فكري قاسم (1) انا مواطن يمني انت مواطن يمني ؟ ايوه ياضاك ولاتقلق على مستقبلك ابدا منو زيك معك حكومتين هانا وهاناااك واربعة رؤساء وعشرين حزب ومشائخ خيراااات وعلماء ومعسكرات ومليشيات وحقوق انسان وكلهم كلهم يتلابجو على شان راحتك ومستقبلك ايوه ايوه كلهم يهموا مستقبلك وحتى الملك سلمان بكله ياضاك ماعد بيقدر يرقد ولاتغمض له عين من كثر مابيهم مستقبلك ومايبكر يصبحك بيض والا فول والا فاصوليا مع البيض ويتخارج لأنو كم عيجلس مهموم بالصبوح باقي معه الغداء والعشاء وبأيش بانحلي لازم نحلي اصلا الحكومة حقنا رجمت بالمسؤلية كلها لافوق الملك وهم يذاكروا وبس ويقولك حتى الماء والبيبسي يخرج الملك بنفسه يشتريه لهم من البقالة مايشتي يشغلهم ابدا ابدا عن المذاكرة وصح انو الملك قدو مرهق منهم بس برضه قالهم لايهموا اي شي ، وحتى الكسوة حق العيد قال هو عيخرج بنفسه السوق يكسينا وهم يجسوا يذاكروا واحنا مراعيين للنتيجة يارب ينجحوا يارب يارب (2) أنا مواطن يمني ابيع بطاط فوق هذه العربية ودست البطاط هذا هو ضماري انا وعيالي الاربعة وامهم ساكنين ايجار بخمسة وعشرين الف بالشهر والحمد لله مرتاحين احب بلادي هيييهاه وكيف ماشاحبهاش وهي ضمار ضماري انا وعيالي وعيال عيال عيالي ومامعي من الدنيا ضمار الا هيه انا افدى قلبه اليمن لولا الحرب اهلكتنا يالطييييف لكن المخارج كريم —————- انا فدى قلب ام ام ابائن ام ابوك امك يا إنسان هذه البلاد ياملك وياكبير يا اللي كلهم يجعثوك ويفحروك ويسروقك وويتحاربوا فوق رأسك وأنت أنت لاتتذمر ولاتتكبر ولابتشغل بلادك بشيء ولا مثقل عليها بشيء ولاتبيع وتشتري الا فوق دست البطاط وكل هولا الاعفاط حقنا اللي داخل واللي هاناااااك اللي وفرت لهم هذه البلاد الطيبة والخيرة كوووول شيء ثراء وجاه ونفوذ وفرص هم هم يابو البطاط وماقدروا ولاعيقدروا يقعوا حتى ساع ربعك او حتى سع ربع دست البطاط يابو البطاط محسنك ولاتقلق ابدا لانوا الاعفاط حقنا، المحاربين الاقوياء اللي كل واحد يلبج الثاني هم يفعلوا كل هذا منشان راحتك ومستقبلك ولاتقولهمش وقفوا الحرب ياجماعة، الحرب الذي داخل والذي خارج أووووبه كما انا لي منع ابوك لأنو اهم شيء المستقبل يابو البطاط (3) انا مواطن يمني أنت الجبير وزير خارجية الجارة الشقيقة اللي قالت أن الميليشيات المتحالفة مع إيران استولت على الشرعية في اليمن وما نسعى إليه هو عودة الشرعية..؟ ايوااااه ناهي مختلفناش ياخي واحنا مانشتي مليشيات لافي صنعاء ولا في عدن الذي قاتحرره ولا في تعز الذي عادها تتحرحر لليوم وبعدين ياسعادة الموسمك لايمكن لأي مليشيا في القرن الواحد والعشربن ان تحكم بلاااااد فيها جيش والجيش الذي معانا ماعابقيتوا به شيء والجيش الذي بتكعكوه لنا عندكم لموه مايبكر يداوم في عدن والا في تعز الذي عاده بتتحرحر على قليلة قليلة وبعدين بحجر الله يالجبير فوق رأس ابوك وامك وبحق المجورة والصلاة والصيام والوضوء اللي بيننا تقول للملك ان احنا زعلانين منه ايوه ومن العائلة كلها لأنو احنا كنا المواطنين، اليمنيين جالسين نهنجم بين الامم ان احنا جيران احسن واثرى ملك وانو لاحنبنا ولا مرض واحد مننا في من يسعفنا بسيارته لكن الملك ياسبحان الله عليه ارسل طائراته تتقارح فوقنا وعلينا ونكزنا احنا وعيالنا واحنا كنا الا نشتي نستخدم سيارته في حال مرضنا اما واحنا بخير حرام مانشتي ولاسياره عنسعف انفسنا للمستشفى مرجلين ايوه وزيد قله لمو يتواسق لايران من عندنا احنا..؟ وايران هي جارته هوه، مش جارتنا احنا وبعدين ياخي قد احنا ضابحين الصدق وطفشانين من الحرب وانتوا، جيراننا الاشقاء امنين كل واحد في بلاده وبيته وجالسين تتواسقوا لايران من داخل بلادنا والحكومة الشرعية تتواسقنا من داخل بلادكم منسب ترجع بلاده الا وآسيلوه انا من رأيي ياجاري العزيز انو توحدوا المواسقة بينكم وبين الشرعية ودول المنطقة كلها منسب نتحرر فيسع ونشكر مساعيكم لاعادة الشرعية بعدما يكملوا الترم ماعنجلس نراعي لاما يكملوا الجامعة
