انفجار هنا وقنبلة هناك .. وقطع طريق وحراق تواير .. واقتحام محلات وسرقة معارض .. قتل الناس بالشارع من غير مبرر .. واحد اتنرفز فوق واحد ضربه حبتين ..طايرات من غير طيار تقصف فوق الناس .. واوادم مسلحين بالشارع .. بسط عالبقع من شق ومن طرف بالكيلو مترات .. وسرقة الممتلاكات العامة .. السؤال المهم نحنا فين عايشين ؟؟ مستحيل دي تكون عدن !! نفسي ارجع لاعدن ياجماعة .. ضبحت وانا هنا بعيد عن عدن.. ياجماعة الغربة كربة .. والله الواحد بلاده احسنله .. لان عندنا بعدن ماتستويش الحاجات دي .. عدن ممكن تمشي فيها لما الفجر بدون ماحد يتعرضلك ولا تحس بالخوف .. اما المدينة اللي نحنا عايشين فيها الان مستحيل تكون عدن .. لا تقولوليش ولا تقنعونا ... عمرعدن ماكانت كدا .. صلوا عالنبي ياجماعة الناس مش قادرين يخرجوا ولا يتحركوا من الرعب .. استويت كل ماخرج من البيت استودعهم الله ونبكي قليل ونتحالق ونقلبه معزى .. لان الواحد مش ضامن نفسه يرجع ولا لاء .. وعادنا الفت لاورى احيانا واشوف امي تلوحلي بيده تلويحة الوداع .. واخواني يحاولوا يجروا بعدي وامي تمنعهم .
المهم المنظر يورم بالقلب من المحزنة واول مااروح البيت يسولي فوله نعنع وشوكليت وعشرات بمناسبة اننا رجعت بالسلامة .. اما الشوارع برع تزرب الديم .. مناظر مقززة وعرف التواير بكل مكان لدرجة انحنا ادمنا عليها .. واستوت اهم من الاوكسجين .. الخص لكم عدن استوت كيف - للمغتربين فقط - لان اللي داخل عدن عارفين احسن مني شكل عدن الجديد .. عدن ياسادة ياكرام رجع لونه مغبر وكئيب والغدرة بكل مكان والشوارع مليانة كداديف والبلاليع طافحة والرصده مدحلة من الحراق.. والعرف الغالب عليها دخان ودم .. وتسمع احلى الاصوات بعدن من نامونة ( قح – دف – دجف - ارصع – طاخ – شات – زييييط – بم ) اما اشكال الناس فاتغيرت .. تلاقي المسلحين في كل مكان وكأنهم جاهزين للمعركة باي لحظة ضد من ؟؟ ومع من ؟؟ محد عارف !! .
شفتوا كيف حولوا عدن ؟؟ كنا زعلانين جدا لما حاولوا يحولوا عدن لقرية .. اما الان حولوا عدن لغابة وعملوا فيبه كل الاعمال الوحشية ورجعوا عدن لمكان غريب والله اننا اخرج واستغرب واحيانا كثيرة احس بالفعل اننا في غربة واننا مش في عدن .. نفسي ارجع لاعدن ..ونفسي اكثر ترجعلي عدن . * خاص عدن الغد