كل يوم الساعة عشر في الليل اسمع كانه في حاجة كبيرة سقطت من فوق ويتكرر الصوت اكثر من مرة .. وبعدين صوت جري حق خمسة ستة عيال .. وبعده مباشرة صوت سيارة .. كل يوم اسمع نفس الاصوات واقول يمكن حد ينقل من الحافة _هيا احسن لان حافتنا تجيب الضيق احيانا_ .. طيب ايش دخل الجري بالموضوع ؟؟ وايش الحاجة دي اللي تسقط بشكل مفاجئ ؟؟ خرجت اتخاوص من الباب احسب ان النظام هو اللي سقط .. واصوات الجري اكيد المظاهرات السلمية ..
الحمد لله ربي نولنا مرادي وباشوف ثورتنا اخيرا تنجح .. بمجرد ماخرجت انصدمت كثير لانه اللي شفته يوجع القلب من داخل القلب ..واكتشفت ان ثورتنا عاده يشتيله ويشا .. شفت شباب زي الورد اتحولوا لزعماء عصابات .. لابسين اسود باسود وشرابات بوجوههم وطلعت الحاجات اللي تسقط للارض وترج الحافة هي كيبلات من الحجم العائلي .. واللي يجروا هم عيال حافتي معاهم واحد عزيز صدمنا جدا وجوده معاهم ..
المهم طلعت الخبارة كبيرة جدا سع راسي .. بعد البحث والتحري اكتشفت ياجماعة الخير ان مصنع الغزل والنسيج اللي جمبنا اتحول الى غنيمة حرب لعيال الحافة مع ان المصنع عيب انحنا نقول عليه مصنع لانه مايصنعش الا الجن اللي ساكنين فيه ومكان امن للكلاب المشردة لان الحكومة عنده اولويات الكلاب اولا بعدين البشر .. المهم والاهم والاكثر اهمية ان مصنع الغزل والنسيج في مراحلة الاخيرة لتصفية العهدة من الحراس لعيال حافتي .. والعملية تتم بمنتهى البساطة على قولة واحد مستور من عيال حافتي .. اللي حكالي ان الحراس حق المصنع نوبة الليل يلموا الحاجات (كيبلات ومولدات واجهزة مختلفة) على اساس انهم بيتقاسموبه.. وبعدين يبلغوا ان في حد سرقهم .. بس في واحد من الحراس متفق مع عيال حافتي انه يعطيهم اشارة معينة عشان يهجموا بالاسلحة عليهم ويهددوهم ويشلوا كل التركة .. ولان المصنع يقع في النطاق الجغرافي لحافتي فعيال حافتي لهم نصيب الاسد من الفريسة ومستحيل يخلوا أي حد يقاسمهم والعذر القبيح انهم ضباحة ومحتاجين والحكومة ماوفرتلهم اشغال .. والسرقة بالحالة دي حلال من وجهة نظر مفتي الحافة ..
ومصنع الغزل والنسيج بعد كم يوم بيتحول الى بقعة خاوية وجاهزة للبناء والتعمير ومستنية لواحد من مشايخ صنعاء او واحد من القادة العسكريين عشان يخرج اوراق تؤكد ان الارضية حقه من 1980 .. ومش بس مصنعنا العظيم اللي تستويله عملية القشط المبرح هذي ..
في اكيد اماكن كثيرة اتحولت بقدرة قادر الى غنائم حرب لاصحاب الحوافي القريبة منه ومعاهم كمان مفتي يحللهم السرقة .. بس في سؤال محيرنا كمان .. فين مدراء المرافق دي اللي تسرق ؟؟ يمكن مش فاضيين .. او يمكن معاهم فتاوى لحالهم تحللهم حاجات اكبر من اللي يشلوها عيال حافتي .. لكم الله ياعيال حافتي لك الله يا مصنع الغزل والنسيج .. لك الله ياعدن .. *خاص عدن الغد