بث نشطاء شباب على صفحات الفيس بوك شهادات خاصة بهم كتبت باللهجة العامية للمجزرة التي ارتكتبها القوات الموالية للحوثيين وصالح مساء الثلاثاء وصباح الاربعاء بحق مدنيين في منصورة عدن . وتنشر "عدن الغد" هنا نص هذه الشهادات مثلما كتبت ودون تدخل لأي تعديل أو حتى تصحيح لغوي
انس الهيج كتب يقول :" كنت باموت بس ربكم ستر والله خرجت زيما تخرج الشعره من وسط العجين امس كان يوم مأساوي جدا جدا بحوافينا بالمنصورة بحاشد حيث اسكن كنت اتعشي سمعت ضربه قوي هزت البيت هز طلعت فوق السقف اشوف شفت الدخان قريب الحافه اللي جمبنا على الخط شجن قتل العجوز رحت اجري اشوف الاولى حطت بس اجت سليمه حط بحوش مافيبوش احد شفت المكان اللي حطت الأولى وصورت دي الصورة بالدقيقتين الاولى كنت جالس بمكان خطير جدا والمقاومه تقول لنا اهربوا الثانيه بتحط هنا وضربوا رصاص عشان يهربوا التجمعات بس انا مش راضي ولا العيال راضين يروحوا والله دقيقتين كنت واقف قريب من الكدافه اتفرج للضربه الاولى صيحلي صاحبي رحت لاعنده كلمته كلمتين نسمع بوووم وشفت نار بالمكان اللي كنت واقف قريب جدا منه لولا الله انه حولي صاحبي يصيحلي فاتنا مت مع الجماعه اللي ماتوا بس ربكم ستر اللي ماتو بدي القذيفه سته ومدري كم جريح والمكان ذاك كانو كلهم عيال حوافينا واصحابي مليااان موجودين .. هربنا كلنا دخلنا للحافه والشاظيا نسمعه زي المطر فوقنا وربي بذاك الوقت كنا نجري بدون شعور بعض العيال حطت فوقهم الشظايا جمبي وواحد يقربلي اجت بيده اجى لاعندي ياانس الحقنا محد معي شليته النقيب المستشفى مليان جرحى واصحابي اتعوروا وبعضهم مسعفين رجعت شليت الليد الوالي والحمدلله خرجوله الشظية ودقوله ابره وشفنا حالات الله لاوراكم تزرب الديم ومن اللي شفنا حرمه اجت بيده الشظايا ويده ورمت تصيح عيالي عيالي ورجال كبير بالسن عينه ورمت ! روحنا مشي ونحنا ماشين خط السجن اتقفل من كثر سيارات الاسعافات وضرب الرصاص عشان الخط يفضي والمقاومه مشطت المنصورة كامل قليل ونسمع بوووم القذيفة الثالثه حطت مابين بلوك4 والعماير هذا المكان كله بشر وهنا وقعت المجزرة الثانيه هنا عيال الحافه اللي جمبنا اتقطعو قطاع والله وصل يدات ورجول وريوس طارت وحاجات كثيره والله تقطع القلب اللحم حقهم تطاير بالعماره والله العظيم حتى البسس ماتو تنتين حبه راسه طار وحبه بشظايا مع عيال حافتنا اللي كانو جالسين جمب صاحب الصيد وبعد ذا كله استمرت الكاتوشا بالضرب وحطوا ثلاث بالحوافي بس اجت سليمه ومافيش احد اتعور صلينا الفجر وصلينا على الموتى الخمسه للي بالحافه ووديناهم مقبرة الرحمن ونحنا نحفر القبور سمعنا قذيفه حطت قريبه من المقبره قفزنا انا واصحابي نشوف مستشفى النقيب والله شفنا جاهله عمره مايتجاوزش الخمس سنين رجله مقطوعة بالكيس شفناها وهي تتفرج لنا وتضحك ع نياته والله تقطع القلب خدروها ونقلوها لأطباء بلا حدود ... فين بترحوا من ربنا ايها المسوخ الشيطانيه الا لعنة الله عليكم اجمعين سننتصر بإذن الله رغم الحزن لاكن ثقتي بالله اكبر والله اكبر عمار نمر كتب على صفحته يحكي ماحدث بالقول جريمه مجزره بحقنا
قصه ارويها لكم انا عمار من قلب الحدث كنت انا واخي حسام في شركه الصيفي للصرافه وادا بصوت قديفه هاون تضرب بالحوش بجانب فندق انفنتي نسرع الا هناك ونصيح للشباب احنا دكاتره مسعفين هل في اصابات .. لله الحمد حطت داخل حوش ومافي اصابات كان تجمع كبير واحنا نصيح لا تتجمعو وشباب يضربو رصاص يفرقوهم ... في خلال ثواني ضربت هاون احمي نفسي انا واخي في ثواني اغمض عيوني والفت لوين ضربت الفت لورائي اشوف جثث مرميه شباب مقسمين رجل بدون جسم شاب مقسوم نصين مراهق بدون يد الارض كلها دم العالم تنزف ولا يوجد مسعفين غيري وحسام والناس تهرب نصيح نسعف بس تسعف ايش جثث؟؟ عملنا اللي علينا سعفت عدد لا اقدر عده اجت سيارات الاسعاف والمقاومه تجمعت الناس تحمل الاشلاء يدات رجول ريوس اجسام مصابين والحمدلله كلهم اسعفناهم .. اجلس بالارض ؛؛ ضربه هاون ثالثه فوق فندق انفنتي جسمي لا يقوى على الوقوف فجأه يخرجو حريم مصابات يالله ضربه رابعه العماره المقابله لفندق رويال كونكورد فوق بيت لا استحمل اتخبي وانتظر الواقع المرير خلاص الشعب كل بيكمل ؟؟ ضربه خامسه فوق منزل ببلوك اربعه بيت فيه حريم نازحين يالله صوت الاطفال والحريم بكل مكان...
ايش دنب كل من كان فيه شجن ... ايش دنب كل من ببيته مستريح