لم تكن هذي المرة الاولى .. اللي يجرجر فيها (مسؤولون ) من (هيئة اراضي عدن) من رجولهم .. الى النيابة للتحقيق في تزوير(عقود اراضي) .. صرفت لأكثر من واحد – بحسب ما نشرته صحيفة (عدن الغد) – فكم من فضايح .. وكم من بلاوي و مصايب يشيب لها شعر الراس وزايد (شعر الابط)..وقد وقعت في هيئة الاراضي بعدن- وبالذات بعد حرب(اربعة وتسعين) حين اجتاح الشمال الجنوب .. بقوة الحديد والنار..ومايزال شغل السماسرة .. ومازالت (لعبة الحنش) – البعض سموها ..(لعبة السلّم والثعبان )- تجري داخل هذي الهيئة اللّي يسيل لها اللعاب .. ولعنة الله على (وحدة اربعة بدينار) .. اللي اغتشّوا واعتمدوا بها ( صحاب الجنوب) .. ودمرت قيم واخلاق الكثير من ضعاف النفوس في الجنوب .. للي كان يضرب بهم المثل في الامانة والصدق والعفة .. واحترام الوظيفة العامة للنظام والقانون .. كانوا يقوموا بعملهم وشغلهم خير قيام وبنزاهة .. وهم في اشد طفر الطفر والحاجة .. ويرجعوا بيوتهم وهم يخوروا (العانة) .. لكنّهم كانوا مقتنعين بالحال اللي هم فيه.. وبما قسم الله لهم من ارزاق .. ويكذب ابوه.. وابو ابوه.. وجداته .. وعزّ ما عنده .. من كان يقدر ان يعطي ( موظف الدولة) – قبل الوحدة – حتى فلس واحد .. او (عانة ) او حتى (بيستين) رشوه .. با يروح في ستين داهية .. وبا يجرجروه .. وبا يسحببوه من رجوله الى المحاكم .. و بيدخل السجن.. ولا واحد يقدر يتوسط له .. وما شي بعيديعدموه .. كما كان في (سنوات الحزم في عهد الرئيس الشهيد(سالمين) .. الان (السماسرة) في اراضي عدن .. عيني عينك .. ملان كما (سوق الصيد) .. وانته على طلبك اختار.. تباً بالجملة او بالتفاريق .. جاهزين .. حاضرين .. عند الباب .. بس انته حركش( كيس شميزك) .. او (قميصك) – ان كنت مقمّص- او كمرك.. والورق حقت بقعتك بتجي لك لماّ بيتك وفوقها بوسة في خدك .. وان كان ماشي عطيتهم المعلوم ( حق بن هادي) .. الجواب عندهم طارف .. بيقلّولك .. ماشي عاد معانا (بقع ).. والمخطط ملان.. وانته على نياتك تصدّق كلام السمسار الشيطاني .. ( وادان دانه داني) .. وتخرج من الباب يجي واحد غيرك من (التاقة) ويعطيهم ما في الجيب ليأتيه ما في الغيب .. وما تشوف الا المخطط قده جاهز معاه .. وبقعته قدها محجوزة .. ومحددة باللون الاصفر والاخضر .. وبالقلم السحري اللي ماشي يمتسح بتات .. حتى لو سكبت فوقه بترول او فلاش او حتى (بول) .. لاتستغربوا .. ولا تزعلوا .. يا جماعة هذي (لعبة الحنش) بشحمها ولحمها تدور داخل (اراضي عدن) .. وعاد باقي خبابير كثيرة وينكم وين.. كم بنكتب .. وكم بنشخطط .. ويا ما قصص وياما عجايب ..
وعلى قول المثل .. ياما تحت السواهي من دواهي .. تقع كل يوم في هيئة الاراضي بعدن وانته يا حليم افهم والا عسى ابوك لا فهم..! اتذكر في هذا المقام .. ونحنا نهجر في موضوع اليوم على الاراضي انه بعد حرب (اربعة وتسعين) .. اتصل بي اخي وصديقي العزيز المناضل علي احمد الحقاني (ابو رضا) – الله يرحمه رحمة الابرار – وكانت تربطني به علاقة وطيدة من ايام الرئيس الشهيد (سالمين) .. وقلّ لي : (( يا بن دهيس .. باك تجي معي الى الاراضي بالمعلا .. قلتّ له.. طيب مرحباً على عيني وراسي .. بس شوه معاك .. شوه تبا بقعة..؟ ضحك .. وقلي لي.. خليك الزنقلة يا وهطي .. بس انته جي معاي على السكتة .. قلت له .. خلاص تمام يا (بو رضا) .. وهبيت معاه في سيارته .. ولما وصلنا عند باب الاراضي .. حصلنا بشر كما يوم(الحشر والنشر) قلّ لي : شوه هاذذولا الناس كلهم مستقيمين عند باب الاراضي ..؟ قلتّ له : هاذولا .. يا (بن الحقاني) .. يبو بقع .. شوف كل واحد معاه ملف .. وتشوف صحاب الاراضي وسطهم .. واحد يلقف هذا.. وواحد يلطش هذا.. – والله يا جماعة وهذي شهادة لله وللتاريخ – دوّر الحقاني بسيارته .. وقلّ لي : يا عبدان الاستاذ طه غانم محافظ عدن.. رشحني لادارة اراضي عدن .. وحاول يقنعني لكنّي قلت له : اول باهب باشوف الجو هنوّك.. وبا تحسس الامور من بعيد لا بعيد .. اسمع يا بن دهيس .. ذلحين برجع لا عند اوك طه .. وبا قلّ له .. بطلنا شوف لك واحد ثاني.. انا ما بقدر على هذي الادارة .. الناس كلهم يبكروا من صبح الله عند باب الاراضي كما(زيارة العيدروس) .. هذي تحتاج واحد(طاهوش) .. وبالفعل رجعنا عند الاستاذ طه غانم – الله يرحمه- في مكتبه في ادارة المحافظة - وكانت حينها بالتواهي- واعتذر له الحقاني عن تحمل مسؤولية ادارة اراضي عدن .. قبل ان يصدر القرار .. وهذا كان قدّامي وانا موجود.)) لان لعبة الحنش قد بدت تفعل فعلتها .. وبها بده الاراضي قدهم موزعين في كل حشك .. ومن تلك الفترة ومن ذاك الزمان .. استحوذ على ادارة اراضي عدن .. القادمون من وراء(نقيل يسلح) واستمروا في هذا الاستحواذ والسيطرة على هذي الادارة اللي تحلب سمن وعسل الى فترة قريبة وبقية القصة معروفة .. وفيها تفاصيل كثيرة ليس المجال هنا لذكرها .. وعلى ظهر ( الفرع عاد للأصل) .. نهب المتنفذون .. وحاشية المخلوع علي عبدالله صالح واخوانه وعيالهم وكل من لهم صلة بهم – وهوه على راسهم – ما نهبوا من الاراضي داخل عدن .. وفي كل مناطق الجنوب .. ساعدهم في ذلك جنوبيون باعوا ضمايرهم لعلي عبدالله صالح وللشيطان .. وان الاوان لنشر اسامي ناهبي الاراضي من سنة(اربعة وتسعين) .. اللي تمت دون وجه حق .. وباعوها بالملايين .. واثروا وعربدوا .. ليعرف الناس ان ((الوحدة ) كانت (كذب ونهب) .. وان تعامل النيابة مع المتورطين في صرف الاراضي لأكثر من شخص بحزم وان توضع تحقيق شامل داخل الاراضي واتمنى من كل قلبي لإدارة هيئة الاراضي الجديدة كل التوفيق