كيف لما يكون معك بدلة مليحة يالول، وفي جيوبها زلط خيرات، ويجي لك واحد مبندق يتقطع لك وسط الشارع ويشلها عليك بالقوة؟! وتقولي له: مالك؛ وليش تشلها؟ يقولك: ما شاشلها لي ياضاك.. انا غير شاصبنها لك وانظفها من "الدواعش"! وتمشي الأيام يالول؛ وهو ما صبنها ولا شي ولابسها كل يوم فوقه وجالس يصبنك! تقولي له: البدلة يا خبير يقولك: سابر سابر عادها بتتصبن. وتمشي سنة ورى سنة يالول وهو يفحر لك البدلة ويجعثها ويجعثك. وتقولي له: البدلة كبيرة عليك يا خبير. ويقولك: ما عليك شكبر لاداخلها! وموسم بعد موسم يا لول والخبير راكز بالبدلة ويداته داخل جيوبها وفي كل مناسبة يمهدها لك ويرنجها بالاخضر ويخليها ساع الضفدع كامل. وتقولي له: مله بس يكفي تصبون ياخبير مله بس يكفي فحير مله خلاص جعثت أم البدلة ووسختها وشططتها وغوبرتها. ويتبجح عليك ويقولك: ما من بدلة؟ أو قصدك هذي الذي لابسها فوقي؟ تقولي له: ايوه هيه. يقولك: ماعه ماعه يا خبير؛ هذي البدلة هي حق جدي رسول الله هو فصلها علينا !!! والله اختارنا نلبسها بالقوة وانتوا اجلسوا مخلسين!! ايوااااه يا بهلول هؤلاء هم الحوثيون الله يقلعهم. وسخوا البدلة وزاد ينكرونا! نقلا من صفحة الكاتب بالفيس بوك
