نموذج 1 «علي» لمحته , كان هناك وسط الزحمة, تابعته حتى استطعت أن أعترضه: صباح الخير, - صباح النور, اعتدل , حرك الكلاشينكوف على كتفه, انتحيت به جانباً: ممكن نتكلم ؟ - على أيش ؟ على كل شيء , - طيب أنا ما أعرفك واخترتني من بين الشارع كله!!, قلت : هذا نصيبي , - ناهي ما تشتي؟ - أشتي أسألك , راح يتلمس (آلالي) مرة أخرى متبرماً هيا يا أخي أسرع أشتي ألحق السوق , والحق القائد, قلت : أي قائد تتبع ؟ قال: مالكش دعوة هو قائد من البلاد, قلت من أي بلاد ؟ - مالكش دعوة المهم هو من البلاد, سألت: هل تقرأ وتكتب؟ نظر إليّ : صورتك متعلم, وانتو يا المتعلمين ما فعلتوا, هوذا انتو تتمخطروا في الشارع مثلنا, بس لا بسين بناطيل , قلت وما رأيك في لابسي البناطيل؟ - نظر إليّ مبتسماً: ما هوش رجال الذي يلبس بنطلون, قلت : ليش؟ - هكذا , وعدت أسأل : كم عمرك ؟ - 17 سنة, -وماذا تشتغل ؟ - بعد الشيخ , ذلحين القائد أرسل للشيخ يشتي خبره جينا , - طيب كم أنتم الذي جيتو ؟ - أربعين, - من يصرف عليكم ؟ - القائد من الوزارة, - طيب وحرس القائد من الجنود أين هم ؟ - سرحهم القائد , - وكم يدّي لكم في اليوم؟ ألفين ريال, والأكل ؟ - كدم من حق الدولة, - وتكفيك الألفين ؟ - ولامافيش , - أنت متزوج ؟ - من أين لي بيس أتزوج , - طيب وليش ما درست ؟ - ياخي إحنا فقراء من أين لي حق الدفاتر والصرفة، وأبي وأمي في البيت أشتي أصرف عليهم, - وفي البلاد كيف تصرف على نفسك وعليهم ؟ - بعد الشيخ يدّي لنا أوامر ومن رأس القبيلي , - طيب القبيلي مسكين, - قادحنا عاري على مخلوس ما نفعل!!, - طيب هل دخلت صنعاء لأول مرة ؟ -أيوه ؟ - وكيف شفتها ؟ - مدري , - كيف مدري , أين أكبر هي والا قريتكم؟ - صنعاء، لكن هيذي وسخة وزحمة مش مثل ما يقولوا في التلفزيون , قريتنا أنظف منها , لكن ما بش ناس كثير , وعدت لأسأل – طيب يا علي ليش ما تدور شغل ثاني تصرف على نفسك ووالديك ؟ - أين , ما عد خليتولناش شي يا أصحاب المدينة, - طيب أيش تتمنى يا علي ؟ انفرجت أساريره: صورتك طيب وابن ناس اجلس : أتمنى أتزوج وأشتغل , وأكون غني مثلكم, ومعي بيت في المدينة وسيارة, والا أحصل على جواز وأهاجر, - إلى أين يا علي لقد أوقفوا الهجرة, - أبسرت غلقتوها علينا من كل زاوية, خلاص خليّ لي حالي القات عيكمل, لكن ماقلتليش من أين أنت ؟ - أنا من البلاد مثلك , همّ بالانطلاق –يا علي الآن أنت بالآلي تهدد الناس , أيش رأيك تطرحه في البيت وتخرج بلا سلاح ؟ - والرزق من أينه ؟ , _ قلت قع مواطن أولاً , ضحك _ قعو دولة أول انتو , وعنقع مواطنين. [email protected]