بما إنى بعيد ماجاليش دعوة والغُربة بتدى صاحبها العُذر وقالولى بإنى ماليش دعوة وأنا كده مش شايل حِمل الوِزر بس أنا برضه هاقولك حاجة يمكن تطلع فيها سذاجة وإذا شوفتى إنها فيها فجاجة ياتذيعى يا تنسى وتعملى حَظر بما إنى بعيد شايف إنك متغير مُودك من مُدة ساكتة وبتعاندى ف سوء ظنك ف اللى بياخدك تانى لرِدة لا إنتى بتقسى ولا بتطبطى ولا عَندك نية إنك تغضبى ولا حتى بتبكى وتتعصبى ولا سايبة عَزيمتك تتحدى بما إنى بعيد قلقان جداً لما ارجع تانى لمين هانحاز للى ف مالطة لسه بيدن ولاّ لخيالات ساكنة التلفاز إيه نوع التُهم اللى تليق لى مين هيخوّنْ ويبرّق لى وبمين يرضى ضميرى وعقلى وازاى ممكن أحل الألغاز بما إنى بعيد والصورة غيام مش ناوى اتهور واستعجل بس الخَنقة وتُقل الأيام رافضة قرارى بإنى أأجل واللى مطمّن قلبى شوية إنك مش عِزبة ولا تكية لجبان أو ندل بسوء نية عايز أحلامك تتبرجل مع إنى بعيد لسه مصدق إنك باقية وزَبَدِك زايل واللى نكرتيه ولسه بيعشق ممكن برضه يسوّى هوايل قادر مع وجعه يقوم قومة ويصحصح حلمك م النومة لاتباتى حزينة ومظلومة ولا تتسنّدى على حال مايل