دخلت لاعند امي اجري وهي مسكينة مربوشة بالتصبين .. تفرز البيض لوحدهم والملونين لوحدهم والسود لوحدهم عشان مايتدابشوش ويفسخوا ويعتقروا .. دخلت وانا مربوش اخص منه لان الالوان اندبشت عندي بعدما اقروا قانون الحصانة .. المهم رحت عشان افاجئ امي بالخبر واشوف ردة فعلها .. وقلتله بوجهة وبدون مقدمات .. يااماه .. اعطوا لعلي عبد الله صالح الحصانة .. ردت بكل برود .. عادي يابني .. قد شل البلاد كله اجت عالحصانة ( بكسر الحاء) وبعدين له 33 سنة وهو رمزه الحصان .. هكبله واشترى الحصانة وزوجه للحصان ايش زعلكم ؟؟ وبعدين يرضيكم ان الحصان يجلس كدا عازب .. صايع بلا زواج ..بس اهم شي ان اللي باعله الحصانة ( بكسر الحاء ) يكون نقاله حاجة مليح وحدة مربربة وبنت ناس وتعمر معه مش يجيبله حصانة مايعة وماتعمرش معه .. وحاولت بكل الوسائل اقنعه ان الحصانة اللي اعطوها لعلي عبد الله صالح غير الحصانة ( بكسر الحاء ) اللي هي تقصدها بس امي كانت مصرة ان الحصانة اللي لاقاها علي عبد الله من حقه وعلى قولته قد شل البلاد كله اجت على دي .. راحت امي تكمل التصبين وخلتنا اكمل الدبشة حقي فوق مانا مدبوش .. بعدين اكتشفت ان امي كانت تتلاكع عليا وكانت اكثر وحدة فاهمة ايش يعني قانون الحصانة بس عبرت عنه بطريقته البسيطة .. ووصفت الفلوس اللي شله طول عمره هو وعياله وعيال عمه بالحصان اللي كان رمزه ورمز حزبه البليد .. وانه ماكانش بيتهني بالفلوس لو مالاقاش حصانة تخليه يلعب بفلوس البلاد والعباد وان المسؤل على هذا الزواج هي" المبادرة الخليجية " الله يحفظهم ماقصروا وفقوا راسين بالحلال ..
بس امي ماذكرتش حاجة على حكومة الوفاق ولا على دموع باسندوة .. بعدين افتهملي انه بالفعل امي جابت الخبر من الاخير وكأنه تقولي بطلوا تكذبوا على نفوسكم لانكم من البداية كنتوا عارفين ان وقت ما وقعوا المبادرة مباشرة بيعطونه الحصانة فليش عادكم تمتلوا انكم متفاجئين وانكم مصدومين وكانكم اول مرة تسمعوا بالموضوع ومعاكم حاجة من تنتين يا اما تتعامسوا ولا تنزلوا دمعتين وتقولوا ( عشان الوطن ) ..
وبما انحنا متفقين من البداية انحنا نتكلم بكل صراحة ونخلي البساط احمدي .. ايش رأيكم نتعامس او ننزل دمعتين لان الزرير اللي بيقول بانخرج عشان نشجب ونندد ونبدي الرفض .. فاسمحلي اقولك زمطيلك زمطي .. خرجنا وقلنا يسقط النظام وواضح انه عاده الا استقام .. قلنا لا للقتل .. وجزر من شق ومن طرف ورجع لون الرصدة زي لون حامورة "السيدة" .. قلنا لاء للمبادرة الخليجية .. وقعوا الجماعة وعلى عيونحنا وشكلوا حكومة وفاق والقسمة قسمة دلالين "فيفتي فيفتي" خرجنا وقلنا الشعب يريد محاكمة السفاح ..ضربولنحنا الصنجة واعطوله الحصانة له ولاهله ولكل الشلة .. واقتنعت في النهاية ان لو مش باسندوة اكيد كان في حد ثاني بيعلن اقرار قانون الحصانة اللي استمدوه من شريعة دول الخليج والمشكله هنا مش في باسندوة او غيرة المشكلة اكبر من الدولة ورجالها .. المشكلة كبيرة بحجم دول الجوار ..
