هل يدخل في عقولكم ياناس .. أن ((سارق يسرق سارق))..؟ كما هذا الكلام لازم يدخل في عقولكم .. أن ((سارق سرق سارق)).. لأن البلاد كلها سرق في سرق .. بلاد فالتوه .. وألف فالتوه .. والأمور فيها كلها (مفلته )من الألف إلى الياء – على ما تقولوا – من ساسها لا راسها..! السرقه يأ اهل هذي البلاد .. والله انها زادت على حدها .. فمع قدوم العيد والأسواق في عدن ملانه – وخاصة بالحريم والنسوان – اللي يشتروا لعيالهم ثياب العيد .. وقعت سرقات وأم السرقات .. وسرقات السرقات .. وأنته أمسك لك ريح ..! كلمني واتصل بي .. كثير من المواطنين .. وقالوا : ((اكتب يا لحجي هذا الاسبوع .. على السرق والسرقات التي تقع في السوق .. مع قدوم المناسبات .. مثل الأعياد ورمضان والمدارس .. تصدق يالحجي .. إنهم يشلوا (البيس) من الشنطه حقتك .. أو من داخل كيس شميزك .. وأنته ولاتحس بحاجه ولاتحس بشي أنهم سرقوك .. وكأنك (مبنج) .. وكأن معاهم سحر .. قمة في الأحتراف .. تجي تبا تخرج (البيس) والبيس عمى .. طارت مع الريح .. وكم من حرمة .. وكم من نسانه .. شلوا (شنطتها ) من فوق كتفها .. أو شلوا حقها (التيلفون ) من بين يداتها .. تمسك منوه .. ؟ وتقول يامنوه .. ؟ البلاد بكلها مسروقة .. من راسها لما رجولها .. أكتب يالحجي أكتب .. الله يرضى عليك وعلى والديك .. نحنا يا لحجي .. خلاص قدنا في تب التب .. نرقعها من هنا تختزق من الجمب الثاني.. السرق زادوا .. عدن ملانه (طواهيش) وبشر كما الذر .. ماتقدر تسير فيها.. الدنيا جوع وطفر وفقر.. تصدق يالحجي .. ان (سارق سرق سارق ) .. يعني يامعنى .. قدهم كلهم سرق وعيال سرق (الخل من المرطبان).. وعادهم يتسارقوا بينهم بالبين .. كيف تشوف يالحجي ..؟ جانا زمن ينتعوا فيه شميزك من فوق ظهرك..؟ اكتب يالحجي أكتب على السرق .. وأم أمهات السرق .. قدنا شعب جيعان .. طفشان .. شكعان .. نكدان .. وعادنا ماسلمنا من السرقه والسرق .. طيب شوه بتسرقوا ..؟ ماشي عاد معانا حاجه تسرقوها .. والله اننا اصبحنا نخاف .. مع هذا الوقت شمات .. نرجع كلنا (سرق ).. الله المستعان .. ويالوماه .. وياخزاتاه ... آخر عمارنا يقولوا علينا سرق .. الدنيا جوع أكتب يالحجي أكتب ..السرقه زادت .. وين كان هذا لنا مخبا.. عيون الأمن وين هبت.. ؟ ألحقونا يا ناس .. نرقد على سرقه.. ونقوم على سرقه .. مانسمع الا وقالوا .. فلان استرق.. وعلان سرقوا بيته .. وهات من هذي الخبابير.. اكتب يالحجي أكتب.. (سارق سرق سارق) .. لاحول ولاقوة إلا بالله ..))أنتهت اتصالات المواطنين..! والله جينا عليها .. (سارق سرق سارق) .. شي عاد بتفعل حلول يا .. ((ميسري)) .. انته وزير داخلية .. كيف تشوف الخبر يا ((ميسري)).. لازم صحابك اللي في الامن يوصلوا للسرق في وقته .. محسنك بديت بداية طيبه تقرح (طماش) .. والناس يحبوك .. نباك تكون واصل على هذا الحماس.. ساني لا قدام .. ماشي رجعة لا ((قفا)) .. أدحق لا تتراجع .. عيون الامن .. وينيه ..؟ الأمور فالتة.. ولا وين تبونا نهب..؟ السرقه من جمب.. وخطف الجهال والبنات من جمب .. والقتل من جمب .. والأسعار من جمب .. والحكومه – واسفاه – غايبه ولا عندها (وتله ) .. ولا (هجس) .. عيدت في مصر .. وفي الأردن .. وفي الرياض. في أحسن الفنادق.. وتنزهت في أرقى المنتزهات والحدايق والشواطى .. والمواطن هنا في جحيم .. هذا والله عيب .. والف عيب.. بالله عليكم المواطنين قدهم في (جحر الحمار) .. والوزراء .. يتنقلوا من بلاد لا بلاد .. كيف تشوفوا الخبر ..؟ مش هذا باطل ..؟ يا خلق الله افتونا .. شوه هوه الحل.. نحنا خلاص ضاع علينا الحساب ..؟ واحد كان بجمبي .. سمعني هارج نفسي .. قال : ((يارب حولي بسارق أسرقه .. ماشي عاد معانا حل ثاني الا هذا .. ((سارق سرق سارق )) أصل البلاد كلها سرقه .. فهمتوا الخبر ..؟ عساكم فهمتوا .. ويا الله بالخير..!