الزوجة: مالك تتقشقش! فين رايح؟؟ الزوج : باروح اشوف المباراة وبرجع. الزوجة : طيب اجلس بالبيت وبنتفرجِه سوا. الزوج : يا ألله خراجك .. طيب بجلس معك يا "عوضين" وبشوف نهايتِه.
الزوجة : وع ... ايش ذا، مالهم اللاعبين يتفلوا كتير، أيش فيبهم وحام. الزوج : يا رب تصبِرنا .. يتفلوا من التعب. الزوجة : وعصام الشوافي كم يجلس يتحفظ أسماء اللاعبين؟ وبعدين أيش دا الصياح؟ أيش ميشحِّبش؟ الزوج : قدِه شغلتُه يا حُرمة .. خلينا نتابع المباراة أنا فدى قلبك. الزوجة : طيب كيف في لاعب أسود في الأرجنتين , حتى الأرجنتين فيبِه أخدام؟ الزوج : أيوة فيبِه. الزوجة : منو قال لك ... مفيبيش، شكلك كُنتا بليد بالجغرافيا. الزوج : آوه، كنت بليد، وبليد من قلبي كمان .. صح، مفيبيش اخدام. الزوجة : تهبلي على عقلي. أيش؟؟ الزوج : الله يسامحك .. الزوجة : بس تعرِف .. البوت الاحمر مش لايق على الجرم الازرق. دوق اللاعبين رِمّة! الزوج : آوه. الزوجة : كم يهبوا للمعلق مشاهرة على كل مباراة؟ الزوج : ألفين دولار. الزوجة : طيب والمذيع حقنا كم يهبولُو؟ الزوج : يهبولُو حق العشاء وحق المواصلات الّلي يروح فيبه البيت يجلس مع زوجتو، وحق باكت بَلْمَن عشان يبعّد الضيق. الزوجة : جووووووووووووووووووووول الزوج : لا يا هبلى .. ذا تسَلُل. الزوجة : تسلل! الزوج : لا ... جوووووووووول. الزوجة: تسوي لي بالعاني .. طيب. الزوج: أقلّك صلي ع النبي واجلسي سكتة. الزوجة تضحك: هههاااااااااايييي . الزوج: مالك .. أيش جرى لك. الزوجة: في واحد لابس جرم اسود من بداية المباراة وهو يجري، بس ولا واحد شات لُه الكُبَّة. الزوج: ذا الحكم .. لكن بس ... وانا فدى قراميم قلبك خلينا اتابع المباراة. الزوجة : يستوي انهم يبدلوا الحكم والمباراة تمشي؟ الزوج : كيف؟ الزوجة : في واحد من قُبيل وهو يجري عند الخط وماسك علم .. يأشر لهم يشتي يدخل .. ومرضيوش يدخلوه. الزوج : ذا حكم الراية اللي يضبط التسلل يعني. الزوجة: أيش دا ... ليش يكتبوا 3-4 .. مَسْرع أجت دي الاجوال كُلِّه. الزوج: ذي الركنيات لكل فريق ايش متقريش ... متشوفيش. لكن بس .. لكن بس. الزوجة : أقوم اسوي لك عشاء؟ الزوج : آوة. الزوجة : عشاء خفيف ولا كيف؟ الزوج : لا مندي .. قدو عشا كل يوم فاصولية وروتي.. عادك خفيف والّا كيف. الزوجة : طيب آخر سؤال قبل ما أقوم أصلح العشاء .. منو منهم ميسي. الزوج : ولا واحد. الزوجة : ليش؟ مش ميسي لاعب كُبَّة فنّان؟ ليش منزَّلُنّوش؟ الزوج : انتحر الزوجة : أو أو أو ... بالله من صدق , لييش؟ الزوج : كان يتابع كُبَّة مع زوجتو وانتحر .. الله يرحمو كان طيب ويسمع كلامِه. الزوجة : اوووووووووف , انتوا كدا دايماً يالرجال محّد يعرف يجلس معاكم الّا ونكدتوا عليه .. الجلسة معاكم تُحرَم.
