الحياة الزوجية في "عدن " تحمل الكثير من الاسرار الخاصة والتقاليد الجميلة والتفاصيل الاجمل وتدور في اطارها الكثير من المواقف التي يمكن لكل جزئية منها ان تشكل امور كثيرة للغاية . الزميل "مروان مفرق" قدم لصحيفة "عدن الغد" حوار قصير بين زوجين من عدن تطرق فيه الى هموم اسرية صغيرة للغاية قد تكون صغيرة لكنها واسعة بإتساع الأفق وتحكي سيرة زوجين ومدينة وتاريخ وهوية يصرون على طمسها . ويعيد "عدن الغد" نشر الحوار الزوجي نقلا عن صحيفة "عدن الغد" الورقية التي يكتب فيها "مفرق " عموداً اسبوعيا يتطرق الى تفاصيل عدنية صغيرة. هي وهو
هي : وعليكم السلام .. هيا روح غير ثيابك وتعال بغرفلك غداء. هو : قولي لي كيف سويتي بموضوع الهكبة، عاد وديتيها للحرمة. هي : لا عادني. هو : ليش؟؟ .. مش أنا أعطيتك الفلوس أمس عشان توديها، مالك يا حرمة أتأخرنا عليها، والله عيب. هي : أصلا الصراحة أني احتجت الفلوس وأتصرفت به. هو : إتصرفتي به ؟؟ .. كيف يعني؟؟ .. وبأيش صرفتيها؟؟ .. أيش في حاجة ناقصة داخل البيت؟. هي : لا، بس جزعت الدلالة اللي تبيع بالهفتة وكان معه حاجات حريمي تجنن، قمت شليت لي كم حاجة عجبتني. هو : كدا بدون أي مسؤولية تتصرفي دا التصرف !! هي: أيش يعني حرام أشتري لنفسي حاجة؟ هو: لا مش حرام، بس دي كانت فلوس الحرمة، وبعدين إنتي ماكنتيش بحاجة دي الحاجات اللي إشتريتيها، أيش يعني كلما تجي الدلالة وتوري لك أي حاجة تقومي تشليها؟ هي: أيوة.. أيوة .. أني قدني كدا لما أشتي حاجة أجلس أراعي لك لما تتعطف وتعطيني فلوس. هو : أيش دا الكلام .. مالك؟ هي : أني أصلاً غلطانة لما ما سمعتش كلام أمي، قد قالت لي أشتغلي بتنفعي نفسك وتخبي لك بيستين عشان لو بنفسك حاجة تشليها، بس أيش أقول .. أني أستاهل. هو : مش قد قفلنا دا الموضوع من زمان؟ هي: و أجا وقته إنه ينفتح. هو : أيش قصدك؟ هي : أشتي أشتغل. هو : تشتغلي؟؟ مالك يا حرمة .. أيش تقولي؟ أيش من شغل دا اللي تشتي تشتغليه؟ أيش ناسية إنه معك جهال يشتو تربية ورعاية؟ هي: عادي، اني بعرف أتصرف و باوفق بين الشغل والبيت. هو : كيف بتوفقي و إنتي معك ثلاثة جهال، واحد مدرسته الصبح والثاني بالظهر والصغيرة عاده ماكملتش سنة.. يعني لازم تكوني جنبه طول الوقت، وانتي جالسه تقولي باعرف أوفق.. إهدأي يا حرمة وبطلي دا الكلام. هي : لا، ما ببطلش، أني لازم أشتغل عشان ما أحصليش كلمتين منك لما يكون بنفسي حاجة أشتريها. هو: الله المستعان.. ليش أنا مقصر معك يا ست الكل؟ قدنا اعطيك مبلغ بيدك كل شهر ويكون لك وحدك خارج مصاريف البيت عشان لو تحتاجي أي حاجة .. أي نعم إنه مش مبلغ كبير، بس في حدود إمكانياتي. هي: طيب خلاص خليني أشتغل. هو: طيب لو فرضنا إنك اشتغلتي، مش بتكوني مشغولة عن البيت وعني .. يعني يرضيك أروح من الشغل تعبان وما ألاقيكش جنبي؟؟ هي: أيوة .. أيوة .. زيد عليا بكلمتين. هو : لو كنت أعرف أزيد عليك فاته ما كانش دا حالي. هي : ماله حالك؟ أيش مش عاجبك حالك معي؟ هو : لا لا مش قصدي .. يا ست الكل، أنا معك بأحسن حال. هي : أيوة كدة .. أحسوووب. هو : خلاص صافية لبن؟ هي : صافية مؤقتاً .. بس بيجي يوم وبأقنعك. هو : طالما دخلنا في الهدنة المؤقتة .. قومي اغرفي لي غداء وجزعي معك مي كثيير عشان أعرف أبلع. هو : السلام عليكم.
