سنة حلوة رئيس هادي .. كل سنة وانته طيب .. وفي صحة وعافية .. ان شاء الله .. اليوم هو (واحد يناير) .. اول يوم في السنة الميلادية الجديدة(الفين وسبعتعشر) .. ومن واجبنا – ونحنا نعرف الاصول – ان نسلّم عليك .. ونبوسك بوسة في خدك اليمين .. وبوسة في خدك الشويل.. ونهنيك بالعام الميلادي الجديد..لانك انته رئيسنا .. وحبيبنا .. وتاج راسنا – ان كان عاد باقي معانا ريوس – لانه بيني وبينك يا (بن هادي) .. بدأنا ننقرض .. بسبب اللي يجري في البلاد.. من حرب.. وجوع .. وطفر .. وطفر.. وبهدلة وجعثة المشاهرة اللي اصبحنا نشمّها ولا نطعمها من كثرة الديون .. ومن تعب السرحة والروحة كل يوم من فجر الله الى البريد .. وحال الناس خليها على ربك يا (بن هادي) .. قدهم في تنك .. وتب التب .. كياعى.. شكاعى.. ضباحى .. طفاشى.. ويلبجوا القملة بصميل .. ونتمنى من داخل قلوبنا وبطوننا.. ونسأل الله .. ان تكون السنة الجديدة .. سنة خير ونصر وبركة .. وانته يا (بن هادي) البركة بكلها .. امين يا رب العالمين .. حيّاك الله يا (بن هادي) .. بس تبا مني الصدق والامانة .. اقلّ لك .. الناس ماشي افتهم لهم خبر (الاعفاء) من (بيال الكرهبه والماي) – على ما تقول – (الفواتير المتأخرة) ..حتى سنة (الفين وخمستعشر) .. ومن (الفين وسبعتعشر) يبوهم نعم يدفعوا.. يعني يا معنى خبر (الاعفاء) مخربط خربّاط ..ولا افتهم لنا رأسه من رجوله .. ولا بدايته من نهايته .. يهب المواطن عند صحاب (الكرهبه والماي) يقلولّه .. (ماشي عندنا خبر) بالاعفاء.. يسألوا في المحافظة يقلوّلهم .. سلمّوا حق (لبيال ) من (شهر ثمانية) سنة (الفين وستعشر) ..
اما اللي قبلها ادفعوا (خمسة في المية) من المتأخرات -يعني (خبر مخيط بصميل) على ما تقولوا - _ جا يكحلها عماها) شوه هذا الكلام يا (بن هادي) ..؟ انته رئيس الجهورية الشرعي ..والكلمة كلمتك .. والشور شورك في الاول والاخير.. والناس يبوا (خبر واضح) .. منشان يعرفوا السنة الجديدة .. ان تصدر (قرار جمهوري) واضح كما عين الشمس .. ولا يقبل التفسير ولا التأويل ولا للمزايدة يعفي جميع المواطنين المستهلكين في جميع محافظات الجمهورية – فئة (الشريحة المنزلية) – من (فواتير الكرهبة والماي) بالكامل .. حتى نهاية سنة (الفين وستعشر) ميلادية .. اما (الفئة التجارية) .. يتم معالجة وضعهم بحسب ما تشوفه مناسب .. وهذي خدمة كبيرة نحو المواطن الصابر – ومكانه صابر – ومتحمل كل الماسي والظروف القاسية .. وحياة التعب والنكد.. والتشرد والنزوح .. وطيلة السنوات الخمس الماضية – وما يزال – ومن الواجب ان يكافأ هذا المواطن الصبور المقهور – على اقل تقدير – ب (الاعفاء الكامل ) .. من متأخرات فواتير(الكرهبة والماي) .. وفوقه (وسام من الدرجة الاولى).. وشهادة تقديرية .. مع (زايد ناقص) من (الريالات ابو عقال) – عساكم فهمتوا شوه هيه (الريالات ابو العقال) – والله يخلّي (الملك سلمان) اغرف لك اغرف .. وعلى عرف المرق فتّوا .. والدنيا بخير .. والله الناس با تدعي لك .. يا (بن هادي) من داخل قلوبهم .. ان ينصرك الله على عدوك .. وعلى من عاداك .. ويثبت خطاك .. ويقويك .. و يعافيك ..الناس يا (بن هادي) حبتّك لتواضعك وبساطتك .. ولأخلاقك وصدقك .. لكن الامور شوفها تبا حزم .. ماشي مطمطة .. بالله عليك يا (بن هادي) افعلها .. اعفي المواطن المواطن من (بيال الكرهبة والماي) .. قوّي قلبك – وانته قلبك دايمه قوي – دق الحديد وعاده حامي – لا تتراجع .. خليك دايم لقدام .. المسالة (شخطة قلم) ..با تكسب بها شعب بحاله ..وبا تكبر في عيون الناس .. وعاده فوق ( الاعفاء) من (الكرهبة والماي) .. من جونية رز.. وجونية دقيق ..و جونية سكر .. ودبة سليط – يعني قليل (سبار) – على ما تقولوا ..(راشن) .. زايد من (بقعة ارض ستة في سبعة) – هذا لو عاد باقي اراضي – مع (عروسة) – يعني (زواج) على حساب الحكومة الشرعية لكل مواطن ماشي (مزّوج) وفوقه (شكل قات سمين) من حق (الكراع) – وعادها لا طلعت في راسك يا (بن هادي) واعلنت زيادة فوق مشاهرات الموظفين المدنيين .. اللي عادهم فوق العمل .. والمتقاعدين المدنيين والعسكريين والامنيين.. كما خوتهم من (صحاب الجيش والامن) ..بيكون ل شيء تمام.. والامور سابرة .. والدنيا بخير.. والله انك يا (بن هادي) بتدخل التاريخ من اوسع ابوابه.. وبيقول عنك العالم .. ان هذا (الرئيس) ..يحب شعبه من داخل قلبه .. وهو (الرئيس المطلوب) .. في هذي المرحلة .. وسنة حلوة ..(رئيس هادي) ..كل عام والجنوب واهله بألف خير..!
