سالم مازال عامل ( متعاقد ) وليس عامل اساسي في بلدية ( عمال المجاري ) كريتر . من ابناء منطقة الخساف اعرفه منذ كان طفلا" فقد جمعتنا مع بعض العاب الاطفال مثل كرة القدم والجري وغيرها من زمن الطفولة . عند مشاهدتي لسالم في اكثر فتحات البيارات اقف لمزاحة ومناجمته في بعض الكلمات التي اتذكرها منذ الطفولة ونضحك وامشي في سبيل حالي واقول له ( الله يعينك ) .
التقيت فيه قبل يوم يمارس عملة قلت له مالك ياخي بكل بيارة اشوفك مافيش موظفين غيرك .؟ ضحك وقال صلي على النبي بالاول. صليت على النبي ( علية الصلاة والسلام ) قال لي ثاني شي انا مش موظف انا متعاقد في البلدية من سنين وليس موظف رسمي .. ايش تقول كل هذا الفترة متعاقد . ؟ طيب فين الموظفين الاساسيين ؟ ما اشوف حد غيرك . بالخساف بالسوق بالقطيع بالزعفران وبكل فتحة بيارة . ؟
قالي احنا المتعاقدين نشتغل عشان نثبت وجودنا يمكن يثبتونا وبعدين بنرتاح مثل الاساسيين . ؟ قلت له ليش الاساسيين مرتاحين كيف . ؟ قالي مرتاحين مايشتغلوا يستلموا رواتبهم وهم جالسين ومرتاحين للاخير . ؟
كيف يعني عشان انت مثبت واساسي ماتشتغل . طيب فين المدير من المسؤول على هذا الكلام . كريتر غارقة بالمجاري بشكل يومي . الامراض منتشرة وتحفرت الطرقات وماعرفنا نجزع ومنظر مغزز . نتواصل مع البلدية عشان البيارة في الخساف يقولوا العامل بالسوق يشتغل بيكمل بيجيلكم . معقولة كم واحد يشتغلوا فقط والبقية بالبيوت مرتاحين .
ويزيدنا من الشعر بيت ان بعض العمال الاساسيين يتواصلوا معهم بعض اصحاب المحلات عشان يشتغلوا لهم البيارات ويعالجوا لهم المشكلة ويتم محاسبتهم مقدما" مبالغ مالية وشغل خارج ايطار العمل تحت اشراف البلدية او بلاغات .
اعتقد ان رسالتي هذا بتوصل للاستاذ خالد السيدو وكل مسؤول في كريتر لمعالجة هذا الامر ولازم تعرفوا ان مشكلة طفح المجاري بالشوارع سببها عدم معالجة الامر في وقت سريع من قبل البلدية . وحواري مع سالم ليس من باب الفتنه او التحريض بل من باب النقاش مع صديق قديم وشرح المعاناة نحن تعودنا على نقل رسالة المظلوميين دون تردد نأمل ان تكون كريتر مديرية نموذجية خالية من الفساد .♡ ونحن لجانبكم ومعكم على طول
