من الأخير ... اجزعوا ملح.... لن نقاتل نيابة عن أحد دون شروط!! طالعين علينا هذه الأيام يا نصائح ويا نظريات "ياجنوبيين الحوثي لن يستثني أحد وكأنه نحنا جالسين نتحارب في الضالع منذ 7 سنوات مع جيش موزنبيق" وبدون غطاء جوي ولا ضربة ومحققين نصر. وحاوشين بالليل يهنجموا بنفس العبارات من 6 سنين دون ملل: "مأرب رجالها جبال" ولن تسقط.. والعصر قبل القات نفس الناس يقول لك "لو سقطت مأرب باتسقط..المجحفة.. ويرامس. ولكمة الدوكي" طيب واصل.
التحالف قصف لهم في معركة العبدية فقط بأكثر من 800غارة يعني يقصف بالمتر قالوا القصف الجوي ما ينفعش ومش مؤثر نبا أباتشي ونسوا انهم جالسين ينعوا 3 سنين ومسويين مخدرة بلا طربال على ضربة يتيمة لجيش خيبر في العلم قالوا لولاها لكنا في بيت المقدس. ولا كأنهم هربوا من عدن ظهر أحمر ومعاهم 8 ألوية ودبابات ومدافع ومليارات.
نحنا أغبياء وانتم أذكى خلق الله وهذه مصيبتكم من زمان "الذكاء الزائد". وانتم متأكدين ودوناك الناس عارفين إن القصة لا هي قصة دعم ولا عتاد ولا رصاص مكمل؛ القصة مرجلة وإيمان وهذان التطبيقان محذوفان من أجهزة الشرعية من المصنع.
ناقصين يقولوا تعالوا ياجنوبيين حاربوا لنا بمأرب ولو انتصرتم صيحوا لنا نجي نحكم !!!!. ناس عجيبة غريبة !!!! . لا جبركم وعلى قولة المرحوم كرعون قهري على الرجولة.
وما بانجلسش اصلا نكارح سنين ايش تسوي جيوشكم في سيئون وشقرة وشبوة سواء كانت تطبخ أو تحفّر أو تلعب فتاتير او تهكب فراصيص كلنا عارفين وانته عارف ودوناك الناس عارفين قبلنا؛ بكيفكم حركوها طربلوها خزنوها.. ماشي حولنا!!!
ضيعتم التحالف وتأييد دولي ودعم غير مسبوق بسفاسف الأمور وشغلتم أنفسكم بتوافه القضايا ويا هاشتاجات ويا سبوب ويا مداخلات ويا زواجات ويا مسرحيات على مرمى حجر من متارس الحوثيين. ومكنوها "معنا فلان من تركيا والناشطة العلانية من القاهرة وينضم الينا من برلين فلتان" وصابرين لنا نحارب لهم وهو يرجع هو صهيرته يحكم.
