لوقلنا .. ان هذي البلاد ((فالتوه)) .. عاد هذا الوصف قليل.. ويكذب أبوه.. وأبو أبوه .. وجدات جداته .. من يقول .. انها ماشي ((فالتوه)).. بس نحن بنقل له .. الا هذي البلاد فالتوه.. وبت فالتوه .. وفالت فالتوه.. لان كل شي فيها .. مدمر مجمر .. مكسر مكندر.. والأوضاع كلها منهارة من الألف إلى الياء .. وأهلها يعيشوا في خص حاله .. وكثير من المسؤولين حقونها .. ((من حق الله طلبناك)).. لايهشوا ولاينشوا ولاينفعوا ببصله.. وبعضهم – وهم كثير – من يوم ماقعوا مسؤولين لاساعتك والأن .. ولافعلوا حتى حاجه للمواطن .. بس يعرفوا يلبسوا .. كوات وسراويل طوال وكرفته ويترشرشوا عطر ((حبني بالغصب)) .. والشغل عند جدتي.. وإن جينا للعملة حقتنا – يعني بيسنا- على ماتقولوا ((الريال )) حقنا .. بيس كلها ((طيسي فيسي)) .. ورق ((خرق)) شمها لاتطعمها .. طباعه بلا غطاء ولا كوفية ولا مظلة ولا طربوش.. بالله عليكم يا خلق الله .. هذي بيس ..؟ امانه ان عرفها ((بول بقر))لعنة الله – دنيا وآخره – على من طبعها .. ولا كان ابوها .. ولا ابو ابوها (بيس) .. كلها (هشتي بشتي) .. من (الخمسمية ريال )إلى (الألف ريال) .. كلهم يتشابهوا .. كأنهم خلقوا ((توم)) سبحان الخالق الناطق.. تصرف ((الألف )) تحسبه(خمسميه) .. وصرف الريال ياخواني وصل الى الحضيض.. طيب لما وصل لا الحضيض .. بالله عليكم قلولنا .. وين هبت (لثنين مليار دولار) .. حقت السعودية اللي اعطتها للحكومة الشرعيه حقتنا منشان تحفظ بها ماي وجه ((الريال حقنا )) من السقوط إلى آخر حفرة ..؟ والله ما عاد درينا شوه هوه الخبر ..(وكأنش يا تيتي لارحتي ولا جيتي ).. كله لعب في ملعابه .. وهذا عيب وألف عيب .. (تف قال في اللحيه) .. قيمة الريال حقنا وصلت إلى (عانه وبيستين) – على حساب أهل زمان – ما تسقيك حتى (قلص ماي) .. يعني يا معنى .. معاك بيس (ملات جونيه) .. من الريالات حقتنا ماشي بتجيب لك (قطمة رز).. ولا حتى(قصعه طماط).. وسعر (الريال السعودي) – اللي تشمه ما تطعمه – وصل الى (مية وسبعه وثلاثين) .. وزايد فوقه قليل حوايج .. والدولار – اتسمع بس سكته ولا تهرج- وصل الى فوق (النص مليون) .. واهابوي .. شوه هذا الكلام .. الوضع خطير مره واحد .. ونحنا عادنا حنبنا عمارنا في الحرب.. والبلاد كل يوم تنهار على قليل قليل.. وساني لا الداهوفه.. (ماله وبعدين .. ماله لما وين ..؟ ) الناس خلاص تعبت .. وقدها في تب التب .. وحالها أصبح في جحر الحمار .. وعادنا نضحك على عمارنا .. ان معانا (بنك مركزي) حولناه من صنعاء لا عدن .. وجبنا له (رئيس مجلس اداره ) .. وخدم وحشم .. وهوه جالس في الخارج .. كما المسؤول الأولاني .. يتنقل من بلاد لا بلاد .. وكله على حسابك يا بنك .. ومشاهرته بالجواني – وهذا كلام الصدق – لا نكذب على عمارنا ولاشي .. أوكلوا ملات بطونكم يا مسؤولين والمخارج كريم.. ويلعن ابوه وابو ابوه هذا المواطن .. خلي جدات جداته يموت جوع .. وطز في البلاد وامهات امهاتها.. بالله عليكم كيه قلولنا .. ؟شوه من وزير من وزراء الحكومة الشرعيه نزل لا المرافق حقونه في المحافظات المحرره.. كيه قلو لنا .. ؟ حرام عليكم يا وزراء .. جلوس تدوروا مي بلاد لا بلاد .. ولما تجوا لا (العاصمه المؤقته عدن ) .. تتخبوا في (المعاشيق).. ولا نشوفكم الا في التلفزيون والماي المعدني والفاين والقهوه المزقول والعصاير قدامكم .. ناقص (المداعه) يركزوها لكم فوق الميز- اللهم ديمها نعمه – عليكم ما تستحوا .. البلاد مفلته فلات و انتوا ولا عندكم هجس .. يا رحمتي عليك يا رئيس (هادي) .. من يوم ما جيت عدن .. والامور كلها رجعت فوق راسك .. وكم بتكون انته ..؟ انته للكرهبه والا الماي .. او النظافة أو الصحة أو التعليم .. أو الشهداء و الجرحي .. أو العسكر والأمن .. معاك (حكومة ) كما حكومة (الزير سالم) اللي في الأساطير ...لا تشفع ولا تنفع.. نصهم استقالوا ونصهم جلوس في فنادق (عشرين نجمة) .. ما بين الرياض والقاهره والأردن .. وبعضهم اشتروا لهم ولأسرهم بيوت يا سلام.. و الدنيا بخير.. وهات يا حليب الحليب من (ضرع الحكومة) .. وما خفي كان أعظم .. الله يعينك يا(هادي) .. القدر حطك في الواجهه .. شوف (العويله) يبان يلعبوا عليك .. وانته انسان مناضل وطيب وعلى نياتك .. ماشي حق مشاكل .. لكن تبا مني نصيحه .. غير الحكومة .. من ساسها لا راسها .. وجيب ناس لهم وعليهم .. البلاد ملانه ناس كفاءات ونظاف .. ولو ماشي لقيت أستأجر حكومة حتى من (الصين) ماشي عيب.. الناس مع الناس .. والصينيين قدهم صحابنا من زمان .. الخدمات كلها معطلة يا (هادي) .. وبعطيك مثال : شبكة الاتصالات .. تتصل بالتلفون تقول.. (الوه) يجيك الجواب .. (طيط.. طيط) – جعل لكم (طيط) في بطونكم – خارج نطاق (( أمتغطيه)) - على كلام صهوري البدو- الشبكه مخبوطه في راسها جني .. ماله لما وين.. ماله وبعدين..؟ والأسعار كلها على سعر الصرف .. من الحبه النعنع لا الدبه البترول.. والاغتيالات زادت .. وماشي نبا ندخل كثير في التفاصيل خلوا التبق مستور .. الناس تعبت يا (هادي) .. ولازم من حلول قبل فوات الأوان وينتظروا منك قرارات حاسمه (يا كذا والا كذا) على وقع أغنية (الفنان المرشدي ) الله يرحمه – والسلام ختام..!