علي عبدالملك الشيباني ايش اللي يجري في تعز , ايش حقيقة الوضع ؟!
حد يفهمنا ياجماعة ويشرح لي حبه حبه يمكن انا فهمي محدود والعمر بدا يعمل عمله.
سنتين وانا احسبها ومافيش فائدة , قلت يمكن وقوفي مع الشرعية يغلب على تقييمي للأمور وعلى شان كذا تطلع النتائج غلط, بس الموضوع زاد عن حده لدرجة أننا اقتنعت اترك السياسة واروح اشوف لي عمل في اطرف مخبازه .
كانت تعز وكلنا يعرف هذا الخبر محافظة مميزة , كل الناس يعملوا لها الف حساب وينظروا لها بعيون مختلفة . كانت مميزة بثقافتها المدنية وآفاقها الإنسانية , ينتمي أبناءها للعصر للعلم والمعرفة والوعي ومشروع الدولة والعمل السياسي المدني, وقبل هذا وذاك ينتموا للمهنة بعد ان تركوا القبيلة والخبر الفارغ الذي لا يؤكل عيش منذ مئات السنين , ولهذا تجدهم في كل محافظات ومديريات وعزل وقرى الجمهورية , مدرسين واطباء وموظفين عموميين وتجار واصحاب حرف ومعلمين , ياكلوا من تعبهم وجهدهم وعرق جبينهم , لايعرفوا ثقافة الفيد ولا النهب ولا العيش المتطفل على الدولة وجهد الاخرين. ولهذا ظلت تعز محل حسد وغيرة البعض وكره وحقد البعض الاخر , وكان هؤلاء الحسدة والحاقدين - ومازالوا- يوصفوا تعز بأحقر الأوصاف ويخبوا عجزهم وفشلهم بإطلاق الأوصاف والتسميات اللي يعتقدوا من خلالها انهم قد حطوا من قدرها وفي المقدمة ان اهلها ليسوا برجال وان الرجولة بالنسبة لهم حمل البندق وحقة الرتقان والجلسة بحوض الشاص. لكن حتي بهذي السماية حقهم اثبت ابناء تعز انهم برضه متفووقين واشجع من غيرهم , سنتين وهم يمرغوا انف الحرافيش بالتراب برغم فارق التسليح والتدريب و13 لواء حرس عائلي ومليشيات ومال ومع ذلك مقدروش يعملوا حاجة امام شبان "طيحني وقصات سبايكي" وهم لاول مرة يحملوا السلاح , وهذا اللي كسر رؤوسهم وخلاهم يضاعفوا حقدهم ويساموا انفسهم " حتى هذي متركوهاش لنا , ايش عاد خلو لنا هذم الدواعش " !؟ وبالمناسبة نشتي من الحرافيش يستقروا على توصيف واحد مش كل يوم تسمية ساعة براغله واحيان لغالغه واحيان اخرى عيال عبدو ومؤخرا دواعش. .
المعذرة انا خرجت شوية عن الموضوع , ارجع الان لنفس السؤال : ايش اللي يجري في تعز اكان ذلك على المستوى العسكري او السياسي !؟؟.
على المستوى العسكري والمقاومة بشكل عام واحنا ندور حول انفسنا , طلعوا تبة المكلل نزلوا من تبة الزنوج , استولوا على القصر قدهم بالتشريفات , طلعوا الكدحة نزلوا من الكدحة , وبعد سنه نرجع لنفس الخبر انهم استولوا على القصر وقدهم عند مدرسة محمد علي عثمان , طيب مش قالوا قبل سنة انهم قد حققوا هذي الانتصارات لما اطلقوا معركة تحرير تعز !!
المهم منو هذا الخبر واللوك والحوك مع تقديرنا طبعا للشباب وتضحياتهم وشجاعتهم بس يبدو هناك من جالس يلعب ويتاجر بارواح ودماء الناس. لتروحوش بعيد قبل اشهر اطلقوا معركة تحرير الساحل الغربي وهات يااخبار يومية متلاحقة على مدار الساعة عن معارك المخاء ومعسكر العمري وانهم يحاصروا البوابة الغربية لمعسكر خالد والبوابة الجنوبية وانه باقي قليل وبيسيطروا كليا على المعسكر وفجاء يطفي الموضوع طفية سراج ولاعد نسمع خبر عن معركة الساحل الغربي ومعسكر خالد.
المهم في حاجة مش مفهوم وشي غامض !!
في الصلو يطردوا الحرافيش خلال عشر ساعات ويكاردوهم للراهده وخلال اقل من 24 ساعة يعودوا لمواقعهم , كيف نفهم هذا الموضوع ؟!
يحققوا انتصارات سريعة في الجبهة الشرقية خلال يومين فقط , طيب ليش معملوهاش قبل سنتين وايش اللي منعهم من تحقيق هذي الانتصارات قبل كذا في الشرقية والصلو وغيرها !؟ .
على المستوى السياسي وعلاقات المقاومة ببعضها حدث ولا حرج , كل واحد يشتم الثاني ويقلل من شانه , وكل مجموعة تشتغل لوحدها وتأتمر بأوامر جهات خفية , ترافقها فوضى عارمة ومش قادرين يوفروا الامن في المناطق اللي يسيطروا عليها , تحولت تعز الى مربعات وكل مجموعة تمارس مايحلوا لها من نهب وفساد وقتل , وهكذا اصبحت تعز ساحة للهبالة والمجهالة وخفة العقول والاستعراضات اللي قادت في النهاية الى بروز عويلة مثل غزوان ومزوان مش قادر حد يربيهم ويضع لمجهالتهم حد.
الاحزاب مخلوش عبارة ولا توصيف الا واطلقوها على بعضهم وهات ياتشكيك ولعن وكل الناس مينفعوش الا انا , وكل الناس مش رجال الا نحنا.
المهم اوضاع عامة ماتدريش من هو مسبب فيها ولمصلحة من يعملوا !! اما جماعة " هات البتاقه " قدهم معروفين ومش غريب اللي يمارسوه في المحافظة وعملهم لصالح عفاش.
ياجماعة احبطتم الناس وقدمتم صورة لاتليق بالمحافظة ونظرة الناس لها , خزيتم بنا الله يخزيكم , فضحتم بنا الله يفضحكم دنيا واخرة.
وقبل هذا وذاك وبعد ان ظلينا لسنوات ونحنا نزايد على الناس بثقافتنا وانتماءنا للمشاريع الوطنية والاحزاب التقدمية قومية ويسارية , فجاءه تضيع هذي المشاريع وتتبخر احزاب اليسار ويطفوا على المشهد جماعات التخلف والسلف , وابو جعنان وابو دبه ولاكأنها تعز.
اما قياداتها فقد انسحبت من اول يوم وفضلت الخروج الى حيث تتكون الارصدة وتملاء الجيوب وتتوفر المناصب للجهال بدل من بقاءهم هنا لتأدية ماعليهم من واجبات ومسؤوليات.
قبحكم الله وقبح هذي الوجوه الانتهازية اللي فشلت في اول امتحان وجبنت عند اول مواجهة , ومع ذلك بيرجعوا يطلبوا الزعامة ويكيلوا لنا من حقهم الشعارات والكلام المنمق والتنظير اللي يجزع بعقول البعض.
