الظاهر سركم باتع وقوي وكراماتكم يا لطيف وربي ،، لكم الا كم يوم وقد ظهر اثركم شوفوا كيف نقص سعر البوتو جاز من ستة الف الي الفين وسبع وعاده يقولوا انكم زرزرتم عليهم كي يصل الي السعر المحدود الذي نحن مش دارين فيه من صدق الاولي والا ثاني وكم بيكون ومراعين منكم الجواب يا سادة يا كرام . جلستم مع مدراء المكاتب والاخريين وكلهم من اللي جابهم عفاش وانتم قدكم اذكياء وشطار وما بيجزعونيش عليكم لانكم قدكم داريين بهم ومن فين خرجوا من عصابة عفاش والمليون حرامي ،، قلتهم يسوا مسامير بالكراسي تقول كأنهم بيننا ولا شفنا منهم نفر ولا نخس ايام الحرب يظهروا الا لما في معونات وبعدها البرطحيس ومنهم كتبوا عيالهم وعيال الاهل مع المقاومة بس كلنا عارفين هم ايش من جبهة كانوا يحاربون الله يقول الحق كانوا معنا مخزنين بركن الحوافي، المهم معظمهم مش من عدن وهذا ما يهمنا المهم انهم مدراء مكاتب عدن بكل الوزارات والدكاكين وكمان مجالس المحلية المهم نشتي نشوف نشغلهم فينوه هذا الذي بمحافظة عدن والا ظهر شيء منه التوظيف للأهل ساني من القرى للمكاتب واخرهم في مكتبكم ،، وان كان تشتي عاده معي خبابير والله يا عيدروس !! بس ما شاء الله قدك ولي المقاومة انت والعميد شلال والأخريين وقدكم داريين هم فينهم وبايش من اخزاق مدككين ، قول لهم ساعدوا اهلكم بس مش على حساب عيالنا وعلى حساب عدن يا مدراء الهم والغم وانتبهوا انتم على انفسكم كما سبقني فيه احمد عمر بن فريد . وقبل ما اروح اشتيكم تجزعوا مستشفى خليفة وما كان يسمونه مستشفى 22 مايو جعل لابوها النكد شوفوا ايش عملت هذه المستشفى ايام الحرب ومن كانوا فيها وبعد ما خلصت الحرب كردوهم واجوا بعض الدكاترة الاصلي بس وقالوا والباقين يدوروا ويشتوا رواتب واعطوهم مع العلاوات والي ساعتكم البعض منهم ظهر والباقين اسأل عنهم وينهم وفين وغني لهم اغنية احمد قاسم " فينك وفين ساكن " وزيد اسأل على الجزعة على المولد الذي جابته الكويت والباص ؟؟ وما اشتيش اطول بس اقول خلوا بالكم على انماء شوفوا يبان الوكر هناك وبالمدينة الخضراء كما اجى بالواتس وشيء لله يا عيدروس.
