهرباء طافي.. بس ما عرفتنا عليك المتصل: مش مهم اسمي.. المهم إني من هذه المدينة الغالية ويهمني أمرها وضحيت في يوم ما باغلى ما أملك عشانها واليوم للأسف يتلذذ بتعذيبها الأنذال واللصوص.. استودع الله عدن وأهلها.. وانتهت المكالمة ولم أعرف من المتصل وأيضا الكهرباء لازالت طافي #جعفر_عاتق
