: محسنه دا الرجال .. يعجبني من زمان .. محترم .. مرتب .. دايماً أشوفه نظيف ومقفع وحلا ودلا .. كدا رجالنا ما يخرجوش إلا نضاف مشيكين .. مو كما العويله حق دي اليومتين اللي سراويلهم تتطاحس طحوسه .. مرة مشيت بعد واحد شفت سرواله طاحس قلت باجري أغير عله .. رفعت له السروال .. قام شمتبي شمات الدنيا والآخرة .. نعم أيش لي الفضاله؟؟ ونعم دي موضة .. شفتو طلعت موضة وأني مش داريه .. أيش من موضه دي يجعله إزاله تزيله .. كيه سكته باصيح للعاقل حقنا .. يا أستاذ عيدروس .. الأستاذ عيدروس : مساء الفل يا نادية، كيفيك وكيف بناتك؟؟ نادية شجن : نحمد الله ونشكر فضله .. أني أصلا شفتك بالناظور حقي مقفع ومشيك .. وواجي من سنا حافة القاضي .. أيش معك بحافة القاضي؟؟ الأستاذ عيدروس : مكانك يا نادية إنتي والشجن حقك .. ولا بتبطلي دا الطبع؟ نادية شجن : ماقدرش .. باموت لو ما اتشجنش .. لازم أعرف كل صغيرة وكبيرة بدي الحافة.. الأستاذ عيدروس : طيب وأنا ببرد لك قلبك يا نادية .. نادية شجن : الله يبرد على جشايبك .. هيا قوول بلا فحس يا أستاد؟ الأستاذ عيدروس : والله يا نادية بحكم تخصصي في التاريخ والآثار سمعنا انهم يشتو يهدمو مسجد جوهر ويبنو مكانه مسجد جديد فخرجت زي المجنون أشتي أشوف أيش الخبر؟؟ نادية شجن : أووو .. يشتي يهدو مسجد جوهر .. حرام عليهم .. مش كفاية مسجد أبان .. عاده قلبي محروق عله لما اليوم .. الأستاذ عيدروس : قده ما عاد باقيش في عدن كله من التاريخ الإسلامي إلا جوهر والعيدروس .. هدمو تاريخ عدن الإسلامي كله.. نادية شجن : كله من بعد 94 سنة الشؤم .. من بعد 7 7 وفي ناس عاني مستعني حاميين على المساجد .. دبيج إرصع .. دبيج إرصع .. ولا بقو مسجد .. وصلحو مساجد جديدة كله نفس النامونه .. الأستاذ عيدروس : طمس للهوية يا نادية .. ما يشتوش يكون لعدن هوية تاريخية .. في حملة تشتي ترسخ فكرة إن عدن بدون تاريخ إسلامي وإننا بقايا ماركسيين و شيوعين كفرة.. نادية شجن : أووو يجعله كسر بلقفه اللي يقول علينا كدا .. أني من يوم ما عرفت نفسي وأني ولا أقطع فرض .. كدا ربوني أمي وأبي وجدي وجدتي وكدا ربيت بناتي والحمدلله.. الأستاذ عيدروس : الحمدلله يا نادية .. عدن على اختلاف من حكمها كانت مساجدها دايما عامرة بالناس وزارها كثير من قامات ديننا الإسلامي منهم الإمام ابن حنبل ومعاذ بن جبل والحكم بن أبان .. تصدقي حتى في مصادر تقول إن الإمام علي بن أبي طالب زار عدن والقى فيها خطبة مهمة.. وسكن فيها أهم علماء مثل العسقلاني والبيحاني والعيدروس تصدقي ان مسجد جوهر مدفون فيبه قريب 70 عالم من ضمنهم الإمام الطبري رحمة الله عليه.. نادية شجن : والله مسكينة عدن دي مظلومة طول عمره .. وعلى أيش استقريتو بالمسجد؟؟ الأستاذ عيدروس : والله الحمدلله في ناس من أهل الحافة واعيين وإمام المسجد استجاب بس للأسف في ناس مدري مالهم تجي تفهمهم ينفجر فوقك كأنه معلم عليك.. نادية شجن : خير أيش قالو ؟؟ الأستاذ عيدروس : نعم نحن مزايدين .. بعضهم يصيح نعم ليش نحافظ على التاريخ وما نحافظ على الناس .. نعم المسجد بيسقط فوق المصليين ..وإن المسجد ضاق ولازم يتوسعو لأنه مايوسعش .. وإن البسس يدخلو ويتبولو على أرضية المسجد.. واللي يقول نعم نحن نمجد الحجر .. واللي قال إن نحن نشتي نروج لثقافة زيارة القبور والأولياء .. واللي قال نحن متعاونين مع شخص يشتي يبسط على الأرضية المحيطة بالمسجد .. و.. نادية شجن : بس .. بس يا أستاذ عيدروس .. دا كله .. مالنحنا رجعنا كدا .. كل واحد يشك بالثاني .. كل واحد مايقبلش للتاني كلمة .. مالكم يا ناس أيش جرابكم يا عيال عدن .. كنا نضرب فيبكم المثل.. الأستاذ عيدروس : لا يا نادية الحق يقال .. نحن جلسنا مع الناس وكلهم اتفهموا الموضوع .. أصلاً تكلمنا كلام العقل .. وعيال عدن لما تكلميهم كلام العقل مافيش أحسن منهم يوزنوه .. نادية شجن : كيه كلمني كلام العقل .. قلي أيش قلت لهم؟؟ الأستاذ عيدروس : قلنا لهم بنجيب مهندسين يتأكدو من أن المسجد ما بيسقطش فوق المصليين .. لأن لو بيسقط أهم شي سلامة الناس .. لكن لو في أمل أنه يبقى نحافظ على الأثر اللي عمره فوق 700 سنة .. ونرممه ونتوسع في المنطقة اللي جنبه.. نادية شجن : يا سلام عليك.. الأستاذ عيدروس : قلنا لهم الأرض اللي خايفين عليها من البسط وعشان نقطع الطريق على اللي يشتي يبسط نتوسع ونبني المسجد فيها .. بس بالطراز المعماري العدني .. نادية شجن : أني أفدا لقفك يا أستاد عيدروس .. مش دا البناء حق دي اليومتين اللي ولا يشبه حقنا.. الأستاذ عيدروس : وبالنسبة للمقبرة قلنا لهم .. محد بيعمل لا زيارة ولا شي بس بنعمل لوحة كبيرة عليها أسماء العلماء اللي إندفنوا هناك عشان تكون دليل قاطع على إن عدن مدينة علم وعلماء مش مثل ما يشتو البعض يروجوا عنها إنها مدينة بلا تاريخ ولا دين.. نادية : ربي يحفظك ويفصح لسانك يا أستاذ عيدروس .. وأيش قالوا الناس بحافة القاضي؟ الأستاذ عيدروس : كلهم وافقو .. حتى اللي كانو معترضين .. قلتلك كلام العقل مافيش أحسن منه.. نادية شجن : محسنهم أصحاب حافة القاضي .. الله يحفظك ياعدن .. والله يحفظ شبابك ورجالك وبناتك وحريمك .. كدا لو اتفاهمنا وقلبنا على بعض وكلمتنا واحدة ونسمع بعضنا وربي باترجع عدن جنة الله في أرضه.. عمرو جمال لصفحة "بالعدني" من صحيفة "عدن الغد" الورقية
