صباح الحقيني يا خالة نادية .. الحقوني يا ناس من هذا الرجال اللي كملني ضرب وشمات..
نادية شجن : خير اللهم أجعله خير، أيش في يا صباح؟ .. أيش حصل يا مهيوب؟
مهيوب : اشهدي يا خالة نادية، راجعي دي الحرمة .. تهرب من البيت وتجري مليانت الشارع، تشتي تسويلي فضايح بالحافة، ماتستحيش على نفسه.
صباح : اشهدي عله يا خالة، جالس يضربني ويشمتبي من صبح ربي، اني خلاص تعبت منه ومن حياتي معه..
نادية شجن : أووو .. لماهو يمد يده؟ .. تعالي حبيبتي .. أني نصيرة المرأة .. ونصيرة الدفاع عن حقوق المرأة.. وأنت أتعود من الشيطان الدنيا مغارب ما فيبناش طافه .. أيش في يا صباح يا بنتي؟ أيش حصل؟
صباح : كل هذا الضرب والشمات نعم ليش وليش مارحتش الشغل اليوم..
مهيوب : وتقوليها عادي كدا وكأنك ماغلطتيش.
صباح : اشهدي يا خالة .. بالله اني غلطانة؟ .. الجاهل فيبه حمى من أمس الليل .. و أني أقوله يا رجال قوم بنودي الجاهل مستوصف .. بنشوف ماله .. وهو وجالس مخزن يتفرج برشلونة ولا زاهد بحاجة ..
نادية شجن : أخص عليك رجال.
مهيوب : كمان ماتشتيناش اخزن واتفرج على البرشا .. ايش من حرمة انتي؟ قدنا صابر على النكد اللي عايشين فيبه كمان ماتشتيناش انفه على نفسي..
نادية شجن : عيب عليك يا مهيوب البنت مش مقصرة معك، قده مهدود حيله برع وداخل حرام عليك .. سهران طول الليل وراقد طول النهار .. والبنت تصرف عليك وعلى الجاهل..
مهيوب : يا خالة نادية قدك دارية انحنا نضرب القملة بصميل وصباح شغله باليومية .. يعني اليوم بنجلس بلا فلوس؟
نادية شجن : وربي انك مصلب ..
صباح : اني دارية كل هذي اللهبة ليش.. عشان حق القات ... هادي اليومتين دوري اسباني والرجال يشتي يخزن ويفتهن..
نادية شجن : لكن يجعلك كبة مليانت قلبك .. لا قده قلبك على الفلوس كنت بتقوم من صبح ربي تبنن الجاهل وتمارضه على بال ما البنت تروح شغله.. ولو فيبك خير بتقوم تشوف لك شغل وإلا مشغلة.
مهيوب : ايش تشتينا اسوي يا خالة نادية .. اتخرجت لي 17 سنة وما حصلتش شغل، بالله أيش أسوي؟ .. أسرق .. أنهب .. يرضيك يا خالة؟
نادية شجن : بس لا عاد تسرقش ولا تنهب ولا تقفز بيت الجيران .. قوم اتفحفح واتلحلح ودورلك على شغل .. لو جلس كل واحد منكم مراعي لوزارة العمل وربي بتموتو جوع ..
مهيوب : أيش تتهابلو ؟؟ من فين في شغل داخل هذي البلاد ؟؟ ..
نادية شجن : قوم اشتغل اي شي يا مهيوب .... شوفلك شغل عند أي شحاري .. بيع بطاط شبس .. بيع لانجوس ولا شوربيت .. ياشيخ حتى اشتغل حمال ولا تجلس كدا بلا مهرة وتمد يدك لزوجتك..
مهيوب : أنا ابيع لانجوس وشوربيت؟؟ .. أنا أشتغل حمال؟؟.. وربي انك ماتستحيش يا خالة نادية .. أنا خريج هندسة على سن ورمح..
نادية شجن : أو .. يجعلك رمح يقطع أمغالك على مُغل مُغل.. كيف مستحملة هذا الرجال اني اشتي اعرف؟ ..اني بربع ساعة كملني كبايد كيف انتي...
صباح : النصيب يا خالة .. ماسمعتش كلام أمي و أبي لما قالولي مابينفعكش .. كنت هبله وعمية قلت احبه..
مهيوب : اسمعي دحين بلا هدرة فاضي .. انت ما ترتاحيش الا لما انتعك من شعر راسك وأصنجك كفين يرجعولك عقلك..
نادية شجن : أووووو .. مله فك للبنت يجعلك كسر بيدك .. البنت بيخرج شعره بيدك .. مله استحي مايقعش الشمات قدام الناس .. ربي يخزيك يا قليل الأصل.
صباح : لا تتعبيش نفسك يا خالة .. ها يا مهيوب .. فلوس الخضرة والغذاء حق بكرة .. روح خزنبه .. والغذاء بكره يدبره ربنا..
مهيوب : هاتي ، كذا انتو الحريم الي مايزرش عليكم تدعسونه .. حريم ماتجوش الا بالعين الحمرا..
نادية شجن : أووو أووو أووو أووووو ..العين الحمرا .. لكن يجعلك دوش يدعسك ومن هنا لجهنم الحمرا ساني.. معلش يابنتي .. أصبري ايش بتعملي والصابر معوض..
صباح : ايش بسوي ياخالة قده مافيش معي الا الصبر..
نادية شجن : لكن أمره لله زوجك دا .. ربنا يهديهو عشانك وعشان ابنك .. ماكدبش اللي قال يد عويله ولسان طويله..
