بكرت من الصباح بعد ما سجلت اشتراكي معاهم عبر الموقع الرسمي لهم وقلت ببدأ بروح للسنترال حق كريتر ورحت السنترال عادنا الا بدخل قال لي الحارس ممنوع.؟ مالك ياخي صلي على النبي انا أدور "عدن نت" أشتي اشترك قال لي ايش هذا "عدن نت" مافيش "عدن نت" هنا قلت له شكرا وانا خارج لقيت واحد موظف كذا محترم صيح لي يا ابني يا ابني تشتي "عدن نت" قلت له ايوه يا استاذ قال لي روح سنترال المعلا قلت له اللي عند ال.. قال لي ايوه هناك ورحت سنترال المعلا لقيت مكان محصن ذكرني بمأساة البنك المركزي والطريق اللي قفلوه علينا من بعده سالت ايش هذا قال لي واحد هذا "عدن نت" قلت له أشتي اسأل بكم وفين قال لي روح السنترال اللي جنبنا دخلت السنترال اللي جنبهم لقيت واحد مطوع كذا محترم على مكتبه قلت له يا شيخ نشتي نشترك بعدن نت قال لي مش عندنا يا ابني قلت له طيب نشتي نعرف من كم والله قال لي بالفيس يقولوا من" 3000" الف قلت له يعني انتوا مش داريين قال لي لا. عادنا الا خرجت لقيت واحد رجال كبير في السن يدور على "عدن نت" قال لي أنت تدور على "عدن نت" قلت له ايوه قال لي دونه كذابين سرق أصلا الحكومة سرق قلت يالله من هدره الشيوبة حقنا يذكرنا بابي بس قلت ايوه قدهم سرق ليش عاده بنخبي ودخلنا مكتب "تيليمن" الحراسة هناك نسألهم فين يا اخوني مكتب "عدن نت" رد الحارسي مش هنا ياخي شفت المبنى الاول المحصن قلت له ايوه اللي كما البنك المركزي قال لي ايوه هو ذاك هو "عدن نت" قلت له الحراسة وصونا لعندكم قال لي ايوه دونه بلا ادب من الصبح يوصوا الناس لهنا رجعت لعند حارسي ثاني شكله نوم وجنبه كلب كان جالس يتفرج لي وانا اسأله ياخي في "عدن نت" قال لي هنا قلت له طيب فين خدمة العملاء والكلب يتفرج لي وانا اهادر العسكري وعيني لعند الكلب حسيته يشتي يقول حاجه بس مستحي من العسكري قال لي العسكري ايش هذا خدمة العملاء قلت له ده لما واحد يشتي يسال على حاجه هم يستقبلوه ويكلموه قال لي ها لا مافيش هنا خدمة عملاء في المكتب حقهم الثاني بالتواهي جنب فندق الصخرة قلت له شكرا وتحركت الى التواهي وسألت صاحب النقطة فين مكانهم قال لي داخل مكانهم جنب إدارة الموانئ ودخلت البوابة وسألت الحارسي حق البوابة قال لي ايوه هنا ادخل على يمينك وانا اقول واخيرا فرجت وقلبي يدق فرحان تقول أمانه وصلت لجزيرة الكنز وحالتي كما سلفر مدوخ قدنا مخابطة من الصبح بس باقيلي عكاز وغرابي فوق راسي برجع زيه.
لقيت الحارسي حق مبنى الاتصالات يقلي لفين قلت له اشتي اسأل على "عدن نت" قال لي معك ملف قلت له ملف ليش قال لي تشتي تشتغل قلت له لا يا حاج انا ادور اشترك معاهم قال لي ها ادخل اسأل داخل لقيت عيال وبنات مليان معاهم ملفات يقدموا على وظائف سألت موظفة بالمكتب على "عدن نت" قالت لي مافيش هنا مدريش فين قلت لها شكرا.
خرجت لقيت موظفة شكلها مديرة قلت لها فين "عدن نت" قالت مش هنا بالمعلا قلت لها اللي بالمعلا وصونا عندكم قالت او مدريش اللي جنبها قال لي اطلع فوق مكتب الوزير حق الاتصالات قلت وزير الاتصالات خلاص اكيد بحصل الخبر الأكيد وانا امشي نسيت انهم بالرياض كلهم مصيفين قلت بس اكيد بحصل سكرتير ولا مدير مكتب ولا نائب على الاقل المهم طلعت وحصلت ولد شاب اللي أفتهم لي انه سكرتير الوزير وقلت له ياخي فين "عدن نت" نشتي نشترك قال لي ولله ولا معي اي معلومة قلت له كيف مله والموقع والاستمارة ولا نعرف سعر المودم قالي ايوه مكتمين على المعلومات مدري ليش بس قال بينزلوها على يوم الاحد بالسوق وبيبتاعوا قلت له يعني اجلس لي لما اسمع انه نزلوهم السوق اروح اشتري لي وخلاص ولا دي البهذله. ضحك الليد وضحكت انا وضحك الكلب اللي كان يتفرج عليا وضحكة "عدن نت" وضحك وزير الاتصالات اللي مش داري فينه بس وصلتنا حقه الضحكة عبر ال"4G" وكانت بتنقطع الشبكة بس الله ستر. هذه حكايتي مع "عدن نت" حبطونا الله بيزيلهم وقلت ببطل عد اتابعهم لما اشوف المودمات بالسوق بعدين بروح اشتري لي واحد وقلبي بارد مع اننا كنت من اول المتحمسين للخدمة.
