اتصل بي امس الدكتور قيس جرادة وقال : باارسل لك مع ابني لحم نحنا ذبحنا كبش لابن حسين سابع للمولود .. باركت له وشكرته وقلت له : ابنك يعرف الشقة حقي..؟؟ قال : ايوه وانا بااجيبه بسيارتي .. قلت : حلو اذا ماهلناش يدق الباب ويعطيه للعائلة... كلمت الحجة على موضوع اللحم قالت : تمام بس ان شاء الله مايتأخر علشان نطبخه بسرعة.. انتظرت حتى اذن الظهر ونزلت اصلي ورجعت البيت وقلت لهم : وصل اللحم والا عادووه..قالوا : عادوه.. قلت لهم : بايكون واجي في الطريق ودخلت الغرفة اتشوه بالجوال.. مرت ساعتان واللحم ماوصل والحجة تقول : فينه صاحبك التختر قرب العصر واللحم ماوصل؟ قلت : يمكن زحمة في الطريق..قالت : او ..ايش من زحمة الان في هذا الوقت؟ شوف اني بااطبخ الرز على صانونة الهواء ولما يجي لحمك باعمله مرق وبس.. قلت : حلو..كم لي مااشرب مرق.. أذن العصر واتغدينا صانونة الهواء واللحم ماوصل نزلت اشرب شاهي ومن هناك اتصلت بالدكتور وسألته : ايش بطلتم تذبحوا ؟ قال : كيف؟ ايش ماوصل اللحم ؟ اناجبته من نفسي قبل الظهر وخليت ابني يطلعه وسلمه العائلة ورجع.. قلت : لمن سلمه يادكتور؟ قال : لحظه وبعد ثواني قال : سألت الوليد قال سلمه لحرمه ضعيفة بعد ان سألها : فين خالد وردت عليه : خالد موجود داخل قال لها : قولي له هذا اللحم له من ابي الدكتور قيس جرادة .. هو كمل الكلام وانا اجت لي دوخة وقهر وقلت له : اللحم طار وابنك اعطاه للشقة الغلط والجماعة طبخوه واكلوه خلاص عليه العوض ومنه العوض.. رد قائلا : ذولا بلا حياء كيف يشلوا حاجة مش لهم.. قلت له : نصيب يادكتور قد قال فريد الاطرش قدام عينيا وبعيد عليا مقسوم لغيري وهو ليا.. خلاص حصل خير ومرة ثانية اذا في سابع والا ثامن اتصل وانا بااجي اشله من نفسي.. قال : لاحول ولاقوة الا بالله خلاص معوض ان شاء الله بااعوضك قلت له : مبروك لكم جميعا..مع السلامة.. انا اصلا حسيت ان في حاجة غلط ومش طبيعي حصلت في العمارة.. اولا شميت عرف المرق يقرح في سلم العمارة وبعدين ابن صاحب الشقة اللي اكل لحمي وقف جنبي وسمعته يقول لصاحبه : بأروح سوق الكراع اجيب لي قات من عند ابو شنب .. قال له صاحبه : ذا يبيع غالي.. رد عليه : انا اليوم اكلت لحم واشتي قات مليح علشان افتهن.. روحت البيت وقلت للحرمة : شوفي اللي اكلت لحمنا صاحبتك جارتك وحكيت لها الحكاية .. صاحت صوت : ايش تقول اكلوا اللحم حقنا ذولا بلا حياء اني الان باانزل لهم.. قلت لها : ايش الفائدة اللحم اكلوه وانتهى الامر ردت : لا باانزل اشمت بهم اجلس انت واني باارجع ونزلت لهم.. اجت الحرمة وهي تنهف وتشتعل نار وقالت : شوف على كلام تقول لك الوليد دق الباب وقال : فين خالد ؟ قالوا له : داخل في الغرفة. أعطاهم الكيس اللي فيبه اللحم وقال : قولوا له هذا من الدكتور قيس وهم اخدوا الكيس وطبخوا اللحم واكلوه.. قلت لها : عاد الله بايراجعك خالد حقكم صغير عمره سنتين من متى قده يصاحب دكاترة ويرسلوا له هدايا ؟ ماخطرش على بالك ان فوقكم واحد اسمه خالد يشتغل في الصحة والف دكتور يعرفه.. قالت : سامحونحنا والله اني احسب انه لنا ولكن من عيوني لما استلم معاشي الشهر القادم بااشتري لكم كيلو لحم ولايهمك .. شعرت اني بااجنن فوقها قلت لها : ما فيش داعي اللي حصل ومع السلامة.. قلت لها : خلاص ياحجة قضي الامر وعوضنا على الله.. انا طول اليوم اشتي انسي موضوع اللحم ما قدرت.. انا قلبي يوجعنا ومقهور من ابنهم التنح اللي راح يشتري قات بعدما اكل اللحم حقي علشان يرتاح ويفتهن ..!! تعليقات القراء 522452 [1] قصة حلوة او هي حقيقيه الأحد 31 يناير 2021 محمد الحافظ | عدن معليش يا دكتور وبعدين انت طبيب و عترف بلاوي اللحوم الحمراء . كل دجاج . ههههههههههههههه
