هو وهي يوميات زوجين من عدن يسطرها لصحيفة "عدن الغد" الورقية الزميل المبدع "مروان مفرق وتنشر كحلقات بصفحة بالعدني من صحيفة "عدن الغد" الأسبوعية وفي كل حلقة يستعرض مفرق واقعة جديدة من حياة هذين الزوجين في قالب درامي يتسم الواقعية والطرافة .
يعيد "عدن الغد" بناء على طلب الكثير من قراء الصحيفة الورقية نشر هذه الحلقات تباعا
هي : مالك يارجال .. من اول واني جالسة اصيحلك لما ورمت حنجرتي .. ايش اصنج ؟! هو : مالك .. ايش في معك ؟ هي : تعال شوف القصبه ماله .. اشتي اصبن التياب .. قدهم فوق المصبنه سع الجبل هو : طيب صبني .. من مسكك هي : اني ناقصه غباوه !! ايش متفهمش ؟ اقولك القصبه مدريش ماله متمشيش .. بأيش تشتيني اصبن ؟ هو : بالمصبنه طبعا هي : ياعيني .. صناج وغباء ممزوجين بخفة دم هو : طيب خلاص .. باشوف ماله هي : هيا امشي هو : اوووه .. لا فين عادنا افتح الكاك !! من اول وهو يدور .. يمكن المي مقفل هي : لا مش مقفل القصب الباقين يمشي فيبهم المي هو : هاا .. بس بيكون الكاك لوس والا فيبه حاجه هي : هيا اقفز جيب واحد يصلحه هو : مالك ! ليش اجيب واحد .. وانا فين رحت هي : ليش انته تعرف تصلح دي الحاجات ؟ هو : ابب .. انا اعرف اصلح كل حاجة هي : هيا وريني هو : مديلي البانه من الدرج هي : طيب .. امسك البانه هو : شكرا .. شوفي انا الان بفك الكاك وباشوف ماله هي : بتفكه ساني ؟ هو : ايوه هي : ماشاء الله عليك .. من بدايته كده هو : ايش في ؟ هي : قفل اول مرة الاستوب كاك الرئيسي عشان ميفتكش المي لافوقنا يا ابو العريف هو : هااا .. صح كلامك.. راحت عليا دي .. وهذا الاستوب كاك الرئيسي وقفلته .. الان بفك الكاك .. اوووه ماله عرز ولا رضلى يفتك هي : ويه يا ابو العريف هو : مالك هي : الكاك ينفتح للجهه التانية .. انته الان تزيد تقفلة مرة واحد هو : اووه صح .. راحت عليا هي : هيا فكه يامليح هو : شوفي الشغل اللي من صدق دحين .. اوووووه المي خرج هي : مالك ليش ماقفلت الكاك الرئيسي هو : قدنا قفلتة قدامك هي : شكلك فتحتة زايد يامليح هو : اسمعي .. كم رقم السباك ؟؟