جوزى مبقاش حابب يبص فى وشي بسبب ''أحبوش'' ربنا ينتقم منهم'' هكذا بدأت احدي السيدات اللاتى تأثرن بمشهد من مسلسل ''الزوجة الرابعة'' جمع بين مصطفي شعبان (الحاج فواز) وزوجتة الجديدة (دلال) التى تقوم بدورها ايتن عامر . ولم يكن هذا هو رد الفعل الوحيد على المشهد الذي قيل به كلمة " احبوش" و التى انتشرت كالسرطان فى البيوت المصرية وعلى وسائل التواصل الاجتماعي ( فيس بوك وتويتر)، حيث تباينت الاراء تجاه المشهد ومحتواه بعديد من التعليقات الساخرة منها والمعترضة فعلى احدي المنتديات النسائية قامت العديد من السيدات بتبادل الشكاوى من ازواجهن خاصة بعد مشاهدة "احبوش" من ايتن عامر حيث تقول مني محمد : " انا كرهتها بصراحة بسبب المسلسل ده عليها بروود وهى بتقول احبوووش وزلومتيين طلعوا فجاة كدا ديه مش دلع ولا مياصة ده قرف" وقالت نور الهدي " جوزى لما شافها بتدلع على مصطفي شعبان باصلي وقالى قوليلي " احبوش " ولما شاف علا غانم وهى بترقيه فى الحلقه اللى بعدها قالى انتى ليه مش بترقيني ، شفتو المسلسلات ودتنا لفين !" ايتن عامر واحبوش واضافت اسماء محمد رأيها قائلة "موقفى ايه قدام اولادى لما اقعد اكلم أبوهم كدا، على الاقل الاولاد هينحرفوا " اما على موقع التواصل الاجتماعي توتير فتجد اراء غاضبة من انتشار " وباء احبوش" على حد وصف البعض ،و مستاءة من " دلع" ايتن عامر من ناحية اخري ، وبالطبع منها الساخرة فقال شريف عادل ساخرا " قررت المرة الجاية لما اطلب هارديز لما يقولولى حضرتك عاوز تشوكليت-شيب كوكى اللذيذة، هقولهم: احبوش. اما محمد عبدالفتاح فقال غاضبا من ايتن عامر ذاتها "ايتن عامر و هي بتقول احبوش قمة في التصنع و التظاهر و مش قادر اشم فيها اي ريحة انوثة اصلية. فاكس. "ده الى بيحصل فى مسلسلات رمضان ؟!، والله حرام الشعب هيلاقيها منين ولا منين " كان ذلك تعليق ابوزيد على محتوي المسلسلات بشكل عام . وهناك من سخر منها سياسيا وقال " فيه كلام ان وائل خليل لما رفض منصب المستشار بعت لمرسى اس ام اس فيها كلمة ::: أحبوش". وقال احمد درويش معجبا " أيتن عامر في مسلسل الزوجه ال4 كانت مثاااال للزوجه المثاليه اللي بيتمناها كل راجل مصري" . اما "الفيس بوك" كان هو الموقع الذي حاز على أعلى نسبة " احبوش" بمجموع صفحات تجاوزت ال 30 صفحة بذات العنوان وفى تزايد مستمر .
