انته ذاكر عوض لعنة –الله يرحمه- لما قال: أولها منقه وآخرها حنقه؟ أكيد ذاكر, الكلام ذا قاله بداية الوحدة لما كان ثمانية بكوت منقا بعشرين شلن, كنا نشتري بالكياس ونصبح نشرب ونبيت نشرب. وخوتك ما قصروا يا بو رزق خلوها كب علينا, حتى الدكاكين المدخوشة في المطاريق ملوها منقا. المهم هم ما قصروا ونحن ما قصرنا. لكن يا بو رزق نحن معذورين وأنته تذكر ذاك الوقت دكاكيننا ما فيها إلا فاصوليا وطماطم والحجار-البطاريات- وانته تعرف قصة الحجار, والكيك حق اليهري بس, كنا مغمضين. لا يابو كرامة ماكنا مغمضين كنا مدقدقين من أصحاب غبشة, إللي يفررون بالنوم من عيونك لما يمروا تحت دارك. يا بو رزق ياخوي ذاك وقت وراح, وراح معه صحابه وأهله, قل لي ويش الفكة في الغبقة اللي نحن فيها ذي. لما خرجت بريطانيا يابو كرامة قلنا والله افتكينا من الغبقة وجات الفكة. نعم والله يابورزق .!! ولكن الفكة وقعت غبقة يابو كرامة, وغبقة بنت كلب عادها, دقدقونا عشرين سنة, ونحن نصبح باسم الشعب ونبيت باسم الشعب. المهم يابو كرامة جابها ربك على رووسهم وعاقبة الظالمين تقع ولو عمروا ما عمرّوا, جاء لبوهم شي كما الجراد ضيعهم ولخبطهم وخبطهم خبيط. وفرحنا يابو كرامة وقلنا افتكينا من الغبقة وجات الفكة. والظاهر أن الفكة طلعت بو الغبقات يابو كرامة, جولنا قوم جاجوج وماجوج, لا خلوا شِعب ولا وادي ولا سوط ولا جزيرة ولا مطراق ولادخش. حتى العشش والخريب سكنوا فيها. ودقدقونا عشرين سنة ثانية, كما جماعتنا, نصبح باسم الوحدة ونبيت باسم الوحدة, وكياسنا خلية يابو كرامة. الصبر يابورزق الجماعة مروحين شلوا قشّهم وقرابيعهم وجات الفكة . يابو كرامة وايش من فكة لبوها راعة. الجماعة رجعوا من جديد. جماعة من يابو رزق؟ جماعة بريطانيا, ماهم استلموها من بريطانيا وسلموها لأهل الشمال وذا الحين بيستلموها منهم. وبيرجع الدق والدقيق يابو كرامة. يابو رزق هلل واذكر ربك, الجماعة تابوا وعقلوا وقعوا صماصيم. صماصيم واه يابوكرامة ما تشوف اللي بينهم, تقول حمار ميت, وعادهم الا برع السدة قدهم يطّاحنون كيه لادخلوا. وجلسوا ع الكرسي حقهم اللي تركوه, الله يستر يابوكرامة. وما دريت بآخر فسيسة لهم؟ طلعوا مع السيسي مصاص الدماء, وخرجوا في مظاهرات يشجعونه؟. يعني الجماعة من بشار لا السيسي, الظاهر أن رووسهم حنت. وتقولي صماصيم يابو كرامة, ولا تخاف ولا تفزع. يابورزق استهدي بالله. يابوكرامة ياخوي راحت الغبقة رقم ثلاثة وجات الغبقات والبلاوي كلها, وذي المرة بنكهة السيسي وبشار. ونحن كياسنا خلية وثماتنا مفتوحة يابوكرامة..!! ما شي فكة يابو كرامة إلا أن حضرموت تفتك من القوم ذي. ونسكّن منهم ومن بلاويهم ومشاكلهم. السماء مغيمة يابوكرامة والله يستر من الغبقة اللي جايه لحضرموت.
