الغرابي ابو مسعود جالس فوق غصن شجرة بجانب مدرسة زينب علي قاسم بدار سعد . يلتفت ناحية السماء حيث يحلق عائدا الغرابي ابو صالح يبدو ابو صالح عاده جاي من ناحية الشيخ عثمان يحط على اطراف الشجرة بالقرب من ابو مسعود ويمسح وجهه بجناحه ويبدأ بالتقاط انفاسه ويبادر بالحديث. - شفت يا ابو مسعود .. - هاه خير ايش قد معنا يا ابو صالح ؟ - نعم قالك الكهرباء طافية من أمس بسبب واحد من اصحابنا - مالك صلي عالنبي ايش الهدرة دي ماعاد لاقوا إلا بني "غربان" - والله هذا اللي حصل شفنا طرت لمن الشيخ عثمان وبعدين حطيت فوق مقهاية الشجرة وجالس استمع واحد كان يقول ان الحكومة قالوا انو غرابي هو اللي طفى الكهرباء . - مالك صلي عالنبي معقولة وصلت بهم البجاحة كذا يقولوا للناس والناس يصدقوا - ايوه والله الناس مصدقين وعادو واحد قال :" سب لعاره اللي عاده يخلي غرابي بعد اليوم.. يتنحنح ابو مسعود ويبدو غاضبا وبشدة ويقول بلغة غاضبة :" هيا اسمع هيا بنا للشجرة الكبيرة نخبر الشيخ (ابو علي) هذا الكلام ماينسكت عليه. يحلق ابو مسعو وابو صالح عاليا في طريقهما إلى الشجرة الكبيرة بحي البساتين . يلتفت ابو مسعود ناحية ابو صالح قائلا :" هيا انتبه تجزعنا فوق عرس ولا فوق مكان فيه اصحاب المقاومة يقرحوا لنا رؤوسنا . ابو صالح - لالا ذا الطريق امان وبعدين هم جواعى ذي اليومين ماعاد فيش الخريط حق زمان. تبدو من بعيد شجرة ضخمة بمنطقة الغربية وتعلوا منها اصوات "غااااااااغ غاااااااااااااغ" يصل ابو مسعود وابو صالح إلى الشجر الكبيرة حيث يتجمع كل ليلة العشرات من الغربان للتسامر كل ليلة عند الشيخ ابو علي يحطان هناك ويبادر ابو علي بالترحيب بهما وعلى وجه التحديد يرحب بابو مسعود وهو احد اصدقائه القدامى يبادر ابو علي متسائلا عن سبب الزيارة - خير يابو مسعود مابيجيب إلا امر جلل . يهز ابو مسعود راسه ويقول :" والله ياخي جابنا الهدرة البطالة ابو علي : خير ايش من هدرة بطالة؟ لاتقوليش انكم تضاربتم من جديد مع غربان البساتين ابو مسعود : لالا مافي من هذا ، ياخي ابو صالح راح الشيخ عثمان وسمع الناس يقولوا انو واحد غرابي من عيال الدار هو اللي طفى الكهرباء حق عدن بالله هذا كلام ياجماعة صلوا عالنبي الان بيجلسوا يقتلوا عيالنا بسبب هذه الاشاعة . ابو علي يهز راسه وتبدو عليه اثار غضب ويقول - ياخي والله ياابو مسعود عادنا اتكلم مع الشباب قبل قليل حول هاذي القضية لازم من وقفة جادة ، هذا الكلام ماينسكتش عليه ، قد المحببين والمحششين كملوا عيالنا ونحن ساكتين على اساس بيعقوا الناس ولافايدة . فجأة يأتي صوت بكاء ام الغورّيب تبكي من طرف الشجرة وتصيح بصوت عال :" الله لاقفر لهم اللي قتلوا عيالي .. عيال المحببات - ابو مسعود : ايش فيً خير مال الحرمة دي تبكي ايش في ياجماعة؟ - ابو علي : ياخي هدي ام الغورَيب واحد محبب قتل عيالها داخل العش حقهم بالغربية (منطقة بدار علي) قبل يومين ابو صالح يتحنحن ويقول :" طيب الان ياجماعة ايش الحل كيف نقنع الناس ذونا بان الحكومة حقهم تكذب واننا الغوريب مالناش دخل من بيفهم ذونا الناس . ابو علي يرد قائلا :" ياخي المشكلة ذونا الناس مايفهموش لوكانوا يفهموا ولهم عقول ماكانوش مصدقين الحكومة حقهم من سنين ،دونا بلا عقول مافيش عقول يا ابو صالح . يصيح غرابي من الطرف ويقول :" ياخوان اتهموا قبل شهرين فأر بخور مكسر انو السبب ووقع لك هات ياقزع للفيران بالخور لازم تشوفوا لنا حل . ابو علي :" المشكلة ذونا الناس مايفكروش مثلا انه مافيش ديزل مافيش مولدات كهربائية مايفكروش ان اصحابهم جالسين يتصارعوا مايفكروش ابدا الان نحنا ايش دخلنا ايش بيخارجنا . ابو مسعود :" والله يابو علي نفس الكلام اللي قلتو لابو صالح في ناس تتصارع كبار بعدن والمساكين من الناس ضحية انا وانا غرابي اعمل لفة للشيخ والمنصورة يوميا اسمع كلام الناس افهم انو في لعبة كبيرة بعدن وفي الاخير يجوا يقولوا لك انو غرابي سبب المشكلة . يبدو ابو "صالح" متململا من الوضع ويبادر قائلا :" الان ياجماعة ايش الحل ؟ يهز ابو مسعود راسه ويقول :" والله مافيش حل إلا اننا نروح نقابل بن دغر بمعاشيق ويعملوا نفي لا الكلام ماينسكتش عليه يهز الجميع رؤؤسهم ويرددوا هيا هيا قوموا على بركة الله نروح معاشيق ، وإذا ماخلوناش نشوف بن دغر شوفوا حرام ماعاد جلست دقيقة بعدن .. هيا هيا ..غاغ غااااااااااغ #فتحي_بن_لزرق
