لما الدكتور يقول الموضوع ده ما يستناش لازم نتصرف فيه فورا.. يبقى قصده: لازم نلحق نعمل عليك شغل لأن لو استنينا هو هيخاف لوحده وتضيع علينا الفرصة!! لما الدكتور يقول استعمل الدواء ده وعدي عليا بعد بكرة.. يبقى قصده: ده دواء لا بينفع ولا يضر تعالى لي بعد يومين أكون سألت حد بيفهم !! لما الدكتور يقول أشوفك بعد عشرة أيام..يبقى قصده: علشان تدفع كشف جديد انت مش قرأت اليافطة وأنت داخل مكتوب عليها «الاستشارة فى خلال أسبوع من الكشف»!! لما الدكتور يقول إحنا هنتابع تطورات الحالة أسبوع كمان قبل ما نقدم على أي إجراء.. يبقى قصده: الصبر طيب يمكن البلوة دي تتحول لحاجة نعرف لها علاج!! لما الدكتور يقول اعمل التحاليل في المعمل ده أنا بثق في النتائج بتاعتهم..يبقى قصده بيدفعولي عمولة 40 % من تمن التحاليل!! لما الدكتور يقول أنا هاحولك على أخصائي يشوف حالتك أحسن منى..يبقى قصده: أنت صحتك زى الفل بس الراجل ده مزنوق في قرشين وواجب ننفعه!! لما الدكتور يقول أنا هوصفلك دواء جديد ممتاز.. يبقى قصده: هجرب فيك الدواء ده أنا محتاج حالات أعمل عليها البحث بتاع الترقية!! لما الدكتور يقول المضاد الحيوي ده ممتاز جدا مع انه غالي شوية سيبك من البديل الرخيص بتاع زمان بقى غير فعال..يبقى قصده: مندوب المبيعات بتاع الشركة لسة خارج من عندي ومديني شنطة دعاية جلد تجنن!