رن هاتف صحيفة عدن الغد ظهر يوم السبت 7 يونيو 2014 وجاء من خلف السماعة صوت رجل مسن القى التحية والسلام وقال بعدها .. يا لوماه يا أصحاب "عدن الغد" ... صاحبكم طلع كذاب؟ - الله المستعان ياحاج .. من صاحبنا؟ ما فيش معنا أصحاب غيركم؟ - صاحب الكهرباء هذا اللي اسمه خليل عبدالملك؟ - ماله ايش معه دا كمان؟ - والله انتم نشرتم خبر قبل بيجي أسبوع يقول فيه خليل هذا ان الكهرباء ومن أول يوم من شهر يونيو ولابتنقطع ساعة .. انا وكنت على كلامه لانه منشور عندكم ونحن نحبكم رحت بعت الماطور قلت اكيد اكيد بيطلع الكلام حقيقة مش كذب. هذه المادة متخيلة وساخرة وكتبت انتقادا للوضع المعاش - ايوة ياحاج وبعدين؟ - ايش بعدين اقولك بعت المولد وجالس بالحمى من بعدكم ؟ انتم السبب انتم وصاحبكم هذا اللي جالس يكذب علينا الكهرباء عادها زادت طفي لصي ؟ - طيب خلاص ولا يهمك ياحاج بانكتب لك شكوى . - شكوى ميل ولا لمبة؟ - مالك ياحاج تتهابل؟ - لا والله ماتهابلش انتم اللي تتهابلون لمن تنشرون لمسئولين كذابين يكذبون على خلق الله . - طيب ايش بيدنا نحن نشرنا وبعدين الرجال ماكانش يهدر لنا كان يهدر للإذاعة نحن بس إلا نسخنا الكلام وقلنا بانفرحكم. - تفرحونا فين خرجت روحنا من الحمى الله يخرج روحكم انتم وهذا صاحبكم اللي مكنا كذب . - ياحاج عيب عليك الرجال مش صاحبنا ولا نعرفه . - اسمعوا خليكم المرفالة الان انا اشتي مولد بدل المولد حقي اللي بعتوا من باطلكم انتم وخليل وماشتيش انتظر كثير روحي قدها طالعة ولا باجي لعا .... للصحيفة لا تتزايدوش. - ياحاج مالك صلي عالنبي .. نحن صحيفة حد قال لك إننا محطة كهرباء ولا تجار مولدات نحن يلا صحيفة ايش دخلنا هذا جزاتنا إننا عادنا نشتي نفرحكم . - ايش من فرح فرحتونا الكهرباء طافي طافي كل ساعة تطفي الان انا ما اشتيش اطول بالهدرة الفاتورة حق التلفون قدها للطرف اشتي مولد ولاباجي لكم انا وعيال الحافة ..بتصل لكم بكرة اشتي رد .. تنقطع المكالمة .. يمسك المحرر سماعة الهاتف ويفكر مليا يجر من درج مكتبه دفتر عناوين وارقام هواتف ويبحث عن رقم مكتب مدير الكهرباء بعدن ويضغط الارقام وينتظر على الطرف الأخر يرن الهاتف وينتظر المحرر يأتي صوت أخر من الطرف الأخر صوت خشن لموظف الكهرباء يأتي من خلف السماع – الو من معي ؟ المحرر – يتمتم بداخل قلبه الله لاصبحك انت وصوتك هذا ويرد- ايوة معك صحيفة "عدن الغد .. ياخي نشتي المدير خليل عبدالملك لامر ضروري جدا. - المدير مشغول .. مش فاضي لكم انتم ايش وراكم غير المشاكل جالسين تحرضون الناس ضدنا . - المحرر بلغة مستعطفة – ياخي ايش من تحريض نشتي المدير حقكم لامر ضروري . - ايش من تحريض؟؟ تستهبل ياطيب؟ مش انتم جالسين تقولوا كل يوم الكهرباء طافي طافي . - طيب ليش هي ماتطفيش يعني؟ - اوهااا .. هيا طيب عادك تشتي المدير وجالس تقول تناقر .. - هههه ياخي نمزح ... لاصي وربي اكلمك وهي لاصي وشوية المكيف بيخلينا اتزلج داخل الصحيفة. - خليك اللكاعة .. الان بحول . فاصل موسيقى المحرر يستمع له فجأة يأتي صوت مدير الكهرباء من الطرف الأخر خليل عبدالملك - الو .. أهلا با اصحاب عدن الغد .. هاه خير ايش معنا؟ ايش قد في؟ - حياك الله ياباشا .. كل خير بس ياخي الناس ازعجونا قراؤوا التصريح حقك قبل أسبوع لمن قلت ان الكهرباء مابتطفيش ولا حتى ساعة .. ياخي حنبت لنا الله يهديك الناس جالسين يتحلفوا . - ايش في ياخي ليش الكهرباء مالها .. قلهم الكهرباء أفضل من زمان وان شاء الله باتتحسسن نحن جالسين نربط الوايرات ونصلح المولدات والديزل بايجي صبرهم . - ايوة ياعم خليل بس ياخي لاتكونش تكذب لمن سالك احمد عمر بن سلمان بالاذاعة قالك حتى الانقطاع حق الساعة بيروح ولا بيبقى قلت له ولا حتى ساعة من بداية يونيو ، والمشكلة الكهرباء مكانها في القطاع حقهم . - يا اصحاب عدن الغد صلوا على النبي ولا بانفت ابوه .. ايش معنا ومعكم كله من بعدكم جالسين تحفروا بعدنا .. طفت لصت لصت طفت .. - ياعم خليل صلي على النبي انت يعني نحن اللي نقطع الكهرباء ولا ايش .. نحن نسالك مش انت قلت الكهرباء مابتطفيش من بداية يونيو قدنا قريب 10 أيام فيه والقطاع مكانه الناس اكلونا وواحد اتصل قال بجيب يفت ابونا بالصحيفة ، واتكلم عليك كلام مش حلو.. ايش نقول لهم . - ايش قال هذا اللي اتصل ؟ - قال ياخي انك تكذب؟ نعم ليش الكهرباء مكانها تطفي .. طبعا هو قال مش نحنا بعدين ترجعوا تأذونا .. - ياخي يا اصحاب عدن الغد لاتصدقوا هؤلاء الناس كل من صنف قال الكهرباء طافي . - بس ياعم خليل الرجال يقول المولد ابتاع والان معنا مشكلة . - لاتصدقوش المولدات موجودة كلها بالعدة ولاناقص واحدة . - والله قال باعه ويشتي مننا مولد . - ايش من مولد صلوا عالنبي؟؟ - ياخي صلي عالنبي واحد مواطن باع الماطور حقو لمن سمعك تقول ان الكهرباء مابتطفيش وقال ندبر له ماطور ولابيجي لنا للصحيفة .. اقولك حنبت لنا ياخي الله يهديك انت والتصريحات اللي ماتحطش. - اسمع ياخي تكلم بادب معي الكهرباء تمام .. الأمور ماشية زي الفل بس قل للناس يصبروا قليل .. طوط .. طوط .. انتهت المكالمة
