شوربة الكريمة بالدجاج والفاصوليا الحمراء مناسبة للجو الشتوي البارد اعدّتها لكم: آية خالد النهارده هنقدّم لك طريقة عمل شوربة الكريمة بالدجاج والفاصوليا الحمراء، وهي مناسبة جدا لبداية الشتاء وبرودة الجو؛ لأنها من الأصناف المغذّية جدا، وكمان بتساعد على التدفئة.. شوربة الكريمة بالدجاج والفاصوليا الحمراء المقادير: كوب فاصوليا حمراء (متوفّرة علب جاهزة في السوبر ماركت) 2 ملعقة كبيرة زيت زيتون 2 شريحة صدور دجاج 1 ثمرة بصل مفرومة 2 فص ثوم مفروم كوب كريمة طبخ 2 كوب شوربة 2 كوب ماء ملح وفلفل الطريقة: 1- حطّي زيت الزيتون في حلة متوسّطة، وشوّحي فيه البصل والتوم لحد لونهم ما يدبل، بعدها ضيفي المية والشوربة لحد ما يسخنوا، وضيفي عليهم الكريمة. 2- اسلقي شرايح الفراخ لمدة خمس دقايق، وبعدها طلّعيها وقطّعيها مكعبات صغيرة، وضيفيها على الشوربة وضيفي معاها الفاصوليا، وسيبيهم لحد ما يغلوا، وبعدها ضيفي الملح والفلفل، واطفي عليها وقدّميها.. وبالهنا والشفا. وبكده تكون خلصت وصفتنا النهارده.. استنونا بكره مع وصفة جديدة.. سلام،،،