ليش تأخر النصر؟ لأن طارق بيصطاد سمك في المخا غلطان الصدق كان يفترض يسير يغطس في سواحل قطر يدور اللؤلوء والمرجان! ليش تأخر حسم معركة الخلاص من الحوثيين؟ لأن حراس الجمهورية قوات مدعومة إماراتيا على اعتبار أن البقية بيستلموا الهكبة من السعودية وقطر منسب يحرروا اليمن! ليش تأخر تحرير اليمن من مليشيا الحوثي؟ لأن قوات حراس الجمهورية في الساحل الغربي مليشيات خارج مظلة الشرعية؟ طيب دخلوها معاكم تحت المظلة بشروط تضمن لكل واحد اعتباره في الميدان وبعد تحرير اليمن سدوا منو يمسك المظلة لا ؛ طارق تحالف مع الحوثيين طيب وانتوا تحالفتوا مع علي عبدالله صالح في حرب 1994 وتقاسمتوا البلاد من بعدها؛ واتضح لكم فيما بعد ان علي عبدالله صالح فاسد وقمتوا بثورة ضده. وطارق مثلكم؛ تحالف مع الحوثي والتسع منه واتضح له زيكم بالضبط أن الحوثي فاسد ومشو حق دولة ونظام وقانون واليوم هوذا معاكم في الميدان يحارب تحت لواء الجمهورية اليمنية. يعني كلكم سوا ياخبره؛ كلكم عجينة واحدة دهدهتوا بنا من حرب لا حرب وانتعثت البلاد من اياديكم كلكم وهذا حصاد اسلوبكم جمعه مابش حد أحسن من حد ؛ ومافيش حل غير أنكم تسدوا وتتعضوا جميعا من هذا الدرس القاسي. لا؛ طارق عفاشي! طيب اعتبروه مثل علي محسن حين أنظم للثورة وهو كان ركن من اركان نظام عفاش. هاذيك الأيام لما انظم علي محسن لثورة الشبان وصحنا ليش هذا هو من نظام عفاش ؟ قلتوا لنا اصه اهجعوا لا تشقوا الصف. ناهي وانتوا ذلحين بتشطوا الصف! ماعد بقيتوا بالصف شي الا وشعططتوا ابوه. اديتوا الأمارات وقلتوا شكرا إمارات الخير وشطيتوا الصف معاها اديتوا السلفيين للمعركة وبعدا شطيتوا الصف معاهم عدنان الحمادي الله يرحمه ماخليتوا له حاله شيطنتوه وشطيتوا الصف وانتوا مفلتين المعركة الحقيقية ونازلين فوقه تهم انتهت باغتياله التحالف الذي اديتوه وصفقتوا له شجعان الزحمة الهاربين في قطر وتركيا اليوم قدهم بيشطوا حقه الصف ذلحين دورك ياطارق طيب ياخبره مادام ماتشوا طارق هذا ومادام هو خارج مظلة الشرعية مامعاكم كل شوية اقدم ياطارق حرر تعز انبع ياطارق حرر مأرب اقفز ياطارق حرر الحديدة خلوه هاناك مرجوم في المخا بين الحمى والغبار يصطاد سمك وانتوا حرروا اليمن من الحوثي وبعدا استضوه وشلوا عليه السمك ولا تخلوا حتى سمكه واحده في يده. اقصد ياخبره ان معارككم الجانبية المألوفة داخل جبهة حرب تحرير اليمن من مليشيا الحوثي سبب كاف لتأخير النصر.
