* * * * السلام عليكم أسره بص وطل أنا بقالى زمان مبعتلكوش أنا 24سنه واتجوزت ، زوجى يبلغ من العمر 34 اتخطبت بسن ال19 كنت وقتها صغيره يمكن مفكرتش فى مشكله السن الا لما كبرت شويه وبدات اشوف اصحابى وعرسانهم فى سنهم ومازلت حتى الان براجع نفسى بس كل شويه اقول ده نصيبى وربنا بعتهولى هو زوجى كويس معايا بس فى تصرفات اوقات هى اللى بتحسسنى بفرق السن ده . انا اتجوزت من حوالى 6 شهور والحمد لله حامل جوزى يعمل فى الخليج هو يبقى ابن صاحب بابا . المشكله انى مبحسش ان جوزى صريح معايا فى الماديات اوى لسه حاسه ان فى فرق كبير مابينا وحاجز لايمكن انه يتشال لما اتجوزنا كنا فى مصر كان اغلب الوقت فلوسه مع والده ولو عاوز فلوس يروح ياخد منه لدرجه انى فى يوم قلتله هو باباك بيصرف عليك قالى لا انا بينى ومابينه حاجه ايه هى معرفش؟ كنت بضايق طبعا لانى كان نفسي احس باستقلاليتنا عن الاهل شويه بس محستش ده وكان شهر بعد الجواز ده اسوا شهر فى حياتى انا كنت بشتغل وكان مرتبى حوالى700 جنيه وسبت الشغل لما اتجوزت ولما جوزى سافر سابلى مصروف 500 جنيه كان منهم250 هشترى بيهم حاجه وال250الباقيين لنص الشهر اللى كان هيخلص طبعا انا اتفاجئت وقتها ومحبتش اعترض او اتكلم علشان كان على سفر. لما سافر بدا كل شهر يبعت ال500جنيه دول مصروفى عن طريق اهله مع العلم انى قاعده عند اهلى فى البيت طول فتره غيابه اتكلمت معاه فى موضوع انه يبعتلى فلوسي بعيدا عن اهله قالى هو ده الوضع كان نفسي احس احساس ان هو اللى بيصرف عليا مش باباه وطبعا الفلوس قليله جدا وكنت بتحرج انى اطلب منه او من اهله وكنت باخد من ماما السؤال هنا هل من حقى اطلب بالزياده وازاى وايه هيكون رد الفعل منى لو رفض ؟ ثانيا الحمد لله ربنا اكرمه وسافرتله بقالى شهرين عنده قد ايه مرتاحه لحياتنا مع بعض بعيداا عن اهله هو شايل مسئوليه الشراء والفلوس وانا ببقى ماشيه مفيش معايا ولا مليم فى حين ان صاحبه بيسيب لمراته فلوس وممكن يديها مبلغ تحوشه. باباه هو اللى كان متولى موضوع الشقه ومصاريفها حاليا قاله هيركب تكييفات فى المنزل والكلام ده كان قدامى وجه جوزى قالى احنا بدايه من شهر 2 هنمسك المصروف علشان الالتزامات من يومين لاقيته بيكلم مامته على النت وكان موطى صوته انه بعتلهم فلوس طبعا انا اضايقت من الحركه المفروض انى مش غريبه عنه علشان يعمل كده بالصدفه لاقيت فى محفظته ورقه بالمبلغ اللى بعته جه النهارده كلم باباه برضه من ورايا وقاله عالمبلغ بطريقه غريبه كانى فعلا غريبه عنه ...... انا دمى بيتحرق من تصرفاته وبتيجى عليا اوقات بصرخ من كنر اللى جوايا ومش عارفه احكى فيه مع حد مبرضاش اعرف اهلى وبحس انها مشاكل عبيطه بس انا نفسي اتكلم مع حد ينصحنى بجد ويقولى مين فينا الصح ومين الغلط وهو ليه بيعمل كده انا من اول ماجيت ماشترتش حاجه ليا الا حاجات هايفه لاتكر وكل شهر حجته يامصاريف العربيه يامزنوق فياريت زى مانا فتحتلكوا قلبى نفسي حد يرد عليا رد احدد فيه موقفى من اللى بيحصل ده واسفه انى طولت عليكوا صديقتنا العزيزة أولاً مرحبًا بك من جديد مع أسرتك ونسعد دائمًا بثقتكم الغالية لا تستعجلي في الحكم على زوجك فأنتي لازلتي في السنة الأولى من الزواج التي يكون فيها الاحتكاك المباشر ، وهناك بعض الأزواج يفضلوا أن تكون مادياتهم غير معلنه حتى لشريكة حياته، ربما حتي تثبتي له أنك على قدر كافي للمحافظة على أمواله ، وقدرتك على التدبير . فحاولي أن تكوني صريحة مع زوجك قدر المستطاع ، ولا تدعي كثرة التساؤلات تأخذك لبعيد، وتصنع حاجزًا من سراب في بعض الأوقات، وتفهمي شخصية زوجك جيدًا حتى تستطيعي أن تبني جسر للتواصل بينكما, وتجنبي في حديثك معه أي شيء يتعلق بأسرته وعلاقتهم المادية معه، حتي لا تسيري مشكلة تمنعك من الوصول للهدف، فهذا شيء ربما لا يريد إطلاعك عليه الآن فاحترمي ذلك ، ووجهي حديثك في شكل العلاقة التي تتمني أن تكون بينكما وكيف يمكن أن تكون الزوجة منبعًا لأسرار زوجها ، وأحرص الناس على أمواله. وحاولي أن تتقربي من زوجك ولا تجعلي هاجس فارق السن يحول بينك وبينه فربما يكون فارق السن أحيانًا في مصلحة الزوجة، حيث يكون الزوج أكثر نضجًا وتحملاً وصبرًا عليك من شاب لم يتحمل بعد عبء الحياة ولا يصبر عليك، فتمتع بحياتك، لا تقولي لو كان كذا لأصبحت كذا " فلو "من عمل الشيطان فعيشي واقعك وأصنعي منه أحلامك. مواضيع متعلقة بص وطل
