احتفلوا بعيد الحب على طريقتكم كل عيد حب وإنتم طيبين.. أكيد طبعا دلوقتي ناس كتير هتعترض وتعلّق على الموضوع وتقول.. عيد حب إيه هو إحنا فاضيين للكلام الفارغ ده.. شوف البلد في إيه ودول بيتكلّموا في إيه! عيد الحب أصلا حرااااام!! خلّونا نخرج بتفكيرنا بره موضوع الفالنتين (البدعة) -زي ما ناس كتير بتقول عنه- لكن إيه المشكلة إن كل زوج وزوجة يعملوا لنفسهم "عيد حب" خاص بهم يكون في يوم مميّز يمثّل ذكرى جميلة في علاقتهم؟ زي اليوم اللي اتخطبوا فيه أو اليوم اللي راح الزوج يتقدّم فيه لزوجته، أو حتى في عيد زواجهم، المهم إنه يكون يوم مميّز خاص بيكم إنتم علشان تحتفلوا فيه مع بعض، وتجدّدوا مشاعركم اللي بتضيع كل يوم في زحمة المواصلات والشغل والأولاد. ومش لازم نبقى صغيّرين في السن علشان نجتهد في إظهار مشاعرنا للطرف الآخر، يعني لو كنت/ي حتى في الخمسينيات أو الستينيات مش لازم تتكسف/ي أو تقول/ي أنا خلاص كبرت، حاولوا تتبسطوا وتسعدوا بعض في اليوم ده. في "عيد الحب" الخاص بيكم مش لازم تهادوا بعض بهدايا غالية، ممكن تقدّم/ي هدية بسيطة، لكن فيها فكرة وبتعبّر عن عمق مشاعرك لشريك حياتك. النهارده هنقدّم لكم بعض الأفكار المبتكرة والاقتصادية جدا للاحتفال بعيد الحب، واللي هتبيّن مدى حبك واهتمامك بشريك حياتك؛ لأنها كلها نابعة من القلب وصناعة منزلية 100%، وهيكون جميل أوي إنك لو عندك أطفال تطلب/ي مساعدتهم في التحضير للاحتفال. صابون الحب صابون الحب حاجة جديدة ممكن تعمليها بإيدك في البيت، وتقدري تستعيني بطرق عمل الصابون اللي قدّمتها خبيرة التجميل رانيا موسى على "قمر 14"، وتصبّي الصابون بعد كده في قوالب على شكل قلب، وتلزقي عليها كارت مكتوب فيه رسالة حب رقيقة. الفكرة دي مش بس للستات، لكن لو كنت -عزيزي الزوج- عندك معرفة في التعامل مع أدوات المطبخ تقدر تعملها وتفاجئ زوجتك بها، وصدّقني هي هتقدّر جدا المجهود اللي عملته علشانها، وهتكون عندها أغلى من أي هدية تانية، أمّا لو كنت من الأزواج اللي بالنسبة لهم سلق البيض أمر معجز؛ فالأفضل للأمان والسلامة إنك تشتري الصابون ده من أي محل بيبيع أدوات التجميل والعناية بالبشرة. رسالة على المرايا ممكن تعمل/ي مفاجأة حلوة وتكتب/ي على مراية غرفة النوم كلمات بسيطة للتعبير عن حبك لشريك حياتك، ومافيش مانع إنها تكون جملة فيها دعابة وخفة دم. وأكيد حركة زي دي هتأثّر على مزاجه/ا طول اليوم، وهتخلّيه/ا يبتسم كل ما يفتكرها مهما كانت الضغوط أو المشكلات اللي هتقابله/ا في شغله/ا. خريطة المحبة الفكرة دي ممكن تشرك/ي فيها أطفالك، وكل اللي عليك/ي إنك تختار/ي هدية مناسبة وتخفيها في مكان ما في البيت، وبعد كده ارسم/ي لوحات توجيهية بمساعدة الأطفال علشان تدلّ شريكك على مكان الهدية. وممكن تعلّق/ي اللوحات دي في أماكن متفرّقة من البيت، والأفضل إنها تكون صعبة ومحيّرة شوية، علشان تضيف/ي إثارة وتشويق للعبة. كلمة ووردة اشتري بوكيه ورد طبيعي -مش لازم يكون لونه أحمر على فكرة- المهم إنه يكون فيه أنواع الورود اللي شريك حياتك بيحبّها، وتكون ريحته حلوة جدا، واكتب/ي عليه رسالة بتقول: "هفضل أحبّك لغاية ما ريحة الورد ده تروح". وأكيد كده الرسالة هتكون وصلت من غير كلام كتير؛ لأن ريحة الورد عمرها ما هتروح. رسائل قصيرة اكتب/ي رسائل حب قصيرة في كروت صغيرة، وبعد كده حطّها في الأماكن اللي شريك حياتك بيتعامل معاها يوميا، زي جيب الجاكت أو الشنطة أو المحفظة أو تحت المخدة اللي بينام عليها. الأكلة المفضّلة الفكرة دي في الأغلب هتكون مقتصرة على الستات، لكن بالتأكيد لو الزوج بيعرف يطبخ هتكون لفتة جميلة أوي منه إنه يعمل الأكلة اللي بتحبها زوجته، ويا سلام بقى لو زيّنتم الأكل بطريقة حلوة وكتبتم عليه كلمة "بحبك" بالكاتشاب أو المايونيز أو أي صوص تاني هتستخدموه، وممكن تكتبوها بالفاكهة أو بصوص الشيكولاتة أو بالكريمة لو بتحضّروا طبق حلو. في النهاية.. عايزين نقول إنه مش مهم نوع أو سعر الهدية، المهم إنها تكون فعلا من قلبك، وأكيد لو عملتم كده؛ فاليوم ده هيضيف لحياتكم سعادة واستقرار وحب، وهيخلّيكم تقدروا تتجاوزوا مشكلات حياتكم ببساطة؛ لأن كل طرف بيجتهد لإسعاد الآخر. مستنيين تعليقاتكم على الموضوع.. ولو عندكم أفكار تانية للاحتفال شاركونا بها.. وكل سنة وكلكم طيبين،،،
