في أي مكان وزمان , يعجنون الكذبة , ويطبخون الإشاعة , ويقدمونها وجبة سامة . وعلى الحمقى التلذذ بها ! تدري يا صاحبي أن جبل حديد كان كله ذهب !! . بالله عليك , وأيش اللي استوى ؟! أصحاب الإصلاح قشطوه قشط ! لما جابوا له هشاشة الأحجار ! وتحول إلى حديد مذحل . هاذي بسيطة , أسمع أيش حصل لجبل صبر منهم . مو في به ؟! هات أنا أفدى قلبك ! . جبل صبر كان كله عسل , يسيل من كل جنب , عسل طبيعي سدر دوعني رقم واحد .! أيوووه وبعدين أجو لك أصحاب الإصلاح لحسوه لحس ! اللي بيده واللي بلسانه .! واللي يعبي بالسطل ! واللي جاب ماطور وديانم وهات يا شفط . يعني صلحوا له عمل جماعي . بالضبط ! . ومن شدة لحسستهم جابوا له ضغط وحموضة ! وراح يسكب صًبِر علقم بدل العسل . هيا تصدقوا كلام من واحد ثقة أن عدن الصغرى ( البريقة ) فاتها ذلحين عدن الكبرى ( البراقة ) . ومافعلوا بها ؟! مرضت وهي صغيرة , قالوا مابلا بها جني , والخبرة أجوا يقرؤون عليها .. صبح وليل . وهات يادعس فوقِه ! لما تعقدت من الحياة . وقالت خاطركم , قد الطفولة أحسن . وقررت ما تكبرش ! . وذا مش عندنا وبس !. شوفوا أصحابهم في كل مكان مصلحين مشاكل . تعرفوا دولة السودان !! أيوه هيا كان اسمها دولة البيضان , وكان شعبها أبيض زي السراج النيون . وكيف سودوا ؟! أجا لك واحد من إياهم ! قال لهم : في بكم برص ! وراح جرعهم عسل أسود وحبه سوداء ! لما رجعهم كلهم , وذريتهم من بعدهم سودان سواد ليل . رجعوا قلبوا اسم الدولة السودان . وأنا والله أسمع عنهم طراطيش كلام . هات لا تستحيش يعني يقولوا , إن البحر الميت كان كله نشاط وحيوية . وقتلوه ولا كيف ؟ . لا مش لهذي الدرجة . لكن الأكيد , أنهم راحوا رحلة من حقهم الرحلات . وتسبحوا هناك 3 أيام , ومن بعدهم , أُصِيب بفيروس الزهد والوقار , وهجع له من القنفزة والزنقلة . وكمان يقولوا ! شفتوا صاحبنا سخن , أرسل يعني كلام مش مؤكد ! قالوا البحرين كانت ثلاث ويمكن أربع . وفجروا الباقيات ولا أيش ؟ . الجماعة زي ماتعرفوهم يحبوا الحرص والاقتصاد وعدم الإسراف والتبذير . وقرروا يخبوا ثنتين لليوم الأسود أيش من يوم أسود ؟ . يا حبيبي ذولا مخهم كبير , هم دائما ينطردوا من بلدانهم ويمكن مايلاقوش مكان . فأكيد الثنتين المخبيات باينفعوهم . خلاص ياجماعة , الوقت تأخر . المهم لاتقصروش أنشروا , وزيدوا البهارات , خلوا الطبخة تولع ! ولا لكم إلا ناس تصدقكم وتصفق لكم وتمدحكم . أهم شي , شوهوهم ! أحرقوهم !! حملوهم كل بلاوينا . وخلوا التهمة عليهم , مش علينا . أشتي الناس تصيح بجنان : أأأه .! منكم لله .. منكم لله .. يا أخوان !.
