كنت من يومين.. في سوق الشيخ عثمان .. مع الوقت العصر.. بعد ان صليت .. قلت باشل الفطور اليوم من الشيخ عثمان .. وأنا داخل السوق .. أستوقفني واحد يبان من هيئته إنه من حقون زمان .. قل لي : أنته الصحفي عبدان دهيس اللي تكتب في الجرايد ..؟ قلت له .. هوه بكله .. قال شوف نحنا تعجبنا كتاباتك .. من زمان.. أنته مع قضايا المواطنين .. وعادك في (صوت العمال ).. قلت له : مشكور.. أي خدمة ..؟ قال :تصدق يابن دهيس .. خرجت من البيت ومعاي (ألفين ريال) .. قلت بنشتري فطور اليوم من السوق .. يعني .. باجيه وسمبوسه ولحوح وحبحب .. الحرمه قالت : لا زادت بيس .. جيب لنا عصير التوت وجبن بلدي .. قلت له طيب وبعدين .ز؟ قال : حصلت الحبه السمبوسه بخمسين ريال والباجيه كما ها.. واللحوح ..القرص الواحد بميه .. والحبحب الحبه بالف وخمسميه .. المهم كملت (الألفين ) .. وعادني تسلفت فوقها من (المدكن ) صاحبي .. (ألفين ريال).. والله اني مقهور على أيام زمان .. كانت الحبه السمبوسه (ببستين9.. والحبحب يارخصاه ويابلاشاه .. واللحوح يعطوك أياه الجيران بلاش .. وين هب هاذوك الزمان .. ياقهري وياباطلي .. آح .. آح .. الله يجازي من كان السبب ..؟! بالله عليكم الحبه السمبوسه بخمسين ريال – يعني على بيسنا حقت زمان الدنانير .. تساوي ما يقرب من (ثنين دينار ).. شوه هذا الكلام .. وشوه هذا الباطل .. وين عادكم تبونا نهب .. تنكا بلاد النامس . حتى الصومال ماشي بتقبلنا .. كيف تشوف يابن دهيس .. نباك تكتب لنا على هذا الغلا .. لمشاهره (باوله وبيستين) .. وإكراميه رمضان عادها عند (جدتي عيشه ) .. أنته مع قضايا المواطنين ومعروف عنك من ايام (صوت العمال) .. إنك صحفي شجاع ماتخاف أيام ماكان الحزب حزب .. قلت له : البلاد ياصاحبي كلها في (جحر الحمار) .. شوه نكتب .. وضوه نخلي .. المور كلها مخربطه خرباط.. الحبل مع النابل .. نخلي .. ولا تدري وين راسك من رجولك .. خليها بس على الرحمن .. المشاهره أصبحت ماتسقيك حتى (ماي) .. نصيحتي خلي (حرمتك ) من باكر تصلح.. باجيه وسمبوسه ولحوح .. داخل البيت .. خلاص أترك السوق وحالها .. قال .. والله كلامك صدق .. البيس بتنفعنا في حاجه ثاني .. طيب يا (بن دهيس ).. تقول متى بتكمل الحرب..؟ قلت له : شوفك ذلحين دخلت داخل .. قدك في الباجيه والسمبوسه وللحوح .. رجعت لا السياسه .. شوه لجدات جداتك من دخل في هذا الباب .. تكمل الحرب وإلا ريت أبوها لا كملت عسى الله تجلس (مية سنه) .. بس نحنا نشوف ونتسمع .. فهمتني ..؟ يه فهمتك .. خلاص حبيبي خلينا في اللحوح والسمبوسه .. وعادهم لاعطونا مشاهره ثاني قبل العيد .. كل شيء بيكون تمام .. خلاص باقي قليل من أذان المغرب والحرمه جالسه لي عند الباب .. (فطورك ياصايم) ..!