ما باليد حيلة يابوكرامة, الدار مليانة سقل وبغوا قوت وكسى. وخوهم الكبير قده رجال ماشاء الله عليه ويبغى الزواج. وله ثلاث سنوات من يوم ما تخرج من الجامعة وهو جالس بلا شغل. الله يصلح الحال يابورزق, وايش من شغل بيحصله ولدك في السعودية. يا بنشر أو في ورشة سيارات أو مستودع. هذا إذا وقع حظه زين وحصّل له كفيل طيب. وإذا سلم من الكفيل ما بيسلم من التجار الحضارم في السعودية وجشعهم, ما يرحمون حد يابورزق, وعنترتهم كلها على عيالهم الحضارم, والسعودي ما يقدرون يكلمونه أبدا, يدوام يومين في السبوع وباقي الأيام غايب وراتبه ماشي روووون, والحضرمي ياويل بوه لتأخر ساعو وحده. ماشي حل إلا هذا يابوكرامة, وخله يصرقع مع الناس و( ياللي صبرتي سنة ما ضرّتش العشر). بدل الجلسة هنا من دكة لا دكة. تدري يابورزق أن هذه المشكلة إلى الآن والدولة ما حرّكت فيها خوصة, طاقات حضرمية وكوادر ومبدعين هاجروا للخليج ويشتغلون أشغال لا تتناسب مع قدراتهم. وأصحاب التخصصات المهمة والمطلوبة, أغرتهم الدول الأخرى ليعملوا فيها, وهم معذورين يابورزق, لأنهم وجدوا بيئة تناسب مؤهلاتهم وتوفر لهم الإمكانيات وتنمي إبداعهم وتقدّر قدراتهم. الدولة هي بو المصايب يابوكرامة والبلى كل البلى منها قليلة الأصل, لا في بوها خير ولا في رجلها. أذكر قبل سنوات يابوكرامة أن الطالب اللي جاب الأول على دفعته في جامعة حضرموت ما قبلوه معيد فيها, وشلوا الثاني الذي بعده, وقدّم في السنة الثانية وجاب الأول في اختبار لجنة القبول وعطوه عدن, لأنه مسكين (ذنوب) ما معه ( واووووو), والثاني أبوه ظهره كما السترة (عرررررريض), فقط هذا هو المعيار. وطالب آخر من المتفوقين يحمل تخصص مهم ومطلوب, تعرف يابوكرامة خذ له كم سنة يشتغل في مقهاية يبيع شاهي في الشرج, وماهو عيب الشغل, لكن ما هو ذا مكانه, ولو لا بعض عقال حارته الذين تدخلوا وسعوا له كان خم في المقهاية. وبازيدك عادني يابو كرامة, الطلاب الشماليين الذين يدرسون في الخارج على حساب الدولة مش مثل عيالنا, بعضهم قد خلّص حقه الابتعاث وعاده جالس يمدد ومستحقاته ماشية ولا يعترضها شيء بعكس الحضارم والجنوبيين. وكم وكم يابوكرامة من قصص لشباب مبدعين ما وجدوا من يرعاهم وآخرهم المرحوم باجعالة الله يرحمه, لما مات قام المنافقون يبكون عليه ووعدوا بيخلدون ذكراه, وبيسوون له وبيعملون,, وعادني باذكرك يابو كرامة, كله كلام إعلام واستعراض وكسب موقف فقط. وفي المقابل شف عيال المسؤولين يابوكرامة وين هم؟؟ حد في الأردن وحد في ماليزيا وحد في مصر يدرسون على حساب الدولة, والخايب الرذلة منهم وظفوه بعد الثانوية مباشرة, وهو كما الطبل لا يعرف كوعه من بوعه. شكلك مليان مررررة يابورزق ؟؟ إلّا ونطيّر من الضبح يابوكرامة, سمعت آخر نكتة..!! مسؤول في سلطتنا المحلية متزوج اثنتين وظفهن كلهن, وسمعت أن الأخيرة –الثانية- وظفها ومعها ابتدائي, وعيالنا الجامعيين على الدكك. نصيف الله في اللي يأكلون حقوقنا وحقوق أولادنا يابوكرامة. وين بيروحوا يابورزق, خلهم يأكلوا وينهبوا ويسرقوا, وكم بتعيشي يادودة أيامك في الدنيا معدودة, عاده رب فوق العرب. (فلا تحسبن الله غافلا عما يعمل الظالمون إنما يؤخرهم ليوم تشخص فيه الأبصار ) صدق الله العظيم.
