الأسبوع اللي راح كتبت عن موضوع الغزل والنسيج وعمليات النهب اللي يتعرض له المصنع وذكرت عيال حافتي وشلة الحراس اللي يحموا المصنع واللي لهم الفضل بان المصنع محتفظ بكل مايملك ولانقصت منه حتى إبرة خياطة .. ومن بعد ذاك اليوم كنت امشي بالحافة وعيون عيال حافتي عتب ولوم وكأنهم يقولولي يالوماه يابن حافتنا .. بصراحة انا غلطان عليهم وظلمتهم والان واجي اعتذرلهم واقولهم ( عفوا ياعيال حافتي ) لأننا ظلمتكم ومسكت الجمل وسبت الجمال .. مسكت اللي شلوا فتافيت وماذكرت اللي شل الجمل بماحمل .. عفوا عيال حافتي لان اللي شليتنه انتم ولا هو حاجة قدام الحاجات اللي أشتلت من المصنع قدام عيوننا والحاجات تخرج ويصرفوها ( كندم ) وهي عاده بعافيته أحسن مني .. عفوا عيال حافتي لأننا ندفت اللي يتقاسموا أبو ستين سبعين ألف ونسيت اندف أصحاب العرطات الكبيرة واللي يشتروا سيارات من أبو اثنين ثلاثة مليون لهم ولعيالهم ..عفوا لعيال حافتي لأنهم مساكين الله مرة يعرفوله ومرة مايعرفوش لان الطقم يطب عليهم لما يجيبلهم الصفار ويعملوا ستين خطة صيد وأحيانا يحتاجوا (غوارديولا) عشان يعملهم تقسيمة محترفة وخطة من النوع الكتلوني .. عفوا عيال حافتي .. حقكم عليا أصلا نحنا حيلنا عالجدار القصير ونحمي دايما عالجهال .. ونسيب الكبار يترندعوا .. منشئات كثيرة عندنا حاميها يكون حراميها .. المهم وبعد كل الحاجات اللي حصلت للمصنع في الأسبوع اللي راح من قفز انفرادي وثنائي ومن أحداث غريبة ولوم متكرر من عيال حافتي لي .. باشرونا بكلام غريب انا مستغرب منه بصراحة عن الحاجات الموجودة في المصنع لأنهم طبعا حافظين المصنع صم أحسن من بيوتهم بحكم المجورة والزيارات والمواتاه.. كلمونا عن مولدات تشغل منطقتين بالقيمة الفلانية ؟؟ وعن آلات بالأسعار العلانية ؟؟ لو من صدق المصنع عنده الحاجات الهايلة دي ليش ماسمعت صوت مكينة من يوم مانقلت للحافة من 93 .. مع إننا كنت أشوف قبل سنوات معرض منتجات من المصنع واعتقد كان الصنف الغالب ( تترون ) ابيض حق الكفانات .. بس برضه كان حاجة حلوة اقل شي الواحد يموت ويتكفن (بتترون) محلي مش نستورده من برع .. بصراحة انا مش مصدق ان الحاجات دي موجودة بمصنعنا ولو كانت موجودة اعتقد انها (كندم) ومحتاجة للتصريف والمناقصة جاهزة ومعروف من بايشتري الحاجات دي لان كل شي مرتب كالعادة .. بيبيعوك يامصنعنا بعد ماكنت واحد من اهم المنشئات المحلية .. ضيعوك يامصنعنا بعد ماكنت تشغل وتعيل اكثر من اسرة .. ضيعوك يامصنعنا بعد ماكنت شكل من اشكال الدولة المحترمة .. وداعا مصنع الغزل والنسيج .. وداعا يابقايا التترون .. * خاص عدن الغد
