يقول لكم قبل سنوات طويله اجتاحت اوربا امراض واوبئة الكوليرا والملاريا وامراض عديده ومات ملايين من البشر.. نحن كنا حينها في عدن موجودين اما بسينما بلقيس او ريجل او بملعب الحبيشي او بمطعم هاشم نتعشى فاصوليا وبيض وحبه شراب كندا ترزع البطن.. او كنا نلعب في ساحل ابين نحن وشباب من عدن والمعلا والقلوعه والخور.. ِواحيانا نكون في البيت نتابع مسلسل عماشة عكاشة..او لا يا ابنتي العزيزه او افتح يا سمسم.. وبعدين نختمد نووووم من دون تصنف الكهرباء وتخرج سياحه ليليه واحيانا كنا نروح نتمشى بالزعفران والطويله والصهاريج ونتناول كوب ليمون وثريب وناخذ جوله باحياء كريتر والمعلا والتواهي والشيخ والمنصوره.. واحيانا نجلس بالحافه نلعب بطه او شطرنج او من كبته طيار او غميضان لادارين بهذه الامراض الفتاكه ولا لنا علم بها.. لا دارين بكورونا ولا ديزلونا ولاحررونا ولا شرعيه ولا انتقالي ولا نت ولاجوال ولا فيس ولا وتس ولا تطبيقات ولا ثورات ولاتحالف ولا شلني يا دريوال ولا نقاط تفتيش ولاشاصات ولا حزام ولا مقاومه ولا اتفاق الصين ولا زعامات ولا مجانين ولا شحاتين ولا عصيد بالجولات ولا امراء ولاملوك ولا سلاطين ِ كان تلفزيون عدن يعرض مباريات الدوري الالماني كل يوم أحد وفي ذلك الوقت الذي معه تلفاز يااااح كان من الشباعى وكنت اروح عنداصدقائي اتابع المباراه.. كنت ارجع البيت اتسمع الراديو وشوي وعيوني نووووم.. الصبح اضرب التمشيطه آفرو وسروال كرمبلين وشميز اناقه واروح المدرسه واحصل مدرسين وكل العالم وطلبةوطالبات التي عامله عمبوره والتي تسوق سيكل والذي يتقرعو مع بعض وانا اخترق الساحه اتخاشف تقول اميتابتشن البطل الهندي.. كان العدانيه يجيبو قراع روتي وزبده وجبن وجام وخمير.. وانا واصحابي البدو كنا نجيب دخن وزاد وملوح وقليه وتقع منافسه والبنات يقولو اوفييه يا علي اش دا القراع حقكم ام الصبيان ترزعكم وندخل الصفوف ونتعلم ونروح بيوتنا هانئين قانعين بهذه المعيشه الملائكيه لا قوارح ولا عرسان ابو رصاص ودبابات الشوارع...ولا قتلو ولا قطعو طريق ولا كمل ديزل ولا قات ولا مخدرات ولا عصيد.. وعادنا كنا فحر الخليج لما منتخبنا يطبعهم اهداف وننشد ياويل من بيعادينا قابوس والا السعوديه.. ولما اخرج للحافه كنت امشط فوشه ابو فرقه وجرم مضغوط وجزمه دبابه...يااااح يعتبر هذا اكبر شياكه عبده جليس ولو حصلت ابتسامه من اي بنت يااااح التكد واقول واااه ضحكت لي ذيك البنت ام العنبوره.. وفي المدرسه لما ياخذونا زيارة لبعض المصانع كانو يخبرونا قبل الزياره بيوم واحد.. وانا اقول للبيت شوفو بكره معنا زياره..كنا وما زلنا فقراء بسطاء.. ايلييييه يخيطو سروالي المرقع يعملو له وصلتين حناني طناني يعني منشان اكون دبلماسي وانام بدري لإنني باقابل مدير المصنع والعاملات والعمال وبانعمل تجارب نوويه فوق المكائن وثاني يوم يجو البنات الي ممردده شعرها والي لابسه فوق الشميز الق انيق ونجي انا واثنين صحابي بدو راسنا كله سليط دهن والزرار الاوسط مشبوح عند الرقبه اعوج تقول مبلط و نتجهز مع الاستاذه ويجي لنا باص ونرتص طابور مرتبين كأننا رايحين اتفاق الرياض.. طبعا البنات يمشو بالمقدمه ونحن بالخلف ونظام وهدوء والاستاذه اذا شافت واحد خرج من الطابور سرحته يعتبر خربط خطة التحالف وبعدين ننطلق بالباص في شوارع عدن ونخرج رؤوسنا من النوافذ تقول الا منتخب برشلونه او الريال جائو زياره..وندخل المصنع ونحن جادين مركزين الي بيشوفنا بيقول هؤلاء بيعملو جسور فضائيه ومحطات كهربائيه بالطاقه الشمسيه كما حق التحالف الذي صلحوها في عدن ويشرحو لنا بالمصنع وكنا نتنافس كل واحد يعمل نفسه فاهم كل شي ثم نعود للبيت ونكلم الأهل والجيران وكانو يفرحو بنا وئوانسونا.. ثم ننطلق ونخرج للمدينه واحياء عدن وبحارها واسواقها ومدارسها نمارس حياتنا ببساطه وعفويه مثل الملوك.. ِ الآن قلبو حياتنا راسا على عقب..ثورات وعالم جديد فوضوي وتاهت المدينه واختفت ملامحها وبصمتها ثم صرنا: تيتي تيتي تيتي.. عاصفتنا وتحالفنا.. لا حررنا ولا تحررنا ولا تعطرنا ولا تبخرنا ولا استقلينا ولا تطورنا ولا صنعنا ولا زرعنا ولا حصدنا ولا لصينا ولا هجعنا ولا تزحزحنا ولا ارتحنا.. كله قيقي بيقي وكلام فاضي.. شلو ثوراتكم وبطولاتكم.. اسألئكم بالله اعيدو لنا حياتنا البسيطه تلك لنعيش بسلام وكفى متاعب وشتات.. حفظ الله عدن.. علي الهيج.. رجائا بلا طهوشه.. حقوق الطبع محفوظه للكاتب
