حطّي الفراخ في طبق التقديم ومعاها الخضار المشوي النهارده هنعمل الفراخ بطريقة جديدة وصحيّة جدا، نتمنّى إنك تجرّبيها معانا وتبعتي تقولي لنا رأيك فيها.. لفائف الفراخ المحشية مع قطع البروكلي والبطاطس المشوية المقادير: فراخ بانيه (8 شرائح أو على حسب الكمية اللي تناسبك) 10 ثمرة بطاطس صغيرة مغسولة ومقطّعة أنصاف 1⁄2 ثمرة بروكلي كبيرة مقطّعة إلى أزهار صغيرة 1⁄2 كوب فلفل أحمر مشوي ومفروم 1⁄2 كوب جبنة فيتا مهروسة 3 ملعقة كبيرة زيت زيتون بقدونس مفروم للتزيين ملح وفلفل أسود الطريقة: 1- هاتي صينية وحطّي فيها ملعقتين زيت زيتون وزهور البروكلي وأنصاف البطاطس، وتبّليهم بنصف ملعقة صغيرة ملح وربع ملعقة صغيرة فلفل أسود، واشويهم في الفرن على درجة حرارة عالية لمدة 20 دقيقة، مع مراعاة تقليبهم علشان لونهم يبقى مائل للبني من كل الجوانب. 2- في الوقت اللي بتشوي فيه الخضار، اخلطي الجبنة مع الفلفل الأحمر المفروم في طبق صغير. 3- تبّلي شرائح الفراخ بالملح والفلفل، وبعد كده وزّعي خليط الجبنة والفلفل الأحمر على شرائح الفراخ، وابدئي لفّيها على شكل أسطوانة، واقفليها من كل الأطراف باستخدام خلة الأسنان. 4- هاتي طاسة تيفال كبيرة، وحطّي فيها ملعقة زيت الزيتون الباقية، وارفعيها على نار متوسطة، وحطّي فيها لفائف الفراخ علشان تتحمرّ وسيبيها لمدة 3 : 4 دقائق، وبعد كده اقلبيها على الناحية التانية، وقللي درجة الحرارة وسيبيها لمدة 15 دقيقة أو لحد ما الفراخ تستوي تماما، وبعد كده حطّيها في طبق التقديم ومعاها الخضار المشوي، وزيّنيها بالبقدونس المفروم.. وبالهنا والشفا. وبكده تكون خلصت وصفتنا النهارده.. ماتنسيش تبعتي لنا كل الوصفات اللي عايزة تعرفيها على "سفرة دايمة".. سلام،،،
