* * * * السلام عليكم أحب أولًا أشكر موقع« بص وطل» فعلا موقع محترم وربنا يجازيه عنا كل خير، أنا فتاه عندى 27 سنه حاسه انى تايهه فى الدنيا أو الدنيا جايه عليا بزياده قوى ، كان فى شاب بيحبنى قوى من الطفوله لحد ماوصلنا الجامعه وكتير حاول يعبر لى عن حبه ليا بس أنا كنت رافضه المبدأ تماما على أساس أنى كان بالنسبه لى الحب والارتباط فى السن ده عيب وحرام وكنت ببعد عن إنى أتعامل معاه بأى طريقة ، ومرة واحدة ومن غير مبرر بعدها بسنه المبدأ ده اتغير ومش قادره أعرف إيه السبب شاب زميل ليا فى الجامعه بدأ انه يتقرب منى شويه شويه فخلاني أهتم بيه وبكلامه المعسول وارتبطنا عاطفيا ببعض سنه وكان أهله عارفينى وناوين انهم يجوا لأهلى بعد لما نخلص الجامعه ولكن شاء القدر ان الموضوع مايتمش لانى اكتشفت فى شخصيته حاجات كتير مش عاجبتنى ، بعد الجامعة اتقدملى شخص تانى والمفروض انه كان برده بيحبنى بس اكتشفت انى لو اتزوجته هتجوز والدته مش هو متداخله فى كل شئ لدرجه انها لوهى اتكلمت هو يقعد مش يفتح بقه بنص كلمه يعنى من الآخر مالوش شخصية ، ونهيت الموضوع ، بعدها اعجب بى اخو صاحبتى وبرده جه يتقدملى بس جاى فاضى بمعنى ( عايز نتجوز بايجار جديد ،مفيش شبكه ، مفيش فلوس ) أهلى رافضوا تماما موضوع الايجار الجديد وادوله مهله سنه يجيب شقه ويجى تانى ومش هيرفضوه عدت سنه واتنين وانا كنت معاه وبحبه وكان نفسى يعمل حاجه بس للاسف معملش ولا حاجه وفى الاخر اتخلى عنى وبدأ يتحجج بالظروف وبدأ يختلق مشاكل إلا أننا سيبنا بعض تعبت بعدها نفسيا جدًا وقعدت على الحاله دى أكتر من سنة؛ لانه أكتر حد حبيته ومبقتش شايفه قدامى غيره، وافتكرت أنى ممكن أخرج من الحاله دى لو اتخطبت لكن للاسف طلعت غلطانه اتخطبت فعلًا وبدأت انى اقارن مع انى اقسم بالله قبل ماخد الخطوه دى عرفت الشخص اللى خطبنى ده انى مش مستعده حاليا انى ادخل فى ارتباط لكن هو اللى اصر اصرار غريب واتخطبنا ومكنتش مبسوطه تماما ، وبقى كل تصرف منه بيعمله غلط بكون مش طايقاه وعايزه انهى الموضوع دلوقتى قبل بكره الا انه بان قدامى وقدام اهلى انه شخص بخيل فى كذا موقف انا واهلى اختبرناه فيه وصليت استخاره علشان مش اظلمه وسالت ناس كتير بعد ماحكتلهم عن اسباب اللى مضيقانى منه الا ان الكل اجمع انى مش ينفع اكمل مع الشخص ده وربنا قدرنى انى اخد خطوه الانفصال ويرضينى بيها ربنا . حاسه ان العمر جرى بيا فى ثانيه وضيعت عمرى فى كلام فاضى ومع ناس غلط حاسه انى كبرت وفرصى قلت وخاصه انى مش بشتغل حاليا مش بشوف حد ولا حد بيشوفنى، وبقيت مافكرش دلوقتى غير فى اول شخص حبنى من الطفوله وبحس انه اكتر حد فعلا حبنى لانه كان حب صادق من القلب حب طفولى مش مزيف حاسه بالندم لانى ضيعته بس للاسف بعد فوات الاوان حاسه انى بجرى ورا اوهام لانه ممكن يكون اتجوز او خطب او نسينى اصلا انا تعبت اوى وحسه انى حظى غير موفق ابدا فى شريك حياتى. صديقتنا العزيزة أعلم أن الأمر مؤلم وأشعر بمدى الحزن الذي سيطر على قلبك، ولكن هذا قدر الله وعسى أن تكرهوا شيء وهو خير لكم، ولا تندمي على ما فاتك ولا تعيشي في الأوهام وتنتظري السراب. فتفكيرك في أول حب لك نابع من إحساسك باليأس ومحاولة إيجاد أي شعاع نور يضيء لك الطريق من جديد، ولكني أقول لك لو كان لك لكان حاضرك اليوم، فعيشي الواقع وحاولى التغلب على هذه المشاعر بالقرب من الله والدعاء المستمر، فيقول الله تبارك وتعالى ( وأيوب إذ نادى ربه أني مسني الضر وأنت أرحم الراحمين ، فاستجبنا له فكشفنا ما به من ضر وآتيناه أهله ومثلهم معهم رحمة من عندنا وذكرى للعابدين). وأود أن أذكرك بقول الرسول صلى الله عليه وسلم " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير" فحاولي ألا تقفي على الأمور المادية كثيرًا فمن يدري لعل سعادتك تكون مع شخص متوسط الحال يحافظ عليك ويحبك ويعوضك عن مامضى من عمرك. فلا تضيعي أحلى سنوات عمرك وأبحثي عن الأساس الذي تبني به حياة سعيدة مع زوج صالح . وحاولي أن تشغلي وقت فراغك فيما يفيد ، أبحثي عن عمل يناسبك أو أدرسي شيء جديد، وفوضي أمرك إلى الله هو أعلم بحالك ، وأدعو الله أن يرزقك بالخير. مواضيع متعلقة بص وطل