من البداية خلونا اكون صريح معاكم.. انا ماليش دخل بالرياضة لا من باب ولا من طريق .. بس جرنا الشجن اول ما عرفت ان الوحدة والتلال بيلعبوا .. يعني فريق بحجم الوحدة ومنافس بحجم التلال اكيد المباراة بتكون على كيفك من النخر .. والميدان اكيد ميدان محترم .. يعني منصات مرتبة ومقاعد محترمة ودخول بتذاكر ورابطة تشجيع مع كل فريق .. واكيد بيقع يحيا يحيا فريق المجد زي ما كنا نشوف في الكابتن ماجد . وصلنا انا وصاحبي الى الميدان واللي كان متحمس جدا للمباراة لانه لاعب قديم دار استريجل ركبته مع دوران الارض في مباراة ( حوافي ) وبطل يلعب كبة من داك اليوم .. رحنا متأخرين شوية واتفاجأت _لاننا اول مرة احضر مباراة _ ان جمهور الرياضة عندنا صاحي ومابهشي الناس كانوا مليااااان وحتى انهم كانوا معلقين بالحدايد لانهم مالاقوش اماكن فارغة .. وابو السكريم وابو الجلجل وابو المي كانوا موجودين كمان .. واصوات الدرابيج لما برع والمشجعين متحمسين عالآخر .. دخلت وكلي امل اننا باشوف مباراة من النوع الجامد ..
كلاسيكو محلي يشبه مباراة ريال مدريد والبرشة .. حاجة زي مبارة الاهلي والزمالك يعني كنت ساهن من الظبية لبن .. وصلت مالاقيتش مكان اجلس فيه مش لان الناس ملياااان وزحمة خانقة لاء .. للاسف ميدان نادي الوحدة اللي استوت المباراة فيه كان فقير ومافيبوش غير مدرج واحد فقط لاغيربيكفي اهل العروس والعروسة اما المعازيم يجلوسوابالأرض ويحدفوا كلب .. هذا لو لاقوا مكان بالأرض .. قلنا مش مشكلة بانتفلحس بالأرض وبنتابع مباراة قمة بتنسينحنا التعب .. المهم وصلنا وفي واحد من الشيوبة اللي كانوا موجودين وهو معصب ويسب وخرط الفريقين خرط احمدي .. وهو مقهور تقول سرقوا اكواشه من المسجد .. وسألته ايش في ياوالد ؟؟ جاوبنا بكل قهر وهو متأسف على زمن راح ومش راجع ابدا من وجهة نظره .
تابعت المباراة وماعولتش بكلامه لاننا اعرف احيانا الشيوبة يجوا مزايدين وانهم عاشوا احلى زمن فيه الرياضة والفن والثقافة وكل شي كان حلو وكأنه زمننا ولا فيبه حاجة حلوة الا نانسي .. تابعت اول نص ساعة من المبارة وبسرعة اكتشفت ان (العاقل) كان معه حق المباراة طلعت طماط .. انا اللي مافهمش حاجة بالكبة عرفت ان الرياضة عندنا اهم مافيها وابرع مافيها لعبة (الشبدلو) لان البنات في حافتنا يلعبونه احلى واكثر متعة من مباراة الوحدة والتلال .. عالاقل الشبدلو فيبه ليمون ياس وبيتي مقفل .. اما المباراة كانت كله مقفلة وزبط ترس .. حسيت ان صاحبي وجهه احمر وكان محرج مني لأنه وعدنا اننا باشوف مباراة محترمة .. وبعدين بدأ صاحبي يبرر ان زمان كانت المباريات قمة وكان الناس يجوا بالمئات واللعب مشجع والمستوى عالي والاسماء مخيفة اما الان كل الحاجات دي اتغيرت واستوت المباريات مملة وبلا امل .. فين الغلط ؟؟ محد عارف .. هل من اللاعبين والا التدريب والا البيئة والا ادارة النوادي ... الخ واضح ان المشكلة كبيرة في وزارة الرياضة محتاجة حد رافع اثقال عشان يحله .. النتيجة كانت واحد صفر لصالح التلال واللعب في الاخير كان للوحدة .. بس المباراة كانت كلاسيكو تاريخي .. والجماعة لعبوا على العرف حق زمان ايام ماكان الوحدة حبيب الملايين والتلال فارس عملاق .. *خاص عدن الغد
