رجالة الفرزة الشقيانين اللى بيشيلوا برتقان من على السير والسير مابيعرفش أبوه ومابيهمدش بيحدف حدف يا خلق هوه مفيش عربية تحمل أنا حاسس أنى بشيل من عام نول بيطلبوا منى أكتب شعر عن الفرزة ورجالة الفرزة وكيف الفرزة تصنع الرجال طيب قولولى أكتب أمتى وأزاى وانا اللى كنت بسهر لقرب الفجر بقيت بنام دلوقتى قبل العيال وأتقلب زى الشوال رجالة الفرزة مفيش زيهم شايلين المصنع شيل على كتفهم وأنا اللى عمرى ما كنت أتخيل يوم لاقيت نفسى واحد منهم ربنا يبارك فيهم كلهم ببعت سلامى لمحمد أبو جمال ريس العمال اللى عليه حمل جبال اللى بيقولى استكفينا وبص وشوف الساعة كام والاستاذ على أدب وذوق وأحترام ببعتله أحلى تحية وأحلى سلام اللى فى وقت الزنقة بتلاقيه شغال وبيبقى واحد مننا ويمكن أكتر كمان اللى ساعات بيقولى أدخل وأنضم للعمال وسلامى للمعلم خليل الغنام والمؤذن شعبان اللى بيدن فى برج العرب وهو فى عزبة الشيخ شعبان وسلامى لكل الرجالة أيمن والسيد وماهر وهشام وحسين أفندى كعب الغزال ومحمود الصعيدى الشاب المؤدب المهذب اللى ما تقدرش تقول فيه تلت التلاتة كام والمعلم رفعت السوهاجى اللى لازم يلبس جلابيتين او تلاتة على بعضهم دى سلو البلد عندهم اومال هو هايبقى معلم ازاى بس ربنا يخليه للفرزة شيلها شيل أنا مش عارف من غيره كنا هانرحوا فين ومحمد بسيونى الجنتل مان والتهامى باشا اللى السيجارة عنده أهم حاجة هى وكباية الشاى وسلامى للحاج عبدالله اللى رجعنى ب2 كيلو برتقان وعصيته ومشيته اللى تهد جبال وشنبه اللى شبه شنب الريس متقال لا وبيضحك عليا ويقولى بكرة أنا بنفسى اللى هانقيلك البرتقان شكرا يا عمنا ربنا يخليك لنا وللبوابة كمان وسامح اللى ماشى بالحجارة اللى الرجولة عنده محتاجة امارة اللى لما بيشيل الصندوق بيحدف شمال ما تعرفش اذا ده مكر ولا تعب بصراحة حاله حال يكون فى عون ام العيال بس بجد رغم كل ده ابن حلال والمعلم ابراهيم الاسمرانى اللى كل ام اشوفه افتكر بتوع الصاعقة اللى دايما واقف على البرميل متفصل تفصيل المهم تكون الصحة عال وكمان عمى ابراهيم الفلاح المصرى الاصيل اللى زارع جناين ورد وفل وياسمين وزارع خضار وبصل وخص وفول وزى ما تقول قول اللى عايش هنا من سنين اللى بيزل كل جمعتين ويوسف القرادتى الطفل المعجزة اللى لو شافه القرد ينكسف على دمه ويقعد حزين وسلامى للريس ابراهيم عبده الطيب والامير اللى قلبه كبير االلى ملامحة بتفكرنى بعمر المختار وربنا يديم المحبة ويسترها على كل انسان وببعت سلامى كمان لمحمد عبد الفتاح اللى اشتغل سنين وفى غمضة عين راح فى ذنب مش ذنبه ولا ليه فيه بس هى جات كدا ومش عارف اقول اية واللى بيرزق ربنا وكلنا زى بعضنا وربنا يغنينا من فضله يا سعادة البيه الشاعر عبد الحميد بدوى دنيا الوطن