رامي : جزعت الصواريخ والويد. فهمي : والأيش ؟؟ رامي : الويد يا أبوشي .. الحشيش.. فهمي : اللللييييه .. الليد ملموخ للطرف .. قد قلبنا أبوشي وأنا الخيبه حق الحافة .. يا ابني أنا مافيش معيا صواريخ ولا حشيش .. رامي : لاااا إنت كثرت به يا مان .. لا حشيش ولا صواريخ؟؟ أنا أشتي أطيييير .. كيف باطير بلا صاروخ؟؟ فهمي : طير بفحل .. إسمعنا يا ابني، أنا صيدلي محترم مش تاجر مخدرات .. أنا جبتلك الحبوب اللي بتعدلك مزاجك وبتخليك تطير .. تذكرة على بياض تشلك هيلا بيلا لا حيت ما تشتي. رامي : متأكد إن الحبوب دي بتطيرنا؟ فهمي : يا ابني شل سامانك واتحرك بلا فحس .. شوفا دحين باتجي الشرطة بحنبلك عندهم.. رامي : شرطة؟؟ فين الشرطة ؟؟ خلاص شل الفلوس وأنا باطيييير .. فهمي : كدا .. شعب أعوج مايجيش إلا بالبهزاز .. عاده يشتي يطير .. وربي إنه ملموخ .. إسمعو، أنا كمان باطيرلي قبل ماتخرج عجوز الويل .. مابخلصش من لسانه. نادية شجن : عجوز الويل سمعت وشافت وباتشمتبك بالحافة شمات الدنيا والآخرة. فهمي : يا حافظ .. نادية شجن : يا حافظ يا حفيظ من البحر لما يفيض .. والكيل فاض منك يا فهمي. فهمي : مالك يا شجن .. ايش تشتي مني؟؟.. نادية شجن : كدا عيني عينك تبيع مخدرات للشبيله .. وبعز الظهر ما عاد فيش قليل حيا.. فهمي : أص سكته .. مالك يا عجوزة يا مخرفة .. أيش من مخدرات عيب عليك.. انا ابيع لهم مهدئات.. نادية شجن : بتزيد عليا يا فهمي؟ .. أني شعر راسي شيب بدي الحافة .. حد قالك هبله .. مافهمش .. جابوني من الجلبه؟؟ .. الحال من بعضه مهدئ وإلا مخدر .. يشربنه مع القات لما يستطلو .. ليش ماشوفهمش خارجين من الصيدلية حقك كل يوم وهم محملين المهدئات على قولتك .. ويجلسو تحت البيت هنا بالركن يخزنو ويهبوله مهدئات لما يطلعو أصحاب راسهم .. خربت عيال الحافة يا فهمي لكن ربي يخربك ويعجل بزوالك.. فهمي : بس بلا مزايدة حقك يا شجن .. عيال الحافة قدهم مسروفين خلقه .. أنا عادنا اقدملهم خدمة إنسانية. نادية شجن : خدمه إنسانية ؟؟ فهمي : أيوة .. إنسانية ونص .. أنا ابيع لهم المهدئات عشان يهدنو .. عشان ينسو .. مش احسن لهم ينسطلو ولا يجلس الواحد منهم يلعن نفسه كل دقيقة كل ما يذكر انه بلا شغل .. بلا زواج.. بلا أكل .. بلا مي .. بلا كهرباء.. بلا مستقبل .. بلا أمل .. أنا على فكرة بالنسبة لهم ملاك الرحمة.. نادية شجن : ملاك ؟؟ أو لكن ربي بايزيلك من عنده.. مله دبشتوني .. ايش من زمن اغبر دا؟؟ أول واحد يقولي السرقة حلال وجيزي جيز الناس والتاني يقولي المخدرات رحمة .. لكن العيب مش عليك العيب اللي يخلوك تبيع دي الحاجات بلا روشته وبلا تصريح .. لكن ايش بنقول لا في رقابة ولا في ضابط يضبطكم.. فهمي : أيووووة على قولتك مافيش ضابط يضبطنا يا شجن .. بح .. الدنيا فالتو.. و أنا حر أسوي اللي يعجبنا.. نادية شجن : بالله عليك كيف تسخي بعيال حافتك تسويبهم كدا .. أيش من بني آدم إنت.. فهمي : اووووه ..ضبحتيبي يا شيخة .. إسمعي أنا مروح .. بسيبلك الشارع بكله عشان تبردي.. لكن ان شاء الله تسقطي وتكتسر رجلك عشان تبطلي جلسة الطاقة دي.. رحمتك يارب.. نادية شجن : الله أكبر .. كُع بعينك .. إنشاء الله اللي يكرهوني... أو شوفوا كيف يتدعويبي كأنني أكلتو الوريثة حق أبوه .. كذبتا في كل شي يا فهمي وصدقتا في حاجة واحدة .. لما قلت الدنيا فالتو .. الملاك إقتلب شيطان والشيطان ملاك .. والله يستر من الواجي !! يكتبها عمرو جمال ل"عدن الغد"
