في مثل صنعاني قديم كنت سمعته زمان يمكن حافظله الان او نسيته بس قدكم بتذكرونا بتعليق يقول " كل من فوق راسك ولا تاكل من تحت ارجلك " وبالرغم من اننا اصحاب عدن ناس حبوبين وطيبين وناس كثير بمحافظات كثير يحبو اصحاب عدن الا انه بيننا البين منحبش الخير لبعض مش عارف الكلام هذا ينطبق على اراضي الجنوب بشكل عام او لا بس هذا اللي شفته واختبرته بنفسي . اجالك خير او واجيلك خير وربنا فتح عليك مثلا وتشتي تبني غرفة صغيرة 3*4 تكتشح فيبه انت ومرتك يقفز جارك يشتي يعطل عليك ويقلك لا ممنوع تخرج اصلا بتضيق علينا الطريق وبتسد طريق الشانزيلزيه والطريق اصلا مش معمول لحد وفيبه بلاليع وكلاب ومحد يجزع منه حتى الاشباح .. ليش يسوي كذا مدريش ؟ .. تشتي تخرج بسطة صغير بالسوق عشان تبيعبه جزم وشنابل بسطة مساحته متر بمتر يقفزولك عيال بلادك يعطلو عليك ويجلسو فوق اكل عيشك وهم عارفين انك محتاج وتشقي على اسرة وبعد ماتجلس عاطل ومحتاج للحبة السجارة البال مال يجلسو يترحممو عليك ويقولو مسكين الله حرام مالو كذا حالو ..!! لسبب ما احب اراقب الناس من بعيد واتخيل حياتهم واتخيل تفاصيل مش ظاهرة فيبهم بسبب نفاقهم بين بعض وبكل مرة اراقبهم اشوف النفاق والكذب والحشوش بالمطاعم والمقاهي والمولات والباصات وهذا يأكد عندي انه نحن مننفعش نكون دولة ذات سيادة عدنية الناس منافقة وتكره الخير لبعض اكثر من كره هتلر لليهود بس من تحت تحت ... افضل انك تكرهنا وتتمني زوالي وتبينلي هذا الشي ولا انك تطعنا من ورا ظهري بخبث مواطن يضرب القملة بصميل خارج من بيته بغران من عيشته رايح شغله اللي يكرهو علشان يتعامل مع ناس يحسدو عله الراتب ويجرو بعده لكن مجبر انه يتعايش معاهم ويكون زيهم ويعيش بنفس دائرة الحسد والمحافرة ديك تنصح صاحبته لاتتزوجش هذا الليد لانه لعاب وابن حرام عشان هي تدور على الليد وتتزوجه .. داك يقطع راتب المعاش حق جيرانهم اللي اصلا واحد شمالي " وسخ على قولتهم " فتحله الراتب بس لانه عدني اصيل قطع عله المعاش حق ابوهم لانهم كبرو ووصلو سن البلوغ ..! ... ذاك ينصح صاحبه يقله لاتقدمش بهذه المنظمة لانهم سرق ولعبو عليه ويتفاجا يلاقيهو يشتغل بنفس المنظمة اللي نصحه بتركه ..! .. ذاك يقول لصاحبه سكهلك من العسكرة والترقيم وروح شوفلك اي حاجة ثاني ويتفاجا يلاقيهو مرقم ويستلم الف سعودي !؟ كل نحن دخلنا دائرة الحسد ورجعنا تروس في المحافرة بعد لقمة العيش .. حرااام مالو الليد كذا حاله وهم ياكلوه ويقطعو حقه .... حرام ماله البنت هذه هكذا نفسيته وهم يحشو عليها ويضغطو عليها ويكرهوها بعيشته ... حراااام مالو الرجال هذا كذا باع البيت ورجع بالشارع .. لانهم حافرو بعدو بالبيت واكلوه .. اوه حرام ... اوووه ميجيش ... اوه نفااااق ..اوووه حسد ... اووه محافرة عشان اكون واقعي معاكم وانا ابن البلاد يعني حالنا على كذا لايمكن يتغير لو يقيمو الماهيتاب غاندي من قبرو يحكم نحن بالعدل والخير والسلام ... القيم النبيلة هذه هي اللي تبني شعوب وحضارات .. للاسف نحن منطمحش نكون دولة مابالكم حضارة ... وشكلو عاد نحن جالسين على كذا ... لاتزعلوش مني .. انا ماقلكمش كونو زي اصحاب صنعا .. انا اقلكم على الاقل اتحلو بالقيم النبيلة اللي تصنعلكم حضارة ... ومشتيش اتقمص برضه دور الشخص الهلامي المدعي او بتعريف اخر مطوعي واقلك اصبرو وصابرو الصلاة والصبر وكل الامور بتتحسن وهو يسرق حق الايتام والتبرعات .. ولاشي بيصلح بالصلاة والتسبيح والدعا ... التغيير بيدأ من داخل وكل شي بيتغير... حياتكم ومعيشتكم ... والله على ما اقول شهيد نحن شعب تعبان والله العظيم ياجماعة وكل واحد محتاج الثاني كل واحد محتاج يواسي الثاني سواء بفلوس او بمواقف او بكلام خلو نحن نحب الخير لبعض علشان الخير يعم الكل والبلاد .. ماقلكمش حبو بعض وخلو الحب يملي البلاد والحياة بمبي بمبي بمبي .. وسعاد حسني ... اقلكم حبو الخير لبعض وساعدو بعض واسعدو لبعض وبطلو محافرة ولو قدكم تشتو تحافرو حافرو بعد الريوس الكبار حافرو بعد شلال حافرو بعد عبدربه حافرو بعد عيدروس حافرو بعد المقطري حافرو بعد التهامي حافرو بعد الناس الشباعة جدا اللي ماسكين اموال ثقيلة تكفي شعب لاتحافروش بينكم البين انتو ضباحة اقسم بالله مش ناقصين و " كلو من فوق ريوسكم ولاتاكلوش من تحت رجولكم " لاتحافروش بعد الضبحان حافرو بعد الشبعان والله ولي الختام