يا نيل يا جىّ محمّل الأحلام يا كلمتين فى شفايف الأيتام حراق طلوع الفجر ع الظالم مكسور وضهرى هينصلب قدّام يا فرحه نايمه ويا وطن نوّام هج اليمام من قبضة المارد يا قلب شارد فوق شواشى الريح وقع الشراع واتمكن (النحانيح) هرب الضريح من جتة الوالى يا باب يا عالى الاحتلال قرّب جهّز جيوشك وابتدى وجرّب الضلمه طالعه تدوس فيران الهيش والغربه توهه ف حضرة الدراويش يا شيش موارب ع الأراضى البور يا قصور بترقص فوق عضام الدور هاجت طيور الرب ع القبه قاس الحمام الأرض بالنبّه قلبى استخبى ف جبة السياف ما اعرفش معنى حنابله أو أحناف أعرف رغيفى الحاف وأمعائى أعرف أكون لك فى الشتا فدائى وأعرف أكون سقّا ف ليالى الصيف يا لحظة التخاريف يا ساعة زيف شكل الخريف مش عارف السكّه يا سكّه باب القلب ع الأوجاع شبعت كلابك والغلابه جياع طلع الصراع من روح محبينك احتج تينك واتسرق دينك وسابونا نلعن فيكى ونهينك يا مقعّدانى ف آخر القاعه ومقعّده الهلاهيل على يمينك دقت عروق الوقت فى الساعه واتهد عرشك وانحنى جبينك يا قلب شارى وأرض بيّاعه هو إحنا طينك واللا مش طينك؟ حالف يمينك واليمين يلزم لاطلع وأسقّف وأجرى وأتحزّم وأعزم ولاد الحاره والأتباع ابنك وسبع سباع ومش خايف وإن كنت مش شايف هاقول شايف وأفضح كلابك... والكلاب أنواع
