* · أعزائي القراء .. من كل قلبي أتمنى لكم السعادة .. وأن يكون عيدكم جزع على خير وعافية .. وبلا مشاكل.. ولا مصايب ولا ازمات .. ولا مشاحنات ولا مماحنات..! * · خلال ايام عطلة (عيد الأضحى) ..أتصل بي على تيلفوني (السيار) .. وعلى التيلفون (الأرضي) وعلى (الواتس) .. عدد كبير من عامة المواطنين .. ومن الزملاء ومن الأصدقاء.. ومن القراء.. ومن المحافظات ومن خارج البلاد.. ومنهم من كتب رسائل وأرسلوها لي .. يشكوا كلهم فيها.. من اللي جرى لهم في ايام العيد.. من مآسي ومتاعب واحزان .. ضيعت عليهم فرحة العيد- أن كان هنوك عاد باقي (فرحة للعيد) .. في هذي البلاد النحس الدحس.. الدبور اللي ضاعت فيها الدولة .. وضاعت معاها الحكومة وجدات جدات الحكومة .. إليكم عرض نماذج لما جاء في هذي الاتصالات والرسائل: * · موظف من عدن .. قال : (( يالحجي عيدنا بلا مشاهره .. تصور بالله عليك كيف جزع علينا العيد ..؟ والله قضينا أيام العيد رقود داخل بيوتنا .. لا خرجه ولا دخله))..! * · مواطن من أبين .. قال : (( عيدنا بلا كبش .. لأن قيمته وصلت ميات الألوف من الريالات ..))..! * · مواطن من لحج .. قال : ((عيدنا بلا كرهبه ولابترول .. ولا ماي..))..! * · أسرة من عدن .. قالت : ((يا لحجي هذي السنة جزع علينا العيد وكأنه ماشي عيد .. لا كبش .. ولا بترول .. ولا كرهبه .. ولا بيس .. ولا ماي.. عيد زيط ميط..))..! * · أسرة من لحج .. قالت : (( أنته يا دهيس من لحج – الوهط- يعني مننا وفينا – هل يرضيك إننا جسينا العيد كله .. ونحنا بلا كرهبه ولا ماي .. ومقطوعين عن العالم .. كم صحنا .. وكم شكينا لما شكعنا .. ومنوه هذا اللي با يقرأ لنا خطنا ..؟))..! * · مجموعة من شبان شبوه على تواصل دايم معاي .. قالوا : ((تعجبنا كتاباتك كلام باللحجي.. شوف نحنا شبان من شبوه .. نتواصل معاك دوب .. جزع علينا العيد ونحنا في خس حاله .. لا كرهبه ولا ماي .. ولا مشاهره.. ولا .. ولا .. وما خفي كان أعظم ..))..! * · حرمه من كريتر .. قالت : ((يالحجي نحنا نقرأ لك من زمان .. أنته صحفي عريق .. شوف جسيت أني وعيالي بلا كسوة العيد.. لأنه ماشي جابوا لنا المشاهرة.. وأهل الخير هذي السنة ضاعوا ..)).! * · أسرة من الشيخ عثمان .. قالت : ((عيدنا على صيد باقة .. المشك بألفين ريال – قلت لها : المشك الباقة بألفين ريال ..؟ قالت : أيوه يالحجي .. المشك الباقه بألفين ريال .. وين أنته عايش يالحجي .. أكتب .. أكتب نحنا تعبنا ..؟ ))..! * · مواطن من عدن .. قال : ((الأمن في عدن مفقود .. كل يوم قتل وسرقة وتفجيرات واختطافات .. قضينا العيد يالحجي .. ونحنا خايفين على عيالنا .. وماسكين على قلوبنا .. كيف تشوف يالحجي .. لا وين نحنا رايحين ..؟ ))..! * · زميل لي في الدراسة من الستينات .. هاجر إلى أرض الله الواسعة .. قل لي: باعيد هذي السنه في عدن .. وساعة ما وصل .. أتصل بي .. وقال : يالحجي أنا وصلت .. بس هذي ماشي عدن .. اللي نعرفها قبل (خمسين سنة) .. انته تذكر يا استاذ عبدان .. لما كنا نهب لا الغدير .. أو صيرة .. او ابو الوادي.. او ساحل ابين .. ونجلب الصيد.. ونسهر لما الصبح .. والدنيا أمن وامان .. ترقد حيث ما ترقد .. محد كان يقدر يكلمك أو حتى يقل لك من وين جيت .. خلاص انا برجع (السويد) .. وباموت هنوك .. خلاص خلوا عدن للبلاطجة والسرق والفاسدين وللسياكل النار وللمسلحين وللعصابات .. شوه هذا الخبر .. وشوه هذي المصايب ..؟ عدن خلاص ضاعت .. مع السلامة يا صديقي العزيز .. باي باي .. نلتقي في السويد .. با أرسل لك دعوة..))..! * · زملاء دراسة قدامى من الضالع ومن ردفان ومن يافع ومن حضرموت .. قالوا : ((يعجبنا الكلام باللحجي .. كل سنه وانته طيب .. وعيد سعيد.. الناس يالحجي تعبت كثير.. وعيدنا حزين .. الحكومة غائبة عن المواطن كثير .. كثير ..))..! * · مواطنين من موديه ولودر .. قالوا: (( أكتب يالحجي أن عيدنا جزع طيش فيش..))..! * · مواطن من الشيخ عثمان .. قال : ((عيدنا على صوت السياكل النار يحنوا حنون .. والطماش والرصاص .. والجيب خلي .. والبطون حقتنا خاوية .. أفعلوا لنا حل يا شرعية .. اكتب يالحجي هذا الكلام في الجريدة .. أسألك بالله ..))..! * · أعزائي القراء .. هذي بعض من اتصالات ورسائل القراء .. وصلتني خلال إجازة العيد .. وكلنا في الهوى سوى .. والخل من المرطبان .. تصدقوا يا جماعة الخير .. اني عيدت على .. ((صانونة هوى)).. وشميز ومعوز كله مخيط .. لاحول ولا قوة الا بالله .. اللهم رحمتك بعبادك..!
