: مساء الخير يا أستاد عيدروس.. كيفك ؟ عيدروس : تمام .. تمام نادية شجن : مله الناس يردو السلام كما الناس يا أستاد .. أيش في مالك مربوش؟ عيدروس : خليلي حالي يا نادية قدنا مكبود ومقهور من قلب قلبي.. نادية شجن : مكبود ومقهور مرة وحدة .. خير أيش في ؟؟ عيدروس : عدن تضيع يا نادية .. عدن تضيع .. نادية شجن : لا حول ولا قوة إلا بالله .. أيش في يا استاذ؟؟ .. مالك تفو ر من دَرَمك.. عيدروس : الناس مسعورة بناء يا نادية .. كل مكان تروحي تلاقي ناس تبني .. عدن رجعت كله بردين .. نادية شجن : أيوة .. قدني اتفرج بالناظور حقي .. عدن رجع لونه رمادي من كثر البردين.. عيدروس : واللي يقهر الهدم يا نادية .. الهدم .. نادية شجن : أيوووة .. قدني شفتك بالناظور حقي .. تدور بالسوق الطويل جنب البيت القديم اللي يهدوه.. وكنتا جالس تصوره.. عيدروس : لا تذكريناش .. قلبي وجعنا يا نادية .. بيت عدني قديم عمره فوق الخمسين سنة .. يهدموه .. ومش هو لحاله في أكثر من بيت قديم داخل كريتر انهدمو خلال الفترة اللي فاتت .. نادية شجن : وأيش بتسوي يا أستاد؟ .. هذي أملاك خاصة ماتقدرش تمنع الناس انه تهد بيوته وتبني .. سنة الحياة .. أيش بتعمل.. عيدروس : حقهم على عيني وراسي .. بس لازم نمنعهم ..لازم نبوسهم فوق ريوسهم ونفهمهم انه دا غلط .. لازم الحكومة تمنعهم حتى من تغيير طوق الخشب لطوق ألمنيوم .. هذا تاريخ وهوية المدينة .. عدن باقيله قليل وبتكون بلا هوية ولا تاريخ.. نادية شجن : أووو ..بتمنع الناس حتى يغيروا طوق وأبواب البيوت .. مصلب لكنك.. عيدروس : في صنعاء القديمة، جدة القديمة، مراكش، الرباط ، الهند وكل بقاع الأرض يتم الحفاظ على المعمار القديم اللي تجاوز عمره خمسين سنة وتتم صيانته .. ليش عدن خارج الحسبة؟ .. نادية شجن : حتى الأبواب والطوق يحافظوا عليها صح؟ عيدروس : أيوة .. الحكومة مفروض تمنع أي حد يشتي يهدم .. ولو حد يشتي يبيع تعوضه تعويض لائق يرضيه .. وكمان عليها تتكفل بترميم واجهات البيوت .. في المدن التاريخية زي عدن اللي داخل البيت ملك المالك يعمل فيه اللي يشتي .. بس الواجهة ملك عام لازم نحافظ عليه .. وإلا يرضيك نبقى بلا هوية ولا تاريخ ولا مبنى يميز عدن عن غيره؟؟ نادية شجن : كلامك معقول ومنطقي .. طيب وكيف اللي انت تقوله بيتطبق ؟؟ عيدروس : في قرار نزل في أغسطس 2006 يعلن "عدن محمية تاريخية" اصدره المكتب التنفيذي للمحافظة .. دا القرار لازم يتفعل بأسرع وقت .. نادية شجن : وليش مافعلونوش لما الآن؟ عيدروس : طيور الظلام كثير يا نادية .. والجهل يقتل المدينة وأهله .. والناس اللي تقوم بالتوعية قليل جدا ... وفي كثير مرتاحين للحال الغلط اللي نحنا فيه .. ومش من مصلحتهم ان القرار يتفعل . نادية شجن : والحل يا أستاذ عيدروس.. عيدروس : نناضل لما آخر نَفَس .. لو نحب عدن لازم نستمر بالنضال .. وإلا بنرجع نقول " باي .. باي .. عدن" !!
